العجوز والقبيحة

16

#العجوز_والقبيحة16
Shahd Alsalman
بالي مشغول على امي صار كم يوم ماكو والمشكلة حتى صادق ميجاوبني حاولت ادكلهم هواية دولي ونت وكل الطرق ؛

بيوم جنت بالدوام واجاني اتصال من صادق يمكن هذا الاتصال الوحيد اللي ما تمنيت بيوم اسمعة لان ديكلي على خبر وفاة امي ويعزيني بيها من كدما جنت قلق عليها واعصابي تلفانة واجاني هيج خبر  انصدمت حسيت كل شي يفتر بية ووكعت اول مرة بحياتي انهار هيج حتى على والدي ما اتاثرت بهاي الطريقة بس لان جنت يمة ولان اني طالع وعايفها وبالي يمها ومشفتها

اخر شي توقعتة تموت وما اكون يمها ولا اشوفها بعد ولا اسمع صوتها
كعدت والدنيا سودة بعيني جماعتي رتبولي اجازة ولان متفوق وحالة انسانية الدكاترة قدرو وضعي وانطوني مدة حتة احضر جنازتها وارجع اكمل مباقيلي شي واخذ البورد درست طب واختصيت بالجلدية والتجميل ؛
كدرت احصل فيزا بعد اسبوع ورجعت من روسيا للعراق الفاتحة خلصانة وكل شي ماكو يا دوب قطعتها هنا ع الحايط شايلة نعوتها بجيت وانهاريت اكثر حسيت الدنيا كلها واكفة
شكد ردت احضنها وافرحها بشهادتي وتشوف عيادتي اللي حسويها بالعراق 
ليش ما انتظرتيني امي هيج هنت عليج وعفتيني
كلبت بغراضها و حضنت هدومها اشم ريحتها حتى شحاطتها لزمتها وابوس بيها مثل المخبل والله
لا اعتراض على حكمك يا رب

اجازتي بس 10 ايام كتلة لصادق اريد ازور كبرها كال ميصير مو تعرف لازم بعد 40 يوم يالا نكدر نزورها والكبر اصلا ممبني
حتى كبرها ما اشوفة ليش يا رب هيج صار الك بيها حكمة
صادق  هم حزين بس ممتاثر مثلي يمكن هو اقوى مني بهيج مواقف اني ما اتحمل
كمت اسالة شون ماتت وليش هيج كالي ارتفع ضغطها ضربتها جلطة وماتت يعني طبيعية ما اتعذبت بمرض او شي قبل لا تتوفى يلة الحمدلله حتى لا تتذل لفلان وعلان وخاصة هاي كوثر
يعني امي مصارلها اسبوعين وهي لونت ولا يمها صح الوان طوخ لابسة بس مو اسود
ورة كم يوم اجة صادق لغرفة امي جنت مرابط بيها لا اطب ولا اطلع وشايل بيدة ورقة

- اسد لشوكت حتبقى هيج مو انت دتعذبها
- شعذبها صادق هي شلعت كلبي بموتتها
- كافي الله يخليك كول الله يرحمها وخلص
- شلون الك كلب تكولها
- ليش ما كلناها على ابوية وهذا حال الدنيا واحنا لاحكيها مثل ما هي لحكت ابويا
- الله يرحمها
- كوم دنتعشى وكول يا الله
- يا الله
شنو هاي بيدك
-هيج ورقة
- مال شنو
- امي قبل لا تموت كتبت البيت باسمي
- بالعافية عليك
- الله يعافيك بس انت ما اعرف شحطت بأسمك
- خوية ما اريد شي عندي كل شي وخير من الله
اخذ كل الورث اذا اكو
- لا فترة وتعدي ونشوف سالفة الورث
- الله كريم
- يلة كوم دنتعشى
- صادق اريد بيان الوفاة مال امي
- بعدة مطالع شسوي بي
- اريد اشوفة
- ما ادري شوكت يطلع وهسة تدري جمعة وسبت يعني عطلة

سكتت وكمت وياه رحنا نتعشى جوة ومالي نفس اكل وبعد متحملت كطعت سفرتي ورجعت لروسيا مدا اكدر ابقى بعد اكثر احس يخنكني كل شي هنا وممصدك امي راحت وبهيج سرعة ..

جانت ايدي على كلبي لا يعرف اسد شي عن امي او يسال احد و راد مني بيان وفاة بس ما نطيتة لان ما عندي واصلا هي مميتة بس مدام اختفت قررنا اني وكوثر ناخذ البيت ونعلن وفاتها وسوينالها فاتحة طبعا الكل تاثر بالموضوع لان يحبوها وحقهم ما يدرون هي شلعبت بحالي وبحال مرتي
اذتني اني وكوثر وخلتنا نخسر الطفل بسبب جمانة زوجتي الاولى

واني كرهت امي واللي سويتة جان قليل بحقها
الورقة كتبتها كوثر كالت خلي نحمي نفسنا لان اسد اخوك مثل امك ونكلة كتبت البيت باسمك وجانت خوش فكرة واسد مكال شي ولا اعترض الحمدلله
بس توترت من كالي اريد بيان وفاة امي وتحججت بالعطلة وتطول ومن هالحجي وهو همين سافر ما بقى يكول ما اكدر اتحمل اختنكت ..

وصفى البيت النا مرات احس بوحشة واتذكر لمتنا بعدين اتذكر شون امي اذتنا و رادت تهجم بيتي
و هسة مرتاح  و مستقر لا مشاكل ولا قلق
بس ببالي بعدني اكول وين راحت هي ولو مو كلش يهمني بس هاهية هيج اريح ....