العجوز والقبيحة

30

#العجوز_والقبيحة30
Shahd Alsalman
- كلادة !
- كلادة امك اقراها اسمها مكتوب ليورة عليها انطتها الي حتى الله يحفظني علمود روحتي
- صحيح اسد هذي كلادة خالة اللي عمو انطاها الها اني اعرفها
- ها اسد هي كلادة الحجية احجي خويا ؟؟
- اسد امك عايشة

كام يبجي وميعرف شيحجي وجمانة همين تبجي وساري كلش فرحلة بس رهبة اللحظة مو طبيعية ومجنت اعرف هو هلكد يحبها وحقة ابن امة وابو وهمة بوفاة اقرب الناس الة

وصلنا الدار واحس ما بي حيل يمشي من الخوف والتوتر والفرح
كلنا نرجف فتنا للدار وجانت كاعدة وحدها بالحديقة اسد مصدك عيونة واللي شافة حقيقة وتاكد من كلامي طارلها ركض ويصيح امي

كلنا بجينا موقف ما نتمناه لاي احد رحنا وراه وشفناهة ممصدكة عيونها تريد تحجي وتبجي و هو يبوس بيدها ورجلها ويحضنها ويكللها والله عبالي ميتة والله هو كالي ميتة
حضنتها جمانة وبوستها والمسنين الموجودين واهل الدار التمو يمنا ويبجون
جانت لقطة من مسلسل كأنما عايشة بمشهد تمثيلي بس هو هذا الواقع

اباوع لوجوه المسنين قريت بعيونهم ودموعهم رغبة انه اولادهم يحنون عليهم ويرجعوهم لحضنهم و اشتياق الهم
قريت خذلان اولادهم وبناتهم الهم واحس بجيهم جان بجي حسرة والم وفقدان وحنين وغضب وسخط ورضا بنفس الوقت

اكيد هي معرفتني بسبب اللي صارلي تقربت منها ونزلت يم رجليها كرفصت وبست ايدها
- يوم عرفتيني
- من ريحتج عرفتج انت الغالية بنيتي بلسم
- اسفة لان تركتج ورحت
- سودة علية يمة ليش هيج صايرلج
- يوم عوفج مني وسامحي اسد جان كل ذيج الفترة عبالة انت متوفية مجان يعرف بيج عايشة من نطلع منا راح نحجيلج كل شي
- يا يمة الله يرضى عليكم دنيا واخرة

دنحجي واجة لاسد اتصال بس محجة ولا كلمة بس صاح صادق وركض ركضنة وراه وبقت جمانة وخالة بالدار واني وساري رحنا وياه

- لك اسد انتظر
- ساري اخويا مسوي حادث
صادق ديموت
- اهدى هسة نروحلة
يلة ساري بسرعة
- والحجية شلون
- جمانة يمها يلة بسرعة

رحنا للمستشفى والظاهر الوضع خطر اللي اتصل بأسد كالة انت اخر رقم دك علي ودكينالك منة
الدكاترة طولو
جمانة دكت لساري وفهمها على الصار
نص ساعة هيج واجتي هي وخالة

- أسد وين اخوك يمة
- خالة طولي بالج بعدهم بالعمليات وياه ادعيلة
- يا يمة يا وليدي صااادق
- خاااالة

وكعت خالة واخذها ساري ديسعفها لان اسد منهار تماما ولا يكدر يحجي ولا يتحرك احسة بعدة مصدوم من كل الصار وياه اني وامة واخو الله يعينة جمانة راحت وياهم وبقيت لوحدي ويا اسد

- اسد
- ها
- انت زين
- ...
- اسد باوع علية
اخوك حيطيب ويرجعلكم وامك هنا يمكم
لا تسوي هيج اصحى وقوي نفسك هم بحاجتك
- بلسم اخويا حيموت
امي مميتة
- لا تبجي امك هنا يمك صدكني واخوك حيعيش هسة يطلعون يطمنوك عنة
- حيموت
حيموت

عرفت بي انصدم صدمة قوية وضربتة راشدي لان جان يبجي بهستيرية ويردد نفس الكلمات
من ضربتة انتبه علية وبقى صافن بعيني والدموع ينزلون من عينة بلحظة حضني وكام يبجي اقوى ما اعرف شحسيت من حضني كأنو ديلجألي حتى اخلصة من هاللحظة
صحت ع الممرضة حتى تنطيني ابرة مهدئة واستغربت من طلبي كتلها اني ممرضة بسرعة اتحررركي
راحت جابت الابرة وبعدة هو يصيح ويشهك بجي ضربتة و خدر تقريبا راح يبلش ينام كومتة والممرضة ساعدتني وياية وخليناه بالغرفة رأسا نام غطيتة وبقيت يمة مجلب بيدي واني هم مهديتها ابد

يمكن هاي اللحظة مو وكتها ولا حتى الشعور مناسب بس حسيت بشي محاستة قبل يشبه الحب حتى ما حسيتة ويا عادل يمكن حنية مو حب ما اعرف بالضبط بس احسة يخصني وتابع الي ومسؤول مني

رحت اشوف الوضع وجان الدكتور طالع توة حجالنة عن الاصابة و المصيبة انه خطرة وفقد القدرة على الحركة يعني صادق انشل هذا اللي اكدة الدكتور النا

كعد اسد وراح حجة ويا الطبيب ورجع منهار اكثر من اول وراح لامة حاول يفهمها وظلو يبجون اثنينهم بعدين ساري كالة مو زين عليها ضغطها معلك عوفها ولا تاذيها اكثر

اما جمانة ما عدها اي ردة فعل كل بجيها جان على اسد وخالة بس صادق ما اعتقد هي سامحتة ولا احسها تحن الة او هامها موضوعة كلش الله اعلم يمكن تحليلي صح ويمكن غلط ...

بعد يومين من الانتظار صحى صادق ونقلو لغرفة ثانية بعد الفحص الاولي تأكدنا من كلام الدكتور وفعلا ميكدر يمشي ولا يتحرك لان الشلل رباعي بس ممكن يتعالج لكن فترة العلاج تطول وحسب حالتة النفسية
فاتت امة علي ومجان مصدك انه شافها بس يبجي وميكدر يتحرك ولا يحس بحضنها وامة تبجي على حالة واسد يمهم
كأنو اتذكر اللي سواه صادق بجمانة وامة وبي كام يلومة ...