العجوز والقبيحة

10

#العجوز_والقبيحة10
Shahd Alsalman
- زين خالة من طلع اسد شون تعاملج او شون تكضون اليوم انت وهي
- هي تنام النهار كلة اني الحك اكعد واريك صادق وانظف واسوي الغدا وهي عود ويا الاذان تكعد وتبدل هدومها وتطلع حتى ابنها مو يمة هي تعوفة متدري بي اكل شرب نام اتمرض
- وين دتروح كل يوم
- ما اعرف والله يمة هي تطلع وقبل جية صادق ترجع وتبدل وتمسح مكياجها ولا جنها طالعة بعدين اكتشفت انه صادق ميدري بطلعاتها
- شون ؟
- مرة من المرات اجة هو وجانت هي توها فايتة للبيت يعني حتى ما لحكت تبدل اجة سالني عنها

- ها يوم شونج
- هلا امي الحمدلله وانت شونك
- الحمدلله وين كوثر
- فوك هسة جتي من برة
- شنو من برة
- طالعة غير جانت
- طالعة !!
دنحجي احنا وجتي هي لابسة فستان  ومكياجها وشعرها
- حبيبي شوكت اجيت
- وين جنتي
- بالغرفة فوك
- لا وين جنتي قبل الغرفة
- هنا جوة نظفت وخالة سوت الغدا وسبحت وهسة نزلت
- يعني مجنتي طالعة
- هههههه حبيبي يعني اذا تمكيجت ولبست معناها طالعة بس هيج دا اغير شوية
- يمة لعد ليش تكولين طالعة
سكتت ما اعرف شجاوبة لان هي تجذب عيني عينك رجعت هي صاحت
- الله اكبر ليش هيج خالة مصار ساعة من جنت يمج ونظفنا ليش دتسوين هيج بية
- يوم تالي وياج الله يخليج يعني الا تسوين مشكلة
- الصوج منك انت صدكتها مو منها يعني فوك تعبي تتبلى علية
سوت نفسها تبجي وتشهك وعافتنا وصعدت وهو خزرني بنظرة راح وصعدلها

اسمع صياحها وعياطها وبجيها ما انقهرت الا على ابني اللي مصدكها وواثق بيها واتذكرت اسد من جان يكول لوما عدها شي ما تسوي كل هذا بعدين استغفرت ربي  كلت هذا عرض وشرف ما يصير احجي هيج يجوز طالعة لسوك لصديقتها الله اعلم

وراها نزل صادق يعيط علية ويكلي انت تريدين تخربين بيني وبينها وتريدين اشك بمرتي تاج راسكم هي وظل يسب ويكفر ويصيح
هزيت راسي و الدمعة خانكتني ابن بطني و بجري هيج يسوي بية و يرفع صوتة علية من ورة مرة هيج هنت علي يقلل من قدري كدامها

- حسبي الله ونعم الوكيل زين خالة هو معقولة ميحس بيها شكد خبيثة
- شون يحس هي تمثل علي وماكلتة وشاربتة بالحجي واني شكول شسوي هو ماكو ما يسمع
هو اخذ الدرب الاعوج واصدقاء السوء لعبو بعقلة لان نفسة ضعيفة والصاحب ساحب مثل ميكولون يا يمة
المهم ما اطولها عليج اتكوت علية و صارت تتجاوز وتغلط
- يا ادبسز وصادق يدري وساكت ؟؟
- لا بوجودة تصير حبابة وماكو منها وخالة شتريدين وكولي و من هالحجي هو يطلع تنكلب 180 درجة بعد اني حتى لو كلت لصادق ميصدكني
- زين اسد متحجيلة شي
- لا يمة هو بغربة وديدرس وما اريد اسوي حزازية بين الاخوة اذا درة مراح يقبل علية ويرجع وتصير مشاكل
- زين وبعدين
- بقى الوضع هيج كل يوم تطلع وتطب بسكوت وعلاليك بيدها ما اعرف شنو تتسوك ما اشوف شنو ببطنها بس اسكت
تخلي عندي الطفل او بالاحرى تعوفة وتروح بلا متحجي وهذا يطك بجي بس يعني سبحان الله و لا عندي محنة على الجاهل وحتى هو عبالك معلمتة القساوة مدري ليش
حاولت احجي وياها بالهداوة وبالحسنى بس ماكو فايدة هي هي متتغير
اجتي فترات متلفي بالبيت اصلا لان صادق يسافر بحكم شغلة ومن يرجع هي ترجع قبل لا يجي ومن اسالها تكلي معليج لا تتدخلين وابنها مرات تاخذة مرات لا
واذا تكعد ومتطلع من البيت تلعب بية لعب لو تطش الدوة بسلة الزبل وما عندي لا احد ادزة ولا بية حيل اروح اشتري
جانت جيرانة ادز بنتهم مرتين والثالثة سوتلها مشكلة وطردتها حتى لا تجيني بعد

الاكل اني تدرين بية صاحبة ضغط مو مال مالح فأسوي اكل الي وحد والهم وحد تجي وتحط ملح بأكلي تكلي حتى شوية نكهة وتضحك اني هم اتعب شسوي اكعد اكل فواكه لو شوف شنو اكو وهاهية
- شنو ما عدها اهل هاي متخاف الله
- هو احنا نعرف شي عنها بس الاعرفة اهلها بغير محافظة
صار عدها طفل ثاني وحملت صادق طار من الفرح واني افرح لفرحتة مو بيدي ام
- والله مع احترامي خالة بس ميستاهل
- مو بيدي يمة من يصير عندج ضنا تعرفين شدا احجي
- هيج ضنا ما اريدة والله
المهم كملي واعذريني لان دا انفعل اني
- فد يوم كال صادق راح اسافر يومين بالضبط بعد موضوع الحمل ب 5 ايام هيج صار عندة شغل
سافر وراح هي مثل عادتها طلعت بس هالمرة مباتت برة اجتي وشون عبالك المكتولة كتلها يمة شبيج خير مجاوبتني وصعدت
صعدت وراها ادك الباب متفتح اخر شي عاطت ولي منا وعوفيني
- كون اكص لسانها
- نزلت اني هم شريد اسوي انفتحت الباب كمت اشوف منو طلع صادق كتلة ها يمة شو جيت هلا بيك كالي خلصنا شغل بعد كلت ارجع
اخذ جنطتة وصعد ماكو دقايق و اسمعة يصيح يمة والحكيلي اريد اصعدلة رجلي بعد متشيلني فتت لكيتها غركانة بدمها وتنزف
شالها وداها مستشفى صاير عدها اسقاط ونزيف
بس الدكتورة كالت احد معتدي عليها بالضرب او دافعها او وواكعة من مكان لان هيج مبين
كتلها مصاير شي ومحد متقرب عليها ورجلها مسافر
-  وبعدين
- رجعنا للبيت هي باتت هناك ثاني يوم طلعناها بعد هيج كم ساعة نزل صادق وجهة ميتفسر وصياحة وعياطة بس اريد افتهم منة الصاير ...