العجوز والقبيحة

18

#العجوز_والقبيحة18
Shahd Alsalman
رجعو اتصلو بية وكالو امنولي طريقة حتة اطب للموصل كيفت وكلت يا رب ما ارجع الا واني وياهم واخذهم ونطلع منا ونعيش بأي طريقة وشون مجان
بس هذا معناه راح اضطر اكول للحجية على الحل اللي مكدرت اكولة الها ذيج المرة بس هي حتعذرني وتفهم وضعي اكيد

- خالة رجعو دكولي عفية ادعيلي اروح والكاهم
- ان شاء الله يوم تروحين وترجعين وانت وياهم بالف سلامة والله خايفة عليج
- الله الحافظ بس يعني ما اعرف شون اكلج ..
- يمة اني ادري ما اكدر ابقى يمج وانت خجلانة تكليلي بس والله مقصرتي بشي وياية الله يشهد احسن من ولدي اللي ما سالو علية
- لا يوم العفو بس انت تدرين هالشقة ايجار واني مراح اكون هنا و لميت كل فلوسي لان محتاجتها يعني ما عندي هسة وانطيج مثلا مقدم دتفهميني
- فاهمتج يمة توكلي بالله ولا يظل بالج علية اني ادبر روحي والله موجود شون ما دزج الي يدزلي ويعيني ولو فركتج مو هينة علية
-  يوم اني حيل اسفة واعتذر وصدك خجلانة منج بس راح اخليج يم بنية هناك تشتغل بدار مسنين وان شاء الله اوصيها عليج
- الله ينطيج يمة اكوم لعد احضر غراضي وانت هم

بست راسها وحضنتها وبست ايديها والله صعبة علية بس شسوي مجبورة وان شاء الله المكان اللي حوديها علي امين و يداروها واذا صارتلي قسمة وعمر جديد وارجع لهنا اخذها تعيش وياية اني واهلي

كمت رحت لغرفتي الم غراضي وابجي واكول هاي تاليتي ربيت وكبرت وتعبت تالي ما غزر شي واحد نساني وراح وما سال عني والثاني مشة بشور مرتة وخلاها تطردني و ما رفلة جفن علية
وين ابو صادق لو شاف هاليوم ما جان صدك ذولة ولدة الحمدلله الله اخذ امانتة جان ما رضى عليهم ليوم الدين الله يهديهم

هالغريبة بلسم دارتني وقامت بية احسن منهم وتريد هسة تذبني بدار عجزة وحتى تجمل اسمة تكلي دار مسنين بس مراح اخليها بهذا الموقف ولا اخلي نفسي بهيج موقف حلم غراضي واطلع واعوفلها الكلادة اللي مستحيل افكر انزعها بيوم لان هدية المرحوم حتى تلبسها هي بيها اية الكرسي وان شاء الله يحفظها بجاه هالاية العظيمة

كتبتلها رسالة وودعتها وحطيت الكلادة وامنتها تلبسها
انتظرتها تنام لان اتفقنا بثاني يوم توديني بس اني كلت اروح من ذاتي وخلص
اتأكدت هي نامت اخذت جنطتي ورحت
ما اعرف وين اروح والمن الجأ وشون حتصفى وياية وكفت تكسي و من كتلة وديني على اقرب دار عجزة احسة يريد يبجي

ليش يمة هيج خليتو العالم تكول علية خطية وذليتوني ليش ما فاد بيكم التعب هم اثنين وما عرفت اربيهم ولا حويتهم ولا لزموني بكبرتي هي هاي تاليتها العالم تنقهر علية وتباوعلي بعين الشفقة والعطف
حسبي الله ونعم الوكيل الطريق كلة جريتة ودموعي ما وكفن لحد ما وصلنا هو ساعدني خطية وخلاهم يكعدوني عدهم

سجلو اسمي بس هم ما اهتمو يعني كأنو بعد كلبهم مات من كثر المسنين العدهم ومن كثر الحالات الشافوها دخلت للغرفة جان بيها 10 سراير وبس 2 فارغات اخذت واحد و كعدت كلهم استقبلوني ورحبو بية صفنت ع الشباك واباوع للسما وببالي هواي افكار ذبيت حملي على رب العالمين والقهر ذابحني ..

اليوم راح اودي خالة اللي اعتبرتها امي لدار مسنين شكد صعبة وشكد تشك الكلب
شلون راح اودعها واحطها بهيج مكان نهاية عمرها تكضي هنا يا رب صبرني وصبرها وانطينا القوة حتى نتحمل
طلعت من الغرفة ورحت دكيت عليها الباب ما فتحت كلت يجوز بعدها نايمة حضرت الريوك والجاي ورجعت مرة لوخ اكعدها ماكو
فتحت الباب مموجودة والفراش مرتب معقولة راحت للحمام و منتبهت بس باب الحمام مفتوح
اللي محسبت حسابة صار ولكيتها لامة كل غراضها و تاركتلي ورقة فتحتها ووكعت منها كلادة جانت دائما لابستها شلتها وبديت اقرة بالرسالة

"              بسم الله الرحمن الرحيم 
بنتي الغالية اللي ما ولدتها ولا جابتها بطني واللي طلعت احن علية من ربى ايدي وضنايا ما اعرف شون ممكن اجازيج بس دا ادعيلج بالخير يا يمة وادعيلج كون تلكين اهلج وترتاحين من عذابج ويسهل كل امورج طلعت بلا ما اودعج لان فركتج عزيزة علية وما اتحمل
ديري بالج على نفسج واهلج وامانة اتركي التدخين لخاطري اذا تعزيني لا تخلين شي قديم ومنتهي يأثر عليج و على صحتج وان شاء الله اسمع عنج كل خبر طيب اعذريني ضايقتج الفترة الفاتت
واريد اطلب منج طلب كون ما ترديني اكو كلادة هدانياها المرحوم من اول متزوجنا وما نزعتها اريدج تلبسيها بيها اية الكرسي حتى تحفظج واعتبريها ذكرى مني
اشوفج بالف خير يا رب ويحفظج من كل مكروه "