العجوز والقبيحة

9

#العجوز_والقبيحة9
Shahd Alsalman
ثاني يوم كعدت من النوم كلت انظف لان ورايا دوام باجر و خفر
جانت خالة نايمة وخليتها على راحتها بلشت بغرفتي وكملتها وطلعت للصالة وراها الحمام كعدت خالة وصبحت علية كالت حسوي ريوك لان كتلها حنظف الغرفة وخلصتها بس انتبهت انه هي ما عدها هدوم غير بس اللي عليها وقطعة وحدة يعني راح عن بالي هي تحتاج ملابس
كملت تنظيف وكلت من اخلص ريوك انظف المطبخ او بالليل وكعدنا تريكنا اكلت بسرعة ونظفت المطبخ وطبيت بدلت وردت اطلع سالت خالة اذا محتاجة شي كالت سلامتج ورحت للسوك اتسوكت كم شغلة وغذائية و منظفات ورجعت فتت للشقة شميت ريحة طبخ تجنن جانت الحجية دتطبخ الغدا

- السلام عليكم
- عليكم السلام هلا بنيتي
- هلا بيج يوم شنو هالريحة التجنن
- ها لازم جعتي
- اي والله خالة المسواك وفرة السوك تجوع وانت طبخج يخبل
- ههههه فدوة لعينج روحي بدلي حتى اصب الغدا
- لا قبل الغدا بيها مجال تجين للغرفة
- خير يمة
- خير خير بس تعالي

اجتي وراية للغرفة وانطيتها علاكة بيها ملابس جديدة وغيارات وشال يعني هاللي لحكت اجيبة

- بدلي خالة وكدريهم حتى اذا مو على كدج ارجعهم او اجيب قياس اني جبتها على تقدير شوفي بعد ما اعرف

عفتها وطلعت دا انتظر بس طولت دكيت الباب مجاوبتني رحت طفيت الجدر ورجعتلها
فتحت الباب كلت خاف صار شي شفتها كاعدة ولازمة العلاكة وتبجي بصوت مخنوك مدنجة راسها
كعدت يم رجليها دا اشوف شبيها
- خالة حبيبتي شبيج ليش تبجين شصاير ؟؟؟
- ....
- عليج الله شنو الصار ليش هيج مقهورة
- ماكو شي
- زين بس اهدي لا تبجين ليش ضجتي معقولة ضوجتج اني بشي
- لا يمة بالعكس بس ...
- بس شنو والله دتقهريني بالبجي مالتج
- ليش هيج دتسوين وياية اني ولدي شامريني وانت حايرة بية تاليتي هيج
- ليش خالة شبيها تاليتج واني شمسويتلج حتى حايرة بيج
- كل هذا يا يمةوتكليلي ممسوية شي مكعدتني عندج و موكلتني و...
- خالة لا تكملين انت مثل امي واني اشوفها بيج محرومة من امي وانت معوضتني عنها بعدين والله ما جنت اقصد اضوجج بهذا التصرف بس ادري بيج متكدرين تطلعين ومريت هيج من يم محل وشفتهم واتذكرتج
- الله يوفقج دنيا واخرة بس ما اكدر اخذهم يمة كافي السويتي والله
- يعني دتكليلي ازعلي مني
- لا والله ميهون زعلج
- يمة افهميني الله يخليج اني دا اسوي هالشي من دافع الحب مو من باب الصدقة لو العطف افهميني مو كتلج محرومة من اهلي وانت عوضني الله بيج جنت راح اتخبل لوحدي واجيتيني من السما

كمت ابجي اني هم اتذكرت امي من جنت اجيبلها شي جانت تكلي ضمي فلوسهم الج ولا تجيبيلي شي حيل اشتاقيتلهم وعلواه يبرد كلبي بخبر منهم
عفتها ورحت لغرفتي بقيت ابجي دكت هي الباب وفاتت لكيتها لابسة الملابس وجانت على قياسها من شفتها كمت بستها من راسها وحضنتها

الحمدلله اللي بدت تفهم هذا مو عطف اني كلش حابة وجودها وياية واريدها تبقى يمي
كدرت بقية الملابس و جانت على كدها
تغدينا وراها نمنا شوية والعصر كملنا سوالف
وطلبت منها تحجيلي بقية القصة

- خالة أسد وين هسة وليش عايفج وحدج
- اسد هج من سوالف اخو ومرتة مجان يرضى على تصرفاتها تطب وتطلع براحتها محد لازم يحاسبها ولا يحجي شي ولا حتى رجلها لان بس يحجي تتزعل وتضوج منة وتسوي سالفة
- هاي شنو من مرة
- الله يهديها بس سبب روحتة لأسد وطلعتة للخارج جان من وراها هي ومناك كال راح اكمل دراسة احسن
- شون من وراها ؟
- كالتلة لصادق لو اني لو هو بالبيت هو عوينجي واني مماخذة راحتي ودقيقة ما ابقى اذا هو يبقى
وسوت مشكلة شكبرها شكدها
من سمع اسد بالسالفة كاللها لوما عندج شي تضمينة مجان خفتي مني وتذبين علية حجي وهسة تخيرين اخويا بيني وبينج
- اي وشكال صادق
- كال انت صدك مو مال احترام و تريد تغثها كوة وكل هاي من تعلوم امي الك
من صار الوضع تعبان وحتى بس يخلي اخوه مرتاح عاف العراق باللي بي و هج كال رايح اكمل دراسة
- هاي شون نفسية عليها
- صوج ابني يوم مو صوجها
العتب ع الخيال
- ايي والله