العجوز والقبيحة

25

#العجوز_والقبيحة25
Shahd Alsalman
طلعت اني وكوثر واسامة ابني دنفتر بالسيارة ونغير جو وشفت جمانة ويا اهلها طالعة
بس متغيرة وحليانة اكثر ولو ضعفانة كلش ومبين عليها التعب بس تبقى حلوة

اني اعترف اشتاقلها هي جانت حبي الاول ومرتي بس بعد انفصلنا
انتبهت علية كوثر صافن عليهم وسوت مشكلة شكبرها شكدها وتعاركنا بذيج الليلة

ومن يومها وهي منكدة حياتي لان دتشك بيها وبية واني ما عندي شي من بعد ما اتزوجتها ما كمت اتعرف على اي بنية
استمرت مشاكلنا وكامت تزيد و مترضى لا بذهب لا بفضة لا بطلعة كل شي ميرضيها وطلبت مني بحجة تخاف على نفسها وتخاف لا اطلكها انه اضمن حقها بكتابة قطعة ارض بأسمها او اشتريلها شقة المهم شي ممكن يخليها بأمان ؛

جانت صعبة علية واعرف راح اتأثر ماليا بالموضوع بس مو مشكلة اخذتلها شقة وسجلتها باسمها
تقريبا وضعنا رجع طبيعي بس كامت تسحب مني فلوس وتكول دا اشتري شغلات وملابس الي ولاسامة ومن ما اكدر انطيها تزعل وما اكدر على زعلها انطيها بدون حساب وما خليت شي بنفسها ابد ..

بالنسبة لأسد ما اشوفة هواية وهو ميسأل علية وبصراحة اخاف لا احجي وياه ويكلي تعال وديني لكبر امي واني تهربت منة هواية
فأكيد بحكم هو دكتور التهى بشغلة وبالمرضى والمراجعات ونسى هالقصة

وامي ما اعرف مرات هيج احن الها بس من اتذكر تهايمها لمرتي وحجيها عليها ومشاكلهم انساها بسرعة واشغل نفسي عنها ...

بعد فترة اوضاعي المادية تخربطت وكمت اخسر بالشغل من دون ما اعرف السبب
والمشكلة ما عندي سيولة تغطي كل الديون كل شي املكة دا اخسرة شوية شوية
ما عدا صحتي اللي بالنازل بسبب هالموضوع وجنت متخيل كوثر راح تساعدني وتبيع البيت الاخذتة الها والذهب حتى نتجاوز هالازمة بس ...

- كوثر احنا مشاكلنا المادية كثرت واني اكدر اكول خسرت هواية بشغلي
- اي وشنو يعني !
- يعني دا اكول لو نبيع الشقة ونسدد الديون وكم قطعة ذهب راح نكدر نعوض الخسارات ونبدي من جديد
- هاااااا اي كول هيج من الاول يعني بابا جابة بابا اكلة
- شبيج كوثر شنو هالحجي اني دا احافظ على املاكنا واذا بعناها راح نشتري غيرها مو نهاية الكون يعني
- باوع عيني صادق اني هذا الحجي مياكل وياية مو انت تلوص بالشغل وتلعب لعب وتجي علية تريد تاخذ املاكي
- املاكج !!!
هي من وين مو مني مو اني جبتها !!!
- ها حنبدي بالمعاير و جبتلج
- استغفر الله العظيم كوثر افتهمي اني ما اقصد بس قصدي راح اكدر اعوضج عنها مثل ما جبتها
- مالي علاقة خلص روحك بروحك
- يعني تعوفيني بهاي الازمة صدك تحجين
- اني اصلا صارلي فترة ممرتاحة وياك واريد اطلب منك تطلكني
- شنووو يعني لمن وكعت بشدة تريدين تعوفيني ؟
- لا بس كتلك صارلي فترة ممرتاحة وياك وحياتي كلها ضيم بضيم اول شي ويا امك وبعدين وياك
- هيج صار الحجي !
- اي هيج وهذا العندي
- خوش لعد طلاك ما اطلك وشتريدين تسوين سوي اشبعي ضيم وياية
- اووووه كيفك لا تطلك حاخذ ابني واروح لشقتي اعيش هناك
- اذا تريدين تطلعين لا تفكرين ترجعين لهنا وخلي ببالج ابني متاخذي
- خوش خلي يمك لعد واتونس انت وياه
اني ما بية حيل على هاللغوة
- شكد نذلة طلعتي
- والله هذا الموجود يلة باي
- وين مولية
- اروح الم هدومي ولشقتي
- وحتعوفين ابنج من صدك ؟؟
- اي وشنو يعني هو ابنك مو ابني وتابع الكم شحيفيدني قابل اكيد حيطلع مثلك ويشمرني بالشارع مثل ما شمرت امك

من كالتلي هيج حسيت الدنيا وكفت لحظة وتذكرت امي وشسويت بيها مصدوم من كلامها هاي اللي فضلتها على اهلي وعلى نفسي وحسبت حسابها قبل الكل وطردت امي علمودها حتى ترتاح هي وتالي تعايرني و متقبل حتى توكف وياية وتريد نتطلك بس علمود خسرت فلوسي !

لو جانت جمانة بمكانها جان ساندتني ما اعرف ليش بلحظتها حسيت اني فعلا اذيت جمانة وخسرتها و اليوم اني عرفت قيمتها بس مكابر وما اعترف بهذا الموضوع ابد جانت اذا احتاجيت لو ربع دينار متخليني اكول لابويا وتنطيني من الضامتهم ومجمعتهم او تحاول كد ما تكدر متخليني مديون

رحت لاصدقائي حتى بلكت يداينوني اني هم الي وكفات وياهم واكيد ميتخلون عني ويساعدوني بمصيبتي بس مجان ردهم يختلف عن رد كوثر اصلا احس انغدرت وانغشيت وحتى احس اكو عقاب نازل علية
الصدمات اللي دا امر بيها مو هينة شغلي البيت مرتي اصدقائي اللي ما جنت اتصور حيعوفوني ويتنكرون للعشرة البيناتنا
ومو منطقي اروح لاسد واطلب منة لان اكيد حيسمعني حجي وحيكلي ها هذولة الجنت تعاندنا علمودهم ويشمت بية ..

كوثر لمت هدومها وغراضها وكتلها تاخذ اسامة وياها ومقبلت طلعت وعافتنا هجت و اني بقيت وياه لوحدي لازم اداري ولازم احل اموري بس شلون ومنين وحتى هالبيت ما اكدر ابيعة لا عندي توكيل ولا هو باسمي بعت السيارة وكم غرض من البيت يعني كدرت اسدد النص وسحبت الفلوس الباقية بحسابي هي مبلغ بسيط بس اقلها انطيهم ولو شوية حتى يمهلوني ع الباقي ..