العجوز والقبيحة

26

#العجوز_والقبيحة26
Shahd Alsalman
بعد ما استقرينا بشقتنا رجعت لدوامي وشغلي
وخلصت اجازتي واتصلت بجمانة علمود الحاسبة والبرنامج واتفقنا نتلاكى بنفس المكان

- السلام عليكم اسفة تأخرت عليك
- عليكم السلام ولا يهمج شلونج
-الحمدلله وانت
- الحمدلله اسف لان طولت عليج بس شوية عندي ظروف
- لا عادي ان شاء الله محلولة
- تسلمين الحمدلله فضت
- الحمدلله
نبلش بالشغل شنو رايك ؟
- بالاول خلينا نطلب شي ونبلش
- ماشي
- اي كولي
شرحتلي عن البرنامج وشلون ادخل بي المعلومات الجديدة ومسويتلي تعليمات و مفتاح مساعدة مفصلة بي كل مشكلة ممكن تواجهني وحلها يعني مسوية شغل كلش مرتب
دخلت كدامها بيانات كم مريض وكتلها الباقي اكملهم بعدين
اتشكرت منها دا اكوم وفجأة دخل علينا واحد احنا وكاعدين سلم على جمانة بس جمانة تغير لونها وضاجت كلش وهو يباوعلي بنظرة ما اعرف شلونها يعني كأنما هي تخصة واني ماخذها منة

- شلونج جمانة
ممكن اخذ من وقتج شوية
- اوكي

كامت وياه وحجو شوي هو طلع وهي رجعت كعدت
ولزمت راسها

-جمانة بيج شي ؟
- لا ما بية خلينا نكوم
-ماشي
- جمانة لحظة خشمج دينزف

جريت كلينكس دا امسحة ووكعت هي الظاهر ارتفع ضغطها التمو علينا الناس الموجودين اخذتها بسرعة للمستشفى وعالجتها جان ضغطها صاعد كلش
انتظرتها لحد ما تصحى حتى افهم ليش هيج صار وياها
- حمدلله ع السلامة شلون صرتي
- الله يسلمك شصار
- ماكو شوية ارتفع ضغطج
- اكدر اطلع للبيت
- اي بس بالاول فهميني انت تعانين من ارتفاع الضغط المزمن
- اي
- وراثي ؟
- لا هو هيج شكل وياية
- بس هذا معناها انت معالجتي وهملتي
- عادي دكتور مو مهم خليني اروح
- ماشي حوصلج وبعدها نتفاهم على هذا الموضوع
- لا شكرا اني اروح لوحدي
- ميصير حيظل بالي عليج هيج
- لا يظل بالك اني زينة هسة ومرتاحة
- دكيلي لعد من توصلين
- اوكي

وصلتها لباب المستشفى ورجعت لشغلي و هي راحت تكسي لبيتهم ورة نص ساعة هيج دكيتلها كالت بعدني بالطريق شوية واجاني مسج منها

" اني وصلت شكرا الك "
" حمدلله ع السلامة ارتاحي و نامي "
" اوكي "

جنت كاعدة ويا الدكتور دا اشرحلة البرنامج مشفت الا صادق فوك راسي اتضايقت من وجودة واصلا شوصلة ليمي وشلون لكاني هنا ما كدرت اسوي شي بسبب وجود دكتور ساري ورحت ليغاد عنة حتى احجي وياه

- جمانة منو هذا ؟
- شتريد صادق وشوصلك الي ؟
- سالت عليج ودلوني مكان شغلج وعرفت انت هنا
بس معرفتج كاعدة ويا واحد عبالي لوحدج
- اي مو لوحدي ومثل مشفت وهسة شتريد ؟
- ما اريد ارجعي كملي كعدتج وونستج
- احترم نفسك مو كل الناس مثلك

عفتة ورجعت واحس راسي حينفجر من الضغط
الحمدلله الدكتور جان يمي واسعفني ..
كل تفكيري جان ليش رجع وليش اتعنى وسأل عني ووصلني شنو اللي ببالة بعد الشفتة وياه والمعاناة العشتها و بعد ما طلكني واني ما عندي اي ذنب ليش اجة !
حجيت لامي على اللي صار وياية حاولت تسوي الموضوع طبيعي متريدني افكر واتعب لان صحتي على كدي
دنسولف ودك تلفوني جان دكتور ساري وشلتة علي

- الو
- الو مساء الخير
- مساء النور هلا دكتور
- هلا بيج شون صرتي بالي يمج
- الحمدلله اشكرك ع السؤال
- خما بعدج دايخة
- يعني شوي بس احسن
- جمانة ممكن باجر تمريلي حتى نسوي فحوصات انت بعدج صغيرة وما يصير بهالعمر يجلب بيج الضغط
- دكتور كتلك مو مهم وما اريد ميحتاج والله
- رجاءا جمانة لخاطر اهلج اكيد هسة درو بوضعج مو
- اي يدرون وعرفو بية جنت بالمستشفى وهاي امي يمي
- الوالدة يمج يعني
- اي
- ممكن احجي وياها
- اي هسة
- الو
- السلام عليكم شلونج خالة
- هلا يمة مية هلا ما اعرف شون اشكرك فضلك ما ينسي الحمدلله من جنت يمها
- لا خالة صدك جذب على راسي بس اريد منج شغلة
- كول يمة شنو
-جيبيها باجر للمستشفى مدتقبل صار ساعة احاول وياها وبالمستشفى همين ومقبلت
- والله يمة هي تعاند وكلة ديأثر عليها
- ما اعرف باي طريقة لازم تجي والله مو زين عليها هو مجرد فحص عادي يعني ماكو شي يخوف
- ان شاء الله
- ديلة يوم ما اطول عليكم ارتاحو وعدها العافية من رخصتج
- الله وياك محروس ومحفوظ

يعني معناها هي ما تضم عن اهلها شي وامها كلش حبابة ومن اهل قبل مبينة من حجيت وياها كانو دا احجي ويا امي
كعدت الصبح و رحت لشغلي سويت كم معاينة وفحص ودا اكتب رسالة لجمانة ودزيتها
شفتها هي ومرية جبيرة جاية

رحت اني وامي للمستشفى لان امي لحت هواية والدكتور همين وصلنا واجتني رسالة من دكتور ساري
" صباح الخير .. اليوم اذا متجين ازعل وياج تعالي اذا جنت تحبين امج "
ابتسمت لان جان واكف وديباوعلنا و همين وصلت رسالتة بوكت وصلتنا
سلمنا علي اني وامي وبلشنا بالفحوصات ..