العجوز والقبيحة

13

#العجوز_والقبيحة13
Shahd Alsalman
حسيت هي مجروحة حيل فما ضغطت عليها تصرفاتها تشبه تصرفات جمانة مثل طيبتها وحنيتها دا افكر هواية بوضع ولدي و بيتي صارت فترة طويلة وما اعرف شي عنهم واكول بيني وبين نفسي ما سالو علية ما رف كلبهم ما كلبو الدنيا مثل ما هسة بلسم دتسوي وتحاول توصل لاهلها اخذتني الافكار وجابتني ...

اجاني ايميل من واحد وصيتة اول ما يلكى طريق للموصل يساعدني حتى اروح لهناك والخبر الحلو جان عندة شخص يكدر يوصلني ليمهم بس بفلوس طبعا وهالشي معناها يخليني اخذ
من فلوسي الضامتهم علمود المشروع بس فدوة المهم اوصللهم بأي طريقة وحتى لو كلفني حياتي
بس تذكرت الحجية كاعدة عندي شلون راح اعوفها

فكرت انه تبقى هنا بالبيت لحد ما ارجع بس اذا بقت لازم تدفع ايجار وهواية امور واني كل المجمعتة و اللي عندي اريدة علمود طريق الموصل وهي مسكينة ما عدها بقيت بحيرة وما عندي مكان اودي الها
جتني فكرة بس صعب اسويها وصعب اكوللها عليها لكن اني مضطرة وهذي فرصة حتى الكى اهلي ؛
رحت يمها حتى اسولف وياها كمت افتح مواضيع عامة واحجي بس مليانة احراج منها و هي حست علية تقريبا حفظتني وكامت تفهم علية من دون ما احجي
^
- بلسم احجيلي شبيج
- ما بية امي ليش
- لا بيج وعندج حجاية بس مستحية
- امممم والله ما اعرف شكلج
- كولي لا تخجلين مني
- لكيت طريقة حتى اوصل لاهلي
- يا الله يا رب خوش خبر هذا
- اي بس اني لازم اروح
- وين تروحين ؟
- اقصد للموصل لازم اروح
- يااا يمة شيوديج متشوفين بالاخبار شصاير يا كاتل يا مكتول شون تروحين لهناك ولوحدج ؟؟
- شسوي لعد اريد الكاهم وكعدتي هنا ما منها فايدة واذا على وحدي رايحة فهو بدونهم همين اني لوحدي
- بس اقلها سالمة وما بيج شي عاد لخاطر اخوتج ابقي ودزي غيرج
- اخوتي كبار ويعرفون يتصرفون
- الله كريم
- ونعم بالله بس اكو شي ثاني
- شنو ؟
- ما اعرف شون ابلش حجي وياج حيل محرجة

دأاحجي وياها واجاني اتصال رحت لغرفتي حتى اجاوب وكالولي انه تأجلت الطلعة ومو هسة لان الطريق انكشف واخذوه داعش شسوي امري لله سكتت وما حجيت شي من رجعت للحجية سولفتلها وبعد سدينا الموضوع ..

شكيت من احراجها بكلامها وياية هي تريد تكلي اطلعي او ما اكدر اخليج بالبيت بس مكملت كلامها بسبب المكالمة اللي اجتها
خفت عليها لان كالت اروح هي حقها بس وين تريد تلكاهم الاوضاع متبشر بخير و زلم مشوربة دتروح تمشي على رجلها ترجع بتابوت لو اصلا ميلكوهم
دعيتلها كون تلكى اهلها وترتاح من عذابها ويكونون هم بخير لان متستاهل هيج يصير بيها
رجعت وكالتلي انلغت الطلعة وجانت مقهورة ..

بقى ببالي ليش هي مطلقة وشون كدر يعوفها اني من شفتة صح مرتاحيتلة بس هو شكلة كلش يهتم بنفسة ومظهرة يعني اللي يشوفة يكول هو وبس وما اريد اسألها لا تنقهر ..
تفاجئت بيها من على غفلة كعدت تحجي يمكن جانت محتاجة تفضفض وسمعتلها مثل ما هي سمعتلي

- شفتي اللي جانت ويا عادل
- عادل منو يمة ؟
- عادل طليقي
- يعني شفتها بس مركزت وياها كلش جانت يمكن لابسة قصير
- اي عفية هي
- شبيها ؟
- تدرين هاي جانت جوارينا وهسة هي مرتة
- يعني تزوجها عليج ؟؟
- اي
- هااا و شاف بيها يعني حتى وكفتها عوجة؟
- شاف بيها اللي مشافة بية
عادل جان وياية بالجامعة بس غير كلية اني جنت ادرس تمريض وهو ادارة
صار بينا موقف ومن بعدها ظل يحاول يتقرب
جنت واكفة بالمكتبة دنستنسخ اني وصديقاتي وشوية اكو هوسة وازدحام فواحد من الولد طخني بس مو طخة ضربة واجتي بخاصرتي جان ديشاقة ويا صديقة وكعت الملازم من ايدية وتاذيت
حاول يعتذر بس من المي صحت بي كتلة يعني هي هوسة وازدحام شنو هالحركات منك شو هو صار عصبي وظل يتجاسر اني سكتت لان ما عندة اخلاق رجع يشمر بالحجي

* هو انت واكفة تريدين تتطخطخين بية
كام يضحك اني ضجت منة كلش
* احترم نفسك شنو اطخطخ بيك متستحي

بنص الحجي اجة عادل وكام يحجي ويا الولد وصارت مشكلة بعدين من ودونا للعميد اكتشفنا الولد مو ويانة بالجامعة ويصير اقارب واحد من الواكفين رادت تصير مشكلة جبيرة والعميد يريد يعاقب ابو الامنية وعادل باسلوبة حلها والولد اعتذر و راح ...