العجوز والقبيحة

23

#العجوز_والقبيحة23
Shahd Alsalman
فتحت عيوني واني بمكان ما اعرف وين او شنو هو مليان عساكر وجنود وناس لابسة لبس الاطباء حسيت نفسي لافين راسي ووجهي انتبهت لايدي هم ملفوفة احاول احرك نفسي بس ما بية حيل رجعت نمت
وبعدها انتبهت على صوت شخص فوك راسي يفتح بعيني ويخلي بيها ضوة ديفحصني يحجي وياية بس صوتة مو واضح او اني مدا اسمعة ما ادري اكو صوت وشة باذني
تذكرت اخر شي صار ..

جنت مغمضة عيوني واسمع صوت الاطلاقات والمواجهة اللي دتصير وفجأة سكتو الطرفين اجوي فتحو باب السيارة وحررونا سحبوني منها اني والبنات وفتحو عيوني شفت الدواعش متمددين ع الكاع و متصوبين واكو جنود عراقيين همين متصوبين وجماعتهم ديشيلوهم
بعدنا تونا دنمشي محسيت الا انشمرت بعصف هوا وصوت انفجار مو طبيعي شي مخيف وموقف ما ينوصف ابد باوعت لاخر مرة ع السما ومحسيت بشي
وعرفت انه اني بالطبابة العسكرية الخاصة بالجنود العراقيين وهذا معناه اني تحررت والحمدلله بعد ما جنت اسيرة 
وسالت ع البنات كالو ماتو بنفس اللحظة اصابتهم اخطر وسبب الانفجار جان قذيفة من الدواعش
متت قهر شابات بعمر الورد راحو وشباب الله يرحمهم ويصبر اهلهم

بقى وجهي ملفوف وايدي لحد كم يوم وسالوني ليش اني اتأسرت وشنو اللي شفتة يعني تحقيق بخصوص اللي صار عبالهم شفت شي بس حجيتلهم كل شي وويا كل الصار اني ما كدرت احصل اي معلومة عن اهلي ..

كالولي اتحضر لان حيرجعوني واني هم بعد ما  اكدر ابقى هنا ماكو امل والظاهر اهلي راحو بالرجلين رجعت وياهم احس بخيبة امل
احس روحي كبرت فد 50 سنة فوك عمري شفت الويل و عشت اتعس ايام حياتي المشاكل العشتها لا شيء مقابل هالكم يوم فعلا الحمدلله على كل حال ..

وصلنا لبغداد جنت صاعدة بلوري حمل ينقل الجنود بس ما عندي اي شي لا فلوس ولا جنطتي خسرت كل شي والظاهر واحد من الجنود حس علية اخذني على صفحة و انطاني فلوس خجلت اخذها منة كالي اعتبريها من اخوج ومخلاني حتة احجي اتشكرتة وراح ودعيت الله يحفظة لاهلة

اخذت تكسي وبوجهي لبيت نادين فتحت امها الباب واخترعت معرفتني اصلا لحد ما كتلها اني بلسم اجتي نادين شافتني كالت لازم اوديج مستشفى
رحنا للمستشفى الجنت اشتغل بيها
فتحو الضماد عن وجهي ونظفو الجرح مرة ثانية طبعا من نظرات نادين ودموعها عرفت اني تشوهت وسالتها بس مجاوبت ظلت تراوغ بالجواب
بس كدرت اشوف ايدية جانت مجرحة كلش ومتاذية ..
رجعت للبيت وياها واحس بتعب نمت للصبح جريتها كعدتني نادين حتى ناكل ونتريك سوة مجنت اشتهي بس جبرتني علمود الدوة وعلاجي

- نادين شحسوي اني هسة
- بشنو حبيبتي
- شكول لساري ولوداد لا لكيت اهلنا ولا حصلت شي جمالة ساري ميعرف اني اتطلكت
- حبيبي بلسم يعني احمدي الله واشكري عدت هالازمة سلامات الحمدلله مصارلج شي
- الحمدلله بس شحكوللهم
- كولليهم ع الصار وخلص
هاج هذا تلفون واتصلي بساري شوفي وينة خل يجيج لهنا
- ماشي

فتحت الفيس مالتي ودكيت على ساري وكلي حيرة والم لان شنو اكول مراح يتقبل مني الحجي اكيد

- الو بلسم حبيبتي
- حبيبي ساري شونك
- وين انت والله متت خوف عليج
- ساري اني ببغداد
- رجعتي؟
-اي
- شلونهم اهلي اجو وياج
- تعال ونحجي عود
- بلسم بيج شي صوتج مو عاجبني
- ما بية حبيبي لا يظل بالك تعبانة من السفر يلا هسة ادزلك العنوان وتجيني
- يا عنوان اندل بيتج ترة هههههه
- لا متندلة يلة انتظرك هسة ادزلكياه
- اوكي يلة مسافة الطريق وجايج

دزيتلة عنوان بيت نادين وكلبي يدك الف دكة بالدقيقة حشوف اخويا بس بيا حال وبيا اخبار دعيت الله يكون وياية ويساعدني بهاي الشدة
ما عندي غيرة

وصل ساري اول مفات وشافني بهاي الحالة بقى ساكت وصافن وما متخيل حيشوفني هيج ركضت حضنتة و بجيت وهو يبجي وحضني حيل
سلم على ام نادين ونادين وفتنا جوة بالهول كعدنا وحجيتلة كل شي مجنت متوقعة حيتقبل كل السويتة وشون ضميت عليهم وشكد كذبت حتى في سبيل لا يتاذون هم وحجيتلة على وضعي والصار وياية هناك الاسر والاصابة وشون اخذو مني فلوسي وكل شي
مشفتة الا لزم ايدي وباسها حضني مرة لوخ ويبجي بحركة فطر كلبي

- ليش بلسم تحملتي كل هذا وحدج علمود شنو ليش مكتيلي
- حبيبي شكلك اذا كتلك انت راح تجي لهنا وراح تخسر مستقبلك وتخسر دراستك
- بس بقيتي لوحدج وتحملتي لوحدج وشلتي هم لوحدج وفوكاها رحتي وتصوبتي
- الحمدلله على كل حال اني اللي قاهرني انه معرفت شي عن اهلنا وما كدرت احصل اي خبر عنهم
- عادل وين شصارلة
- ساري اني ..
- انت شنو ؟
- اني رحت لوحدي عادل مو وياية
- شنوووو ؟؟؟ جذبتي علية حتى بهاي علمود اقبل تروحين مو؟
- اي وبنفس الوقت اني ما اكدر اروح وياه
- ليش ؟
- احنا تطلكنا من  سنتين وشوية
- شدتحجين صدك يعني ؟
- والله هذا الصار
- ليش شنو السبب

حجيتلة قصة طلاكي منة وشون صارت حسيت الدم يريد يطلع من عيونة من كدما صار عصبي وضاج وحقة ما الومة بس اني السويتة جان علمودة هو ووداد ما جانت الي نية ثانية غير اطمنهم لحد ما يرجعولي بالسلامة ..