العجوز والقبيحة

4

#العجوز_والقبيحة4
Shahd Alsalman
اعرف من حقها تسالني وتعرف كل شي ما قصرت وياية اخذتني للمستشفى وبعدها استقبلتني ببيتها وبدون متخاف مني على نفسها او على غراضها وبيتها
ساعدتني بدون متعرف مشكلتي كل يوم ادعيلها براحة البال ويبعد عنها اولاد الحرام على كد الطيبة الشايلتها
هي ممرضة وتستحق لقب ملاك رحمة الرحمة اللي شفتها بيها وما شفتها بأبني والله اعلم يمكن الثاني هم يسوي نفس الشي
اني مرة جبيرة وشفت اشكال الوان ومرت علية ظروف صعبة بس اصعب من عقوق ابني الي ما شفت

يكولون الدنيا دوارة بس شو دارت علية واني ممسوية شي ولا فد يوم رفعت صوتي بوجه امي لو عصيت ابويا بشي ما اتذكر احد منهم كال عني مو خوش بنية او ممترباية او شكى مني بس سبحان الله يمكن هذا ابتلاء من رب العالمين يختبر بي صبري وايماني و قوة تسامحي كأم ..

نمت بعد ما اخذت العلاج و من كعدت جانت بلسم دتشتغل بالحاسبة بس اني ما افتهم شنو تسوي هاي شغلات جديدة دخلت علينا و لو شكد ما احاول اتعلم مراح اعرفلها
سلمت عليها وكعدت وانتبهت على النفاضة هم راجعة مدخنة بس محجيت ولا كتلها الظاهر هي متعودة عليها و الحجي ميجيب نتيجة
خلصت شغلها ع الحاسبة وكامت تجيب جاي و كعك

تذكرت المرحوم والعصريات من نكعد سوة ونسولف
ونتعلل لحد ما تصير صلاة المغرب ونصلي سوة الف رحمة على روحك الطاهرة
هي كل الوقت ساكتة ومتحجي شي ما اعرف شنو يدور ببالها بس كلت احجيلها الصار وياية
وهي هم طلبت مني اسولفلها قصة حياتي بالكامل

- خالة حبيبتي اريد اعرف كل شي عنج من اول ما تزوجتي لحد هاللحظة
- يايمة انت مناقصة دوخة راس
- لو ادوخ ما اطلب منج اني محتاجة اعرف ومحتاجة اسمعج لا ترديني
- ان شاء الله بس اني هم اريد منج شي
- كولي خالة
- اعرف متكدرين تعوفين الجكاير بس قللي منها لحد متكطعيها
- راح احاول اوعدج
- الله يعينج على تركها
- يلة خالة كليلي
- ايي يا يمة
شوفي اني اسمي سحر مواليد 53 عندي اخ واحد وتوفى من سنين حتى ما لحك يتزوج واخت متزوجة وعايشة باربيل
اني الصغيرة والمدللة عند ابويا من كبرت شوية وعودي فار جانو قبل القسمة اذا زينة وخوش رجال ينطون بناتهم واجتني القسمة وصارت والحمدلله جان خوش رجال الله يرحمة وحبني وداراني هواية واني هم مقصرت وياه
- الله يرحمة يا رب
- ويرحم موتاج بنيتي
عشنا ع الحلوة والمرة مثل ميكولون وما فد يوم شكيت من حالنا دائما احمد الله واشكرة صار شوية عندي تأخير بالحمل سنتين يالا ومن بعد ما ولدت صادق  اشتغل ابو صادق بمصلحة كامت تدر علينا خير من الله فلوس وارتاحينا ماديا واشترينا بيت وسيارة فضل علينا رب العالمين
- اي خالة
- صار عندي حمل مرة ثانية وجان شوية صعب اتزحلكت ووكعت ووكع الطفل بشهر الثالث اني وابو صادق جنا نكول الحمدلله بس اثنيناتنا نحب الخلفة والجهال وعلى كولتة الاولاد عزوة يقصد اولاد وبنات وبعد فترة صار عدنا ولد لاخ وهو سماه اسد
- اي
- بعد أسد ما كدرت احمل كالتلي الدكتورة رحمج ضعيف وميتحمل واكتفينا بهالولدين وكلنا كون الله يطرح بيهم البركة ونفرح بيهم ويعينونا على كبرتنا ربيناهم احسن تربية ما قصرنا وياهم بشي الله وكيلج يا يمة اللكمة نكطعها من حلكنا ننطيها الهم
شيشتهون يحضرلهم بذاك الوكت جان حصار وابوهم ينكللهم بالشغلات والفواكه
- اي صدك خالة جان كل شي ممنوع
- اي يمة مو جانت ازمة وحصار وتدرين بعد اغلب الناس على راتب قليل تعيش و يا دوب مكفية نفسها بس شنو جان البال صافي والنفس راضية و الطيبة مالية كلوبنا ومثل ميكولون الفلوس تغير النفوس
- اي صدكتي يوم
- دخلناهم مدراس وتعلمو احسن تعليم جانو شطار اثنينهم خاصة اسد ولحد هسة هو شاطر وذكي ويحب الدراسة
- اي
- كل يوم اشوفهم كبالي يكبرون ويتغير شكلهم تصغر عليهم هدومهم واشتريلهم هدوم بقياس اكبر وافرح لان الله رزقني بيهم وخلاني اعيش احساس الامومة
اراقب تصرفاتهم كل واحد بيهم عندة شي مميز وعندة عيب
مجانو يتوالمون بس اسد دائما جان يحاول يراضي اخو ويداري ويحبة عندة حنية اكثر من صادق  ..