العجوز والقبيحة

1

#العجوز_والقبيحة1
Shahd Alsalman

دا امشي راجعة لبيتي من شغلي جان تقريبا وقت الغروب
حبيت اتمشى على كيفي اليوم الجو حلو واني ما عندي التزام او شي يجبرني ارجع من وكت لبيتي
رحت على الجسر حتى اشوف الشط واستمتع بنسمات الهوا بس بعد حتليل الدنيا
رجعت بطريقي لمحت شي متمدد كأنو جثة هامدة لا حس ولا نفس وبصراحة خفت اتقرب بس من واجبي وحسب مهنتي لازم اشوف شنو الموضوع واذا اكدر انقذ هالروح مراح اقصر ..

من تقربت شفت مرية جبيرة بالعمر واكعة وفاقدة وعيها كلبتها على ظهرها وحاولت اصحيها ما تستجيب لا ضربات ولا هزات بس بيها نفس واكو نبض ضعيف دكيت على المستشفى اللي اشتغل بيها حتى يدزولي سيارة اسعاف
وهي جانت قريبة علية ما طولو شلناها واخذناها

بعد ما وصلنا وفحصتها الدكتورة كالت ضغطها مرتفع والسكر يعني هي بحكم عمرها تعاني من هالشغلتين
بس المشكلة انه ما اعرفها ولا اكو شي يوصلني لاهلها دورت بجنطتها على رقم او تلفونها او عنوان معين ما لكيت وراح اضطر انه انتظرها تصحى
او يجي احد يسال عن مرة جبيرة بالعمر يدورها ..

من ملابسها وجنطتها عرفت صاير وياها شي لان لابسة لبس بيت وكأنو يا دوب ملحكة تلبسهم وجنطتها بيها دوة ضغط خلصان مباقي بي كم حبة وجزدان من فتحتة ردت اشوف بلكي مكتوب بورقة شي يخص اهلهة شفت 50 الف و خردة
ما بيها اي شي ثاني بس هيج حسيت انه هي واكعة بمشكلة ع العموم حيبين كل شي من تكعد

استلمت خفارة عن صديقتي نادين ذاك اليوم وبتت اني بمكانها وتبادلنا وهي كيفت لان تريد ترجع لامها جانت مريضة وبالها يمها ...

للفجر تقريبا كعدت وفتحت عينها مستغربة من المكان اللي هي بي وتباوع بكل الجهات بس بتعب صحت الدكتورة واني وياها دنجيك على وضعها ونسألها بس متجاوب اي شي
ضغطها وسكرها استقرو و بعد لازمها راحة ونوم
طلعت الدكتورة حاولت اسالها عن اهلها او عنوان بيتها بس متحجي ولا تنطق وتظاهرت بالنوم فعفتها على راحتها وطلعت اجيك على بقية المرضى واشوف شنو يحتاجون وانطيهم علاجهم على الوقت
يعني مثل كل خفارة بس هالمرة غير شغلتني هالمرية كلش و زاد قلقي لما ما قبلت تجاوب ..

صار الصبح وفحصناها مرة ثانية الحمدلله كلة تمام وما عدها اي مشكلة كل شي مستقر وصار لازم نخرجها بس حسيتهة متريد تطلع ومتعرف وين تروح من كلتلها الدكتورة اليوم تطلعين
انتظرت الدكتورة تروح وكلت افتهم منها بلكي اكدر اساعدها

- خالة حبيبتي انت ما عندج مكان تروحيلة؟
- ...
- شوفي اعرف انت صاير شي وياج بس صدكيني مو قصدي اتدخل كل الاريدة اساعدج
جاوبيني عندج مكان ؟
- لا
- زين حابة اوديج لاحد او اهلج او مثلا اخابرهم يجون هم ياخذوج
- ما عندي احد
- امممم تريدين تجين وياية ؟
- يعني وين وياج ؟
- لبيتي
- لا
- ووين حتروحين ما عندج مكان وتكولين ما عندي احد تعالي مؤقتا يمي والله كريم عود انت محتاجة للراحة
- بس ..
- بس شنو خالة عندج غير حل اني دا اساعدج اقبليها واعتبريني بنتج

من كتلها هيج كامت تبجي وانقهرت نوب لو ادري فلا جان حجيت ظليت اهدي بيها وكتلها راح اروح اسويلج اجراءات الخروج طلعت هي الفلوس من جزدانها و رجعتلهيا اني تكفلت بكل شي
كملت تبديل ورحتلها حتى اخذها وكفت تكسي ورجعت للبيت وهي وياية

تسوكت من الماركت الجوة العمارة وهي واكفة تنتظرني وعمو ابو نورس يباوع عليها
- عمو هاي الوالدة الله يحفظها ؟
- لا عمو
- لعد منو ؟
- كرايبي وجايتني خطار
- خل تفوت تستريح ع الكرسي بينما تخلصين
- رحم الله والديك كملت حاسبني
- خليها علية
- ما تقصر فدوة لعينك
- 23 الف
- ان شاء الله
بس عمو و لو ازاحم مصطفى يصعدلي بطل المي ما اكدر اصعدة اليوم توجعني ايدي
- صار بابا اتدللي بس دهنيها بزيت زيتون مثل معلمتج
تعال مصطفى ابني صعد بطل المي وياها
- مشكور عمو من رخصتك
- الله وياج

صعدت اني و المرية ومصطفى ورانا شايل بطل المي ما اكدر اني اشيل ثكيل عندي فصخ بايدي كل فترة يرجع ياذيني
انطيتة المقسوم مثل كل مرة وجان عندي كليجة هم ضيفتة وراح نزل بس المرية تباوع علية كأنو دتشوف تصرفاتي وشدا اسوي او شون اتعامل ويا الناس ...