العجوز والقبيحة

15

#العجوز_والقبيحة15
Shahd Alsalman
- جان يضوج يجي للبيت او يسولف وملتهي دائما بالتلفون وميعجبة اي شي البسة او شعري او يبقى يصنف ويستهزأ بشكلي
- ليش انت شبيج يمة شو حلوة وروحج بعد احلى
- بس اني مو مثلها شفتيها شون جانت واكفة وياه وشلابسة و شمخلية مكياج يعني مهتمة بنفسها كلش وجان بالاول ميقبل اداوم من طلع تعييني وتغير علية خلاني اشتغل وقبل بسرعة
من داومت بعد ما الحك اسوي كل هي التسوي اني مثل متشوفين على كد حالي وبساطتي اليشوفني عبالك طالبة اعدادية يا دوب اسوي حواجبي وانظف وجهي وكحل وحمرة خفيفة وخلص ما اكثر ولبسي بعد انت حفظتي ما بي شي متكلف
- بس والله يمة انت حلوة لا تخلين كلامة يهز ثقتج بنفسج اللي ضيعة من ايدة هواية وهو ميستاهلج اصلا
- ما انكر اتأثرت بكلامة تدرين اني لليوم اخجل اباوع للمراية لان على كولتة ما احس بيج مرة
- خل يولي عديم الذوق
- الرجال يحب هيج شغلات ويحب وحدة كلش مهتمة بنفسها و من حقة اني جنت افكر شون الم الفلس وشون ابني بيتي واطبخ واحاول اوفق بين شغلي وبين رجلي بس ما شفت منة اي تقدير
ولا يعجبة شي وادري هو ببالة وبنفسة ديقارن بيني وبين وحدة
اشك بيها بس ممتأكدة هي او لا
- اي ؟
- بيوم جنت بالدوام و احس بتعب كلش سهرانة يومين ومنايمة وقبلها جنا متعاركين اني وهو كلش احس بضغط علية مو طبيعي و خايفة على اهلي جانت الاوضاع توها باولها والقلق ذبحني عليهم
نادين صديقتي بالشغل هم ممرضة كالتلي ارجعي ارتاحي واني مكانج ما عندي شي استأذنت من المدير وطلعت
رجعت للبيت فتحت الباب واسمع اصوات مشيت على كيفي و ...
- جايب وحدة ؟؟
- جان باب الغرفة مفتوح شوي شفتة هو وياها نايمين وهو متلهف عليها ما ادري بساعتها شنو خطر ببالي حبنا اللي ضيعة لو اروح و ما ارجع ابد لو اتطلك لو ليش هو هيج ذايب ومندمج وياها واني لا
لو ليش هيج خان دقيقة هي بس كل الافكار اجتي ببالي
جان الشي اللي اشوفة كأنما مقطع من فلم البطل يخون بي مرتة على فراشهم و ببيتهم
- الله لا ينطيك على هالدكة زين انت شسويتي ؟
- مسويت شي طلعت تلفوني و صورتهم وطلعت من البيت ما اعرف وين اروح خابرت امي احتاجيت حضنها حجيت وياها وبجيت هي حسها كلبها اكو شي بس كتلها مشتاقتلكم وخلص
وراها خابرت نادين وكتلها عادي اجي يمج بس اليوم كالت هلا بيج روحي للبيت امي هناك واني اكمل شغل العصر واجي
- نادين تعرف بشي؟
- اي جنت احجيلها هي صديقتي ولحد هسة ساعدتني هواية ووكفت وياية
رحت لبيتهم استقبلتني امها شافتني تعبانة ودتني للغرفة ونمت كل حلم شفتة جان هو يخون بية ويضحك
اني ادري بس من شفتة انصدمت حيل ؛
اجتي نادين بقت تسالني لان اني اول مرة اطلع من البيت برغم ابد ما انطي بي ولا احجي عنة بشي مو زين شميكون هو زوجي
ما حجيت ولا كلمة شوفتها الفديو من فزتها وكع منها التلفون وظلت تباوع علية واني باوعت للتلفون شفت مقطع جان يبوسها بي
حضنتها وبجيت وصيحت كأنو هسة يالا وعيت على اللي صار انطتني ابرة مهدئة ورجعت نمت ومن بعدها تطلكت منة هم شوية عانيت بس الحمدلله تطلكت وخلصت منة
- واهلج ؟
- ميدرون بشي جان وضعهم بالموصل خطر حاولت اجيبهم يمي و ما كدرو يجون الطرق كلها انسدت وما كدرت اشغل بالهم علية وهم هناك بس كتلهم سافر بشغل حتى لا يظلون يسالوني علي
وبعدها بشهر انكطع الاتصال بيهم ما اعرف اي شي عنهم وهاي على ايدج الباقي ما خليت شغلة مسويتها ولا فلوس ولا اتصال حتى اوصلهم
- الله يساعدج شكد شلتي هموم وبعدج صغيرة
- الحمدلله على كل شي بس كون الكى اهلي وهاهية هذا المهم
-ان شاء الله تلكيهم
- ان شاء الله يا رب
- يمة انت مصار عندج حمل منة مو ؟
- صار
- وينة لعد ؟
- مات ببطني مجنت ادري بنفسي حامل من كثر المشاكل حتى ما منتبهة لهذا الموضوع بعد يوم من الطلاك وبديت الزم العدة انمغصت واحس روحي دتطلع اتخربطت نادين اسعفتني وكالولي الطفل مات والحمدلله هو مات لان لو مميت جان اني اجهضتة ما اريدة
- زين انت بقيتي يم نادين لو شلون ؟
- اي بقيت يمها فترة ولكيت هاي الشقة وبديت حياتي من الصفر ونسيت كل شي وراية ما كمت افكر الا باهلي
- وهو محاول يرجعج ؟
- كم مرة بعدها ايس مني لان كتلة حشتكي عليك عافني بعد و راح
- والله صعبة
- اي بس احسن ما اظل مخدوعة هاهية انجمعنا بالمعروف وتفاركنا وكلمن شاف حياتة
وبالمناسبة الجكاير من بعد ما اتطلكت كمت اشربها وادمنتها كانو هي اللي راح تحل مشاكلي ههه ...