العجوز والقبيحة

5

#العجوز_والقبيحة5
Shahd Alsalman
- اي يوم كملي
- بعد احنا هم كبرنا والحيل مو مثل قبل من جنا شباب هسة اولادنا هم اخذو الدور وهم صارو الشباب واحنا الشياب
كل واحد من ولدي صارلة اسلوب بالحياة وافكار مختلفة وطموحات
- يعني خلي نكول تحددت معالم شخصيتهم
-اي بالضبط
- زين كملي خالة
- ابو صادق الله يرحمة صار عندة قرحة وشوية نوعها صعب
العلاج مالتة بعد كام لازم اكل خاص دوة منتظم هواية شغلات تغيرت حتى صار عندة ضغط داريتة بما يرضي الله جان شمعة بيتي
- خالة انت حبيتي
- اوووه يا يمة حبيتة حب مصاير لان جان يعاملني احسن معاملة
- لان انت تعاملي زين
- لا يا يمة مو شرط الانسان وخاصة المرة مرات تاخذ رجال شكد ما هي زينة وياه يظل هو مو خوش لان كل واحد يسوي بأصلة
- ايييييي والله
- ههههه شبيج يمة ليش هيج جريتي حسرة
- ما بية خالة كملي
- اي وين وصلنا بالحجي
- على الحجي صدك هو رايح بيت الله ؟
- اي رحنا اني وياه و انكتبتلنا حجة الف الحمدلله والشكر
- الحمدلله لعد اكدر اكولج حجية واكول على ابو صادق حجي
- اي يوم .. المهم
كتلج مرضة شوية جان صعب لان يضوج ينحرم من شغلات يحبها مثلا بعد ماكو لا دهن لا حلويات لا ملوحة زايدة كل شي ممنوع علي سودة علية
اتأذى هواية و تجي ايام يتخربط بلا سبب
اسد جان هواي يداري بس صادق مو كلش
فد يوم كالي يا مرة ليش ما نزوج صادق مدام خلص كليتة والحمدلله بيتنا جبير وموجود وما عدنا شي والولد ديشتغل
- وزوجتو ؟
- راد يشوف جهالة قبل لا الله ياخذ امانتة و كنالة بالموضوع  كال اني ببالي وحدة كيفنا وفرحنا واتفقنا نخطبها الة
رحنا لبيت البنية هي حلوة واهلها خوش ناس بس على كد حالهم مو مثلنا يعني احنا وضعنا المادي احسن تعرفت بيهم واتعرفو علينا ورجعت حجيت لابو صادق وكال هاهية مدام رايدها وتكولين على كد حالهم ومستورين بعد ردي خبر للجماعة حتى نخطبها رسمي واخذي موعد منهم
- وصارت الخطبة
- اي صارت احسن خطبة سيارات ترست الشارع وابني بينهم هو وبدلتة ما صدكت عيني من شفتة عريس شفت الويل لحد ما كبر
بجري راح ازوجة وافرح بي اني وابو جان احلى يوم عندي حتى احلى من يوم تخرجة
هلهلت وطشيت هالجكليت وبجيت من الفرح وهو فرحان
وصار زواجة ما طولنا بي يا دوب بس رتب الغرفة وجاب الاثاث لان كل شي موجود
ذاك اليوم جان عيد بالنسبة الي ولابو
ماكو احلى من شوفة اول طفل الج يكبر وتزوجي وتزفي بيدج
- اي
- كومي نصلي يمة وبعدين نكمل حجي
- اي خالة يلة اخذتنا السوالف ههههه

كمنا توضينا وصلينا قريت قران ودعيت وسبحت تسبيحاتي واني اتذكر يوم عرسة لصادق

- كللللللللووووووووشششش بالمبارك يمة الله يجعلة خير عليك وعلى مريتك وتترسون هالبيت جهال
- الله يبارك بيج يمة ويخليج النا انت والحجي
- فرحان يمة
- حيل مو شلون مجان
- الله يديم فرحتكم و يفرحني باخوك
- ها حجية ناوية تخطبيلة
- لا بعد وكت واذا راد هم اخطبلة يدلل بس هو شو مالة واهس بالزواج
- هو هذا انطي دراسة انطي قراية فد يوم يتزوج هاي ام المكتبة اللي براس شارعنا
- ياااا دخيل ولك هاي اكبر مني
- هههههههه اي هو يتزوجها ويخلفون كتب وروايات
-يااا ولك تصنف على اخوك لا تحجي هيج علي
- اييي مو هذا الصغير المدلل طبعا ما احجي علي
- ههههه هاي بعدك تغار منة ولك ما دللتك اني ؟
- ههههههه لا حشاج مقصرتي
- يلة ابو لسان كمل تبديل وابقى فاتح القران بالغرفة لا تسدة وصلي ع النبي كل شوية
- عليه الصلاة والسلام يمة لا تنسون الجكليت اريد كل مرة هناك لازمة بيدها جيس وتطشلي
- ان شاء الله يمة يلة اروح اشوف ابوك كمل لبس لو لا
- اوكي يوم

اجتي بوكتها المزيقة كمت انطي فلوس بس لا توكف المزيقة اريد هيج الدنيا كلها تعرف اني زوجت ابني هيج جنت فرحانة ومكيفة وابو الله يرحمة بذاك اليوم ركص وهو بعرسنا مسواها جان يحبة هواية وفرحان اكثر مني

شمدرينا الوكت هيج يلعب بينا ..