العجوز والقبيحة

8

#العجوز_والقبيحة8
Shahd Alsalman
- شنو متدرين ؟
- ما ادري والله اهلي عايشين بالموصل وما اعرف اي شي عنهم احاول من فترة لفترة اتبع اخبارهم بس ما ادري انقطعت كل الاتصالات بيهم من 3 سنين والله اعلم اموات احياء محد بين منهم
- يا عيني سودة علية زين عندج اخوة خوات
- اختي متزوجة ومسافرة تشتغل ويا رجلها
واخويا ديدرس طب بروسيا وعندي اخ مفقود ويا اهلي
- يعني بقية اخوتج المسافرين يدرون باهلج
- لا كتلهم صعب يتصلون الا بية واني انطيهم اخبار جذب عنهم لان اذا درة اخويا ينتهي مستقبلة ويجي لهنا صفر اليدين
واختي اذا عرفت تموت قهر بس اني احاول كد ما اكدر افهمهم ع الوضع هم عايشين بقلق صحيح بس اقلها يعرفون انه عايشين وما بيهم شي
- انت الجبيرة ؟
- اي وبعدين اختي ووراها اخويا الطبيب ووراها الصغير جان بعمر الاعدادية
- يا رب يردون الج سالمين
- الله يسمع منج يا رب
- شسوو بينا هالدواعش شتتونا الله لا ينطيهم
- تصدكين كل يوم اتمنى  اسمع خبر عنهم واتندم لان جيت لهنا وتركتهم بس اكول لا يمكن الله خلة جيتي سبب علمود البقية اخوتي
- انت يعني مصلاوية بالاصل
- اهل امي مصالوة بس ابويا من بغداد اشتغل هناك واستقر وكعدنا يم اهل امي بيت قريب على منطقتهم صارلنا عمر
- زين انت ليش جيتي لهنا وتركتي اهلج
مو صعبة عليج وحدج
- ما جيت لوحدي
- لعد
- قصة طويلة هاي
خل نتعشى وباجر نسولف

وتعشينا وخلصنا نطيتها الدوة وكل وحدة بينا راحت لغرفتها اني كالعادة جكارتي بيدي واتحسر واتصفن على كل شي
اسئلة الحجية الي هيجت المواجع علية ما ادري شي عن اهلي مليت واني ادور وما لكيتلهم اثر
3 مرات احاول اطب للموصل وما اكدر ادخل بسبب الدواعش ويخلي ويرجع السايق بية اطك بجي وقهر بس ما بيدي شي
جانت اخر مكالمة الي وياهم  ...

- الو ها ماما حبيبتي شلونكم
- ها يمة بلسم شلونج انت طمنيني عنج
- يمة اني زينة لا يظل بالج علية الله يخليكم انتو تعالو هاي كل ما احجي وياج صوت ضرب اسمع وطلقات شديصير يمكم
- يمة وين نجي ونعوف البيت والغراض شنسوي هاي قسمتنا
-  يوم صدك تحجين يا بيت يا غراض روحكم وسلامتكم اهم فدوة لا تشلعين كلبي اني ادزلكم منا سايق والله ويجيبكم
- يمة ما نكدر حتى طلعتنا صعبة احنا محصورين حتى لباب البيت ما نكدر نطلع
البارحة دفنا الذهب والفلوس بالبيت و خليناها امانة الله ورسولة
- ليش متطلعون
- محاصرينا كل منطقة بيها مجموعة ومنعرفهم ولا شايفين شكولاتهم ومنطلع الا مبوشين والرياجيل ملتحين
- صدك جذب
- اي والله يا يمة واذا ردنا نطلع خارج الموصل حتى لو محافظات لازم مدة معينة ونرجع ونسلمهم سند البيت مثل تأمين
- هاي شدتحجين يوم وين كاعدين احنا
- بحرب يمة احنا هنا عايشين بالخوف والرعب على غفلة ينهجم بيت ويوكع
- وشمنتظرين لحد ما تروحون من ايديا ؟؟
- الروح بيد الله وما نطلع احنا ولا نعوف بيتنا وشمكتوب نشوف قابل بغير مكان منموت
- الله الحافظ يا رب

سمعت صوت ناس وهوسة وصياح وطلقات
وانكطع الاتصال ظليت اصيح الو وعلى امي وماكو احد يرد وارجع اتصل يطلع مغلق يمكن بذاك اليوم انجلطت ومحاسة على نفسي من كد ما قلقت وخفت
بقيت ايام احاول واريد احد يتصل واتصل وماكو نتيجة من بعدها حاولت اول محاولة حتى افوت الموصل بس فشلت والسايق صعب علي يدخل سيطرة لان جانت تابعة للدواعش وخاف منهم ولاف ورجع

انتظر خبر عنهم وانطي فلوس ومكافاءات للي يوصلني الهم او يلكاهم بس كلها جذب والناس ما عدها رحمة على احد تريد بس الفلوس ومو مهم باقي الشغلات ولا مشاعر الاهالي
اني اخر شي كلت ويا نفسي مو مشكلة خلي يموتون كلهم والله راضية بس الكة جثثهم وادفنهم

تاليها كمت اتمنى الموت حتى اعرفلهم خبر قسيت على نفسي هواية بطلت من الاكل والشرب وصارت مشاكل عندي واختي واخوية يدكون ويسالون عنهم واني بطبعي عقلانية صح عاطفية وحنونة بس اتصرف بهدوء وما اكبر المواضيع واكول الله كريم مالي غير الصبر والدعاء

اضطريت اكللهم ما يخلوهم يحجون بالاتصال وما عدهم انترنت وديتواصلون وياية
3 سنوات واني اجذب عليهم وحتى يصدكوني خليت صديقتي نادين هم تجذب عليهم وياية
وتكللهم اهلي وياهم ويمهم ودتوصلنا اخبارهم وبخير هم بس محاصرين وكل شي ممنوع عليهم يالا شوية امنو وهدو  ..