Young Minds

Chapter 31

Chapter 31

Michael Cando

Maaga kaming umalis ni Akira kanina upang simulan na ang mga plano namin, pero tama nga si Akira, mabilis makakatunog si Gary oras na hanapin namin si Dark Jaguar na matagal nang pinaghahanap ang buong gang. Ilang buwan din ang iginugol namin ni Akira para maisingit sa ang paghahanap sa kanya sa tuwing may operation kami at lahat ng paghihirap namin ay matutuldukan na.

Lahat ng pagtitiis ko na mapalayo sa mga mahal ko sa buhay ay magtatapos na.

Mabilis na nahuli si Akira ng mga tauhan ni Gary at kagaya ng pinag usapan naming dalawa na ano man ang mangyari ay tutuloy ang isa sa amin papunta kay Dark Jaguar para maisakatuparan ang lahat ng plano. Malakas ang pakiramdam ko na gagamitin niyang patibong sa akin si Akira oras na malaman niya ang lahat, pero ang hindi ko matanggap ay nang madamay maging si Sabrina.

Balisa na ako at desperado na! Kinakain na ako ng emosyon ko at hindi na ako makapag isip ng tama! Mas binilisan ko ang pagmamaneho ng kotse upang makarating sa address na nakalap namin ni Akira patungo kay Dark Jaguar.

Isang mala-mansion ang bumungad sa akin nang marating ko ang address na nakalap namin ni Akira, maraming nakabantay doon pero hindi na ako nagdalawang isip pa na sumilip sa malaking gate nila na kita ang buong mansion at paligid, may malaking fountain din ito sa gitna.

"Bata, mukhang naliligaw ka." Puna sa akin ng isa, huminga ako ng malalim at umiling.

"I'm here to see Dark Jaguar." Bulong ko, bakas sa mukha nito ang pagtataka.

"Sandali lang." Lumayo ito saglit sa akin at habang sinisipat ako ng tingin ay may kinakausap ito sa cellphone.

Nabuhayan ako ng loob nang buksan nito ang malaking gate ngunit laking gulat ko nang hilahin ako nito sa kwelyo ko! "Sinong nagpadala sayo dito?! Walang inaasahan na panauhin si Dark Jaguar! Akala mo ba ay makakalabas ka pa ng buhay dito oras na malaman namin kung sino ang nagpadala sayo?!"

Mabilis ako nitong naitalikod at naramdaman kong nakaposas na sa likod ang dalawang kamay ko. Nagpatianod na lamang ako dito nang ipagtulakan ako nito papasok sa loob ng mansion, mas mabuti na ito para sigurado akong makakaharap ko si Dark Jaguar, pero hindi ako dapat magtagal dahil nanganganib ang buhay ng mag ina ko, I'd better find a way to save them.

Ipinasok ako nito sa isang bakanteng kwarto, may isang lamesa doon na may isang baso at isang bote ng alak, napaluhod ako nang malakas niya akong sipain sa likod saka mabilis akong kinapkapan nito at nakuha ang cellphone ko. "Bata, kung ako sayo aaminin ko na kung sino ang nagpadala sayo."

Ngumisi ako, "Kagaya ng sabi ko, si Dark Jaguar ang hinahanap ko. Wala akong panahon o dahilan para makipag usap sayo."

Wala akong balak sabihin dito ang tungkol kay Gary unless si Dark Jaguar ang kaharap ko. Kailangan kong makasigurado.

Akma akong hahampasin ng baril nito ngunit natigilan siya nang may marinig kaming boses mula sa labas. "Boss, may nahuli si Blue Rider na umaaligid sa mansion."

Magkakasunod na yabag ng paa ang naririnig kong papalapit sa kwarto at nang magbukas ang pinto ay pumasok ang dalawa pang sa tingin ko ay spy din dito. Pero napakunot ang noo ko sa huling pumasok, maging siya ay mukhang nagulat na makita ako.

"Boss," Tawag ng spy sa kanya saka sinaluduhan siya.

"Y... you're him?" I whispered in disbelief, sandali niya akong tinignan ng buong pagtataka.

Dark Jaguar is my dad?

"Pakawalan niyo siya." Matigas na sambit niya at mabilis na sumunod sa kanya ang mga bantay.