العجوز والقبيحة

21

#العجوز_والقبيحة21
Shahd Alsalman
اباوع لساري القلق ذابحة وحقة ما الومة
- ساري خويي
- نعم
- و بعدين وياك التسوي هذا ميقدم ولا يأخر
- أسد خويا ما اعرف شي عنها ولا عن اهلي زين هسة حيصير قريب الشهر وشوية وهي مختفية اني شسوي كاعد هنا وحاير بنفسي ومستقبلي وعايف اختي واهلي
- هي مو لوحدها واكيد زوجها وياها وبعدين لا تنسى اهلك هم هناك وهي من راحت مو كالتلك الطريق صعب ولا يظل بالك
- اي كالت بس ..
- لا بس ولا شي لا تظل توهس خلي الله يحفظهم لا تفاول عليهم
- ونعم بالله
زين انت شتكول اروح لهناك يمهم مو احسن ؟
- بلة انت هسة رحت واني وياك طبعا مراح اعوفك بس اختك الثانية شلون ؟
اقلها انت تكعد تحجي وياها تطمنها هي هم بغربة وحتحس بقلق بعد اكثر
- وداد اكلت كلبي كل ما تدك تكلي حلمت باختي بيها شي شسويلها اني ؟
- هاي من خوفكم لا اكثر ولا اقل استهدي بالرحمن و صلي ع النبي لازم تصير قوي لخاطرها
- عليه الصلاة والسلام
- يلة خويا كوم نلحك للدائرة قبل لا تصير سرة وهوسة والله يهدي بالك ان شاء الله
- ان شاء الله الله يسمع منك

طلعنا حتى دنكمل بقية اجراءاتنا والمفروض اليوم اخر يوم والحمدلله شوية ساري التهى احس القلق حيكتلة الله يكون بعونة دنستلم اخر شي وشفت جمانة كاعدة

- جمانة !
- اسد! شلونك ؟
- هلا بيج خيتي شلونج اخبارج
- الحمدلله انت شلونك خالة عمو ان شاء الله بخير
- والله اثنينهم انطوج عمرهم
- لااا صدك ؟؟

كامت تبجي عبالك كتلها اهلج ماتو شكد بنت اوادم واصيلة

- الحمدلله على كل حال طولي بالج
- البقية بحياتك مجنت اعرف والله وصدمتني بهالخبر
- شنسوي بعد كلنا لهذا الطريق
- الله يرحمهم يا رب
- ويرحم موتاج
دتشتغلين هنا ؟
- اي صار سنة وشوية
تفضل اسفة تفضل استريح
- مشكورة خيتي بس عندي معاملة اني وصديقي ساري ودنخلصها شفتج وكلت اسلم عليج
- هلا بيكم شعدكم كول

شوفتها وكالت اكعدو هنا اني هسة اخلصها الكم طلبتلنا كهوة ضيافة
وصدك ما طولت 10 دقايق وجابتها متوقعة وكملانة حتى مستنسختلنا اوراقنا

- تفضل
- عاشت ايدج والله تعبناج
- بالعكس تعبكم راحة هلا بيكم وشتحتاجون اني موجودة وان شاء الله اكدر اساعدكم
- متقصرين يا اصيلة
- شكرا الج
- العفو هلا بيكم
- يلة عيني عطلناج عن شغلج نترخص وسلامي للاهل
- يوصل الله وياكم

طلعنا من يمها الحمدلله سهلت امرنا من فضل الله وكملنا كل شي باقي بس الدوام

- شكد حبابة هاي البنية
- هي هاي مرت صادق اخويا جانت
- صدك تحجي هاي جمانة ؟
- اي تخيل
- بس والله مبينة بت اوادم شون هيج اخوك طلكها
- بعد هيج قسمتهم شسويلة ما الة بالطيب نصيب
- الله يستر عليها ويوفقها
- امين
بشرفك ساري خل نروح ناكل كباب والله مشتهي
- والله اني اكول نشوي كيلو ونجيب مقبلات وبراحتنا ناكل بالبيت شكلت
- هذا هو صايرين ضلعي يلة

بقت ببالي جمانة بنية مرتبة ونازكة وبت اوادم محتشمة كلش واسلوبها وبجيها على اهل زوجها القديم يدل على انه هي بنت اصل وما نكرت العشرة ابد
شفت كسرة بعيونها وحزن لان من قبل لا يحجي وياها اسد جنت منتبه عليها مدنجة وتكتب بس احسها شاردة بشي وصافنة
من كعدنا يمها على الميز و راحت دتكمللنا الفايلات والتواقيع

انتبهت على قصاصات واوراق بيها هواية شخابيط ودواير ورسمات كئيبة كلش ومعرفت ليش هيج  راسمة بس من عرفت هي نفسها جمانة مرت اخو او طليقة اخو اسد ربطت بالاحداث
الظاهر بعدها ما اتخطت الازمة اللي مرت بيها لان اسد سولفلي كل شي عنهم بس بالاول ما عرفت منو جمانة من سلم عليها عبالي اقاربهم او وحدة معارفهم يعني متخيلت تكون هي وملحكت اسألة منو تكون هالبنية ..

الظاهر ساري بعدة يفكر بأختة ووضعها لان ياكل بس صافن بغير عالم وللامانة اني مأيس من موضوعها بس احاول اصبرة واعرف مراح ترجع بس اكول الله موجود لان وضع الموصل تعبان بشكل وما ادري اذا راح ترجع مثل قبل او تتحرر من ايدين الدواعش او لا .. 

كمنا نداوم اني و ساري بنفس المستشفى والحمدلله دوامنا كلش ماشي و كلها تحبنا واحنا متعاونين كلش وياهم لحد ما اجة عرض مغري لساري انه يشتغل بمستشفى خاص براتب قوي وشجعتة انه يقبل وهو همين قبل وتسهلت امورة بعد ما بلش شغل وياهم جان شغلهم حلو بالمستشفى ومرتبط باكثر من مكان يعني مثلا يسوون جولات على دور الايتام او دور المسنين او الفقراء جانت هاي الشغلات كلها بصالح سمعة المستشفى تمنيت اشتغل وياهم بس اختصاصي مجان مطلوب للاكتفاء بالعدد اللي عدهم ..