العجوز والقبيحة

20

#العجوز_والقبيحة20
Shahd Alsalman
فتحت عيوني لكيت نفسي يم البنات ومداويني على كد المواد العدهم بوصل قماش لان اكو اماكن مجرحة ومتأذية ضغطت على نفسي وحسيت بوجع والم بس كمت ورجعت هم دكيت الباب وحدة منهم جرتني وكعدتني يمها

- انت ليش متوبين شوفي شسوو بيج والله جسمج خريطة صار
- لج شتوب مجاية هنا حتى اتأسر
- اي فهمتج بس انت تريدين اهلج وتدوريلهم اكعدي وسكتي وفكري
- استغفر الله يا رب الصبر منك
- شسمج
- بلسم
وانت
- غالية
باعي اني صارلي هنا شهرين تقريبا ودا احاول انهزم محاولتين بس فشلت وطبعا جان العدد اكثر بس كل يوم ياخذون وحدة يتزوجها الامير مالتهم
- جهاد النكاح !
- اي بالضبط هو هذا
- وبعدها وين يودونا
- ما اعرف الصراحة
- زين انت وين اهلج ؟
- ما عندي احد اني وامي و والدي متوفي من جنت صغيرة وامي بسبب الفزات والخوف جان عدها ضغط وانجلطت وماتت من سنتين
- الله يرحمهم وشون وصلتي لهنا
- صارت مواجهة بين الجيش ديحررون الاهالي وبين الدواعش واخذوني وياهم بالاول جنا رهائن اطفال وشباب وبنات ونسوان كبار بعدين قسمونا واني صرت هنا بهالمكان
حاولت انهزم منهم بس بالمرة الاولى انلكفت وهم انضربت وطيحو حظي والثانية شفت ماكو مفر ورجعت
- يالله دخليك وحنكعد ننتظر موتنا احنا  لو واحد من هالخايسين ياخذنا للونسة باسم الجهاد او الزواج وكلة حرام بحرام !!!
- مالنا غير حل او ننتظر الجيش و الحشد يحررونا
- بالحرام احنا هنا كاعدين دنمثل فلم مستحيل هذا الي دنعيشة بيا زمن صدك جذب ليش هيج يا ربي
- الحمدلله على كل حال وهسة اهدي وتعالي اكلي لكمة انت محتاجة للقوة

تونا دناكل فاتو علينا اخذو كل الجهال الموجودين هم مو اطفال البنات ذولة بس انقهرو عليهم مدنعرف وين ماخذيهم حاولت ادافع عنهم وادفعهم للدواعش بس ضربني واحد منهم يمكن افغانستاني بجعب الرشاشة على جتفي وكعني توجعت كلش يمكن كسرة على كد القوة الاجتني بيها الضربة
اخذو الجهال وبقينا هيج نتصفن ويبجون البنات

باوعت لجتفي صار ازرك بس مدام اكدر احرك ايدي ولو يوجع معناها الحمدلله مو كسر ولا شي
غالية كالتلي انه لازم ما اقاومهم حتى لا يلحون وياية وهم ما عدهم رحمة ولا ضمير
بس اني ما اكدر اسكت واستسلم وارضى بشي غلط خليني اموت بكرامة احسن اذا واحد منهم حاول يلمسني اني ما انتظر اكتلة واكتل روحي واحمي نفسي وشرفي ولا هاي المذلة علمود بس ابقى عايشة
بعدين صفنت كلت لازم اتحمل علمود اهلي ولخاطرهم اني عندي هدف واريد اوصلة
بس اريد الله يساعدني ويعيني ...

بعد تقريبا 5 ايام

اني وغالية جنا نخطط انه ننهزم واذا كدرنا نهزم البقية بس لازم طريقة ولازمنا سرعة وسلاح حتى نكدرلهم هم هواية
جنا دنسولف بالخطة وسمعنا صوت الباب همين فاتو علينا وهالمرة اخذو من البنات 3 لان اجة دورهم حتى يكونون جواري للامير مالتهم
قل عددنا والخوف زاد لان اكيد حيجي الدور النا وراح نكون مثلهم مشكلتنا هاي غرفة ما بيها لا شباج لا مكان ممكن ننهزم منة يا دوب حمام ومغلق المكان الوحيد هو الباب وهذا الباب يودي لممر يالا يجي باب ثاني حتى واحد يكدر يطلع منة ..

لبعد كم يوم ما كمت احسبهم شكد الوكت صار يشبه بعضة ومن كثر التفكير ما صرت اركز على شي
اندفرت الباب بكل قوتها وفاتولنا غير ذولاك المجموعة ويحجون بلغة ممفهومة وصخين هم وهدومهم ولحيتهم العالية يمكن حتى مكملين من كد الوصاخة جرونا جر وعصبو عيونا وقيدو ايدينا و صرنا نمشي ونتعثر على حسب جرة حبالهم
دنروح لطريق مجهول منعرفة ومندري اذا حنعيش او نموت او ياذونا الله اعلم
صعدونا بسيارة ونسمعهم يحجون بيناتهم بس منفتهم عليهم كل العرفتة اسم شخص " ابو عمر "
وغالية كالتلي احتمال هذا يكون اميرهم وحيودونا الهم حتى يزوجونا
من كالتلي هيج كل شي بية انتفض واحس فار دمي مشاعر مخلوطة بين الخوف والغضب والقلق والاشمئزاز ما اعرف كرهت نفسي للحظة لما تخيلت اكون بهيج موقف ..

دتمشي السيارة بينا رجعت راسي ليورة ودا اشوف من جوة العصبة اللي على عيوني طريق شبه مهجور وكأنو على طريق السريع ما ادري ودخاخين تطلع من براميل محروكة ما حسيت الا على صوت الطلقات والرصاص
صار اشتباك وسمعت غالية والبنية الثانية يصيحون بعلو صوتهم
طبعا افتهمت اكو كبسة على ذولة بس المشكلة الضرب واطلاقات النار صارت عشوائية بحيث الطلقات دتفوت من يمنا اسمع صوتها
تشاهدنا وكلنا خلص بعد نهايتنا هنا بجيت مو من خوفي بس لان ما شفت اهلي ولا اخوتي ولا كدرت اودعهم غمضت عيوني حيل وجنت مدنجة راسي ...