العجوز والقبيحة

2

#العجوز_والقبيحة2
Shahd Alsalman
فوتتها لغرفة حتى ترتاح بيها وهي ظلت تتصفن ومحتارة حاولت اطمنها واخفف عنها بدون ما اسالها عن شي مع انه حابة اعرف كل شي يخصها
فاتت للغرفة وراحت للفراش غطيتها وطلعت
رحت سويت اكل الي والها لان هي لازم تاكل اكل خاص ولهسبب تسوكت
كملت ورحت اكعدها شفتها نايمة اني هم غلبني النعس و كلت اتمدد شوي بينما تكعد

حسيت على حركة فزيت نسيت هي وياية تعودت لوحدي بالبيت ومن التعب ذبيت نفسي ع النوم و راحت عن بالي كمت اشوف خاف محتاجة شي وهمين اصبلها حتى تاكل باوعت للساعة صارلي 4 ساعات نايمة

- احم شلونج خالة
- الحمدلله اسفة لان دا اتحرك براحتي بس احتاجيت اروح الحمام
- لا خالة بالعكس هذا بيتج بس اني نومي خفيف تعلمت هيج
- شفتج نايمة الله يساعدج
- ويساعدج
انت نمتي زين ؟
- اي الحمدلله
- نوم العوافي
يلة لعد دقايق واحمي الاكل ونتغدى سوة
- اني ما اريد اشكرج
- ماكو متريدين وراج دوة ولازم تاكلين زين حتى تاخذي
- والله ما اكدر
- ميخالف حتى لو لكمتين بعدين اني مسويتة خصوصي الج والله يعني جامليني اقلها ههههه
- تعبتج وياية
- تعبج راحة خالة
امشي وياية للمطبخ
- يلة

رحنا وكعدت اسولف وياها على غراض المطبخ والبيت انتبهت عليها شاردة وصافنة وبغير عالم وحتى ما عرفت اسمها منها بس من سجلتة بالمستشفى جان اسمها سحر يعني ام منو ما ادري
خلصت الغدا وصبيتة واكلنا واحنا ساكتين وهي كوة تاكل صدك مالها نفس بشي جبرتها وبالضحك والشقا وكلتها

عندي خلك وطولة بال بحكم شغلي ولان المسنين والكبار بالعمر يكونون نقطة ضعفي دائما بسبب افتقادي لاهلي يمكن
وباعتبار هي محتاجة لمساعدة فما اكدر الا اكون طويلة بال واساعدها كد ما اكدر
كملنا غدانا و غسلت المواعين ورحنا نتفرج تلفزيون

- خالة
- نعم
- شنو اسمج
باعي اني اعرف اسمج سحر عبد الله لان سجلتج بالمستشفى بس اقصد ام منو
- ام صادق
- عاشت الاسامي
- وانت ؟
- اني اسمي بلسم
- سبحان الله اسم على مسمى
- اشكرج خالة كلج ذوق
- انت ممرضة ؟
- اي ممرضة
- ليش دتسوين هيج وياية ؟
- وليش ما اسوي هيج بعدين الناس لبعضها وين المشكلة
- الدنيا مو امان ومتدرين شنو اكو وراية متخافين على روحج
- الامان بالله ورب العالمين  هو الحافظ
يعني انت جان مغمى عليج و مريضة وتعبانة شنو ممكن اسوي غير انه اساعدج ؟
- فضلج ما انساه طول حياتي
- لا خالة العفو ما اقصد والله بس دا اكلج انه اني  مسويت الا الواجب
- رحم الله والديج بنيتي

من كالت هيج حركت بداخلي احساس وذكريات من جانت امي تكلي بنيتي وتسولف وياية وتحجي واسمعلها شكد محتاجتلها وما نسيتها و لا يوم بس شنسوي للزمن والدنيا ما بيدي الا احمد الله واشكرة واتمنى انه هم يشمون الهوا ونفسهم بالدنيا وهذا يسوى عندي ملك الكون ..

مرو 3 ايام وهي عندي جانت تكضيها صلاة ونوم ومرات تكعد يمي بس منحجي بشي مهم شغلات عن اهل كبل وهيج امور
اجة يوم دوامي لان جان عندي استراحة وصار عندي خفر بلغتها وكتلها راح ارجع بعد 3 ايام لهنا لان ابات هناك
خليت يمها المفتاح خاف تريد تطلع وكتلها ما تفتح لاحد غيري ووصيت عمو ابو نورس يشوف شمحتاجة اغراض او يطل عليها وهو ميقصر اعرفة

رحت للدوام بس بالي يمها ما نطيتها موبايلي الثاني حتى اتصل عليها خفت لا تتحسس او تضوج لان اني دا اخابرها كلت يجوز عبالها اني مخونتهة او خايفة على بيتي
هو بيتي ما بي شي يا دوب الغراض البي لا ذهب و لا شي بس فلوس ومبلغ بسيط

داومت  ال 3 ايام والحمدلله جانت مناوبتي سهلة هالمرة متعبت كلش و رجعت للبيت سلمت على عمو ابو نورس واخذت باكيت جكاير منة وصعدت بس اشم ريحة طيبة حيل واني اصعد ع الدرج كلت هاي اليوم الجوارين عالكيها بالطبخ بالعافية عليهم
ولو اني متعودة عليهم اذا سوو شي يدزولي منة واني هم نفس الحال كل ما اسوي شغلة ادزلهم
الجوارين كلهم اهلي ويحبوني وهواية يدزون علية علمود ابرة او فحص او مداواة بس ما اخذ منهم فلوس وهيج علاقتنا مثل الاهل واكثر ..