العجوز والقبيحة

17

#العجوز_والقبيحة17
Shahd Alsalman
مرت اخر شهور التخرج و التهيت بالدراسة ومع هذا منسيت امي ابد الحمدلله جان وياية صديقي ساري عراقي جان عايش بالموصل وهو اللي ساعدني اتجاوز هالمحنة احنا ندرس اختصاصين مختلفات هو باطنية وقلبية بس دائما نتواصل واخر شي اخذنا شقة اني وهو سوة وعشنا بيها ؛

مشكلتة ما تختلف عن مشكلتي صارلة تقريبا 3 سنوات مسامع صوت اهلة لان بالموصل بس اختة تتواصل وياه وتكلة زينين وكل ما يريد يرجع متخلي وتكلة الوضع زين بس هم ميخلون احد يتصل بيهم وكل فترة دتدز ناس ويطمنوها عليهم وترجع تنطي خبر اله ولاختة الثانية يالا يرتاح شوية لان هي عايشة ويا زوجها ببغداد فبعيدة عن كل الاحداث اللي بالموصل
كمنا واحد يواسي اللاخ ونحاول نتقبل الوضع بكد ما هو صعب بكد ما نصبر روحنا كوة ..

بعد فترة خلصنا وتخرجنا وصار لازم نرجع للعراق بس قبلها ساري انكطع اتصالة باختة لان كالتلة راح اروح لاهلنا يعني حتى لا يظل بالة عليها لان ماكو اتصال هناك حاول يمنعها بس هي اصرت لان كالت مأمنة الطريق والناس وياها و زوجها يعني مو لوحدها هو جان يحجيلي كل شي وتقريبا كمت اعرف كل شي عن اهلة وهو كذلك يعرف كل شي عن اهلي وحياتي
كضينا طول فترة الدراسة بحالنا لا سوينا علاقات ولا شي يغضب رب العالمين او ينزل راس اهلنا جنا طالعين بهدف والحمدلله حققناه بتوفيق من رب العالمين

اتمنيت امي عايشة واشوف فرحتها واسمع هلاهلها وتطشلي جكليت وابوية لو موجود هم جان افتخر بية و اتباهى كدام الناس بس الله يرحمهم ان شاء الله ما ينكطع ذكرهم ولا انساهم واخلي الكل تترحملهم

رجعنا للعراق وباعتبار صار البيت لاخويا اني رجعت لشقة تركها والدي الي وجانت باسمي وهمين ساري كعد وياية لحد ما ترجع اختة هيج كالي بس اني مقبلت وكتلة نكعد سوة لحد ما نرتب وضعنا والله كريم
رحت لبيت اخويا وسلمت عليهم وجان وجه مرتة ثكيل اعرف بيها تضوج مني لان احجي الحق ولان هي مو راحة اعرفها بس مهما يكون هي محسوبة علينا وعرضنا فما اسوي شي ومدام اخويا مرتاح وياها اني ياهو مالتي .

رجعت للشقة نظفناها ورتبنا الكعدة واشترينا سرير ثاني لساري والحمدلله بظرف اسبوع استقرينا
ردت اروح ازور امي و كل ما اكلة لصادق يكلي ما عندي وقت وشغل والمكان بعيد يعني مراح اندل لوحدي بقيت انتظر
بس التهينا اني وهو بمعاملة الشهادة والمعادلة والخ من هالامور شوية اجراءات تطول ولازم نداوم بمستشفى فترة حتى نكدر نشتغل ...

اسد بالنسبة الي مثل اخوية شكد اكو طلاب عراقيين وطالبات بس مو مثلة هو اخلاقة وادبة وتربيتة وغيرتة واحترامة يدل على تعب اهلة علي وتعبة على نفسة الحمدلله اللي تعرفت بي ونعم الاخ والصديق
وكف وياية وساندني هواية بالسفر وبرجعتنا وبالدراسة بكل شي سوة كلش انقهرت من عرفت بامة توفت جنا واكفين بالدوام واجاه اتصال من اخوه وفجأة وكع من طولة وفقد وعية من صحى افتهمت منة امة توفت رحت وسوينا اجازتة ورتبناها ويا قسمة ورجع للعراق علمود امة وتالي هم ما زار كبرها ولا كدر يبقى هواية راح و رجع ما طول كطع اجازتة كالي البيت يخنكني ومدا اتحمل ما اشوفها

حاولت اطلعة من هالازمة اليمر بيها واني هم نسيت شوية معاناتي اهلي مو يمي وما اعرف شي عنهم وزاد الطين بلة اختي اللي جانت تجيبلي اخبار عنهم همين راحت يمهم وانكطع الاتصال باخر ايام رجعتي للعراق اتطمنت لروحتها لان هي كالتلي مو لوحدي ووياية ناس وزوجي يعني ارتاحيت شوية
لان اعرف الوضع بالموصل منهار وخطر ودا اشوف بالاخبار شون الدواعش مسيطرة وشون ديفلشون البيوت والمراقد والاثار دمرولنا كل شي

مخلاني اسد اروح للموصل يم اهلي ولا قبل اكعد ايجار كالي شقتي موجودة ونكعد بيها لحد ما يفرجها الله وهمين نكمل معاملاتنا ونروح ونرجع سوة يعني مثل ما جنا بروسيا
احنا بكل شغلة سوة ما عدا الدراسة هو اختص بالجلدية والتجميل واني اختصيت بالباطنية والقلبية جان هذا حلمي انه اشتغل بهيج اختصاص وكلش احبة وهواية ادرس عنة واتابع تقارير وبحوث بالنت يعني اكدر اكول جان شغفي من جنت بالمدرسة ودخلت بالعراق طبية وبعد ما تخرجت رحت وكملت البورد بروسيا وتعرفت هناك بأسد هو اكبر مني بس احنا نفس التفكير والعقل فلهذا توالمنا كلش لان هي مالها علاقة بالعمر ...