العجوز والقبيحة

3

#العجوز_والقبيحة3
Shahd Alsalman
دكيت الباب لان ما عندي مفتاح فتحتلي هي وبمجرد ما فتحت عرفت انه هالريحة من بيتي واكيد هي اللي طابخة بوستها وسلمت عليها وسالت عن صحتها وفتت سبحت وبدلت ع السريع بعد ما اتحمل جوعانة والريحة تخبل طلعتلها مثل المشوهة بس اريد اكل كامت تضحك علية صبتلي وكعدنا ناكل

- خالة ليش تعبتي نفسج وطبختي
- تعبج راحة واسفة لان استعملت الغراض بكيفي بس كلت حتجين تعبانة ولازمج اكل
- خالة حبيبتي صار اكثر من مرة اكلج البيت بيتج لا تعتذرين اني ما اريدج تتعبين ولوما عندي دوام صدكيني اخدمج بعيوني
- الله يسلم عينج ويعمر هالبيت يا رب
- لا تتحسسين مني ما اقصد شي والله
- ان شاء الله

كمت اكل واغفي كلش نعسانة من شافتني خالة كالت كومي ارتاحي ومكدرت اكللها لا او اساعدج كبل رحت نمت ذبيت نفسي ع النوم
العصر كعدتني هي مسوية جاي وطلعت كليجة حميتها و صارت خوش عصرونية وسولفتلها على شغلي وشلون اتحمل هلكد ابات برة وهي كلامها يريح كانو مقدرة تعبي وفاهمة وضعي

صارت الدنيا ليل هي نايمة واني كاعدة لوحدي طلعت جكارة ودا ادخن واتفرج على التلفزيون
طفيتة وظليت بالظلمة على ضوة الكمر ادخن واضرب صفنات وحسبة تجيبني واللوخ توديني
انتبهت لجية خالة طفيت الجكاير احتراما لوجودها بس الدخان معبي المكان ومبين هي جاية مخصوص علية

-بلسم بنتي انت تدخنين ؟
- العفو خالة ضوجتج ريحة الدخان مرة لوخ ادخن بالغرفة كلش اعتذر
- ليش تدخنين ؟
- هيج وحدة اثنين مو هواي

رفعت النفاضة وشافتهة بالكوة لان ظلمة وهي
نظرها على كدها

- مدخنة 7 جكارات ليش هيج ماما تعدمين صحتج
- ما منتبهة اخذني الواهس وتعبانة ردت شي اتسلى بي
- تلعبين بعداد عمرج وتكولين اتسلى
- ههههه خالة فدوة لعينج يعني اذا مدخنت مراح اموت
- مو هيج بس انت ممرضة وتعرفين اكثر مني هالشي غلط ومو زين لصحتج
- اعرف بس مو بيدي تعودت عليها وافرغ بيها
- الله يهديج وتعوفيها يا يمة
- الله كريم
- كومي يلة غسلي وفرشي اسنانج ونامي ارتاحي
- صار خالة وانت هم ارتاحي
- تصبحين على خير
- وانت من اهلة

عافتني وراحت نامت وسويت مثل ما كالتلي ورحت نمت
ثاني يوم بعد ما تريكنا وكملنا المطبخ و كعدنا بالهول مليت من السكتة واريد اعرف شبيها وشنو وراها

- اممم خالة شوفي حبيبتي اريد احجي وياج بموضوع بس لا تتحسسين مني او تاخذيها من غير باب
- اعرف بنيتي ادري بيج تريدين تعرفين شنو قصتي
- بالضبط احجيلي و صدكيني اساعدج بكل شي واذا مكدرت راح احفظ سرج للموت
- يا يمة شكلج والله استحي
- ليش خالة
- اني طلعت من بيتي وانطردت منة بليلة ظلمة
- انطردتي !
- اي يمة هاي تالي التعب والصبر و حك الجزا
- منو طردج
- مرت ابني
- وابنج وينة عنها !
- ...
- لا تبجين خالة فدوة يروح لدموعج
بس كليلي شلون قبل باللي صار
- قبل يمة وتبع مرتة وبعد صار اللي صار 
- خالة شكم ولد عندج
- ولدين
- وابوهم عايش
-لا توفى مصارلة سنتين
- الله يرحمة يا رب
- ويرحم موتاج
- خالة ابنج شسمة الثاني
- اسد
- زين يدري بيج
- لا اسد مسافر وميدري شي وهسة اكيد كلبة نار واني ما اعرف اوصلة
- زين وين جان يتصل عليج
- دولي ومرات على النت
- زين باعي راح احاول ابحثلج عنة بالفيس وانت كليلي صورتة من اشوفلجيا
- شنو هذا الفيس يمة
- خالة فيس يعني شلون الفايبر وسيلة اتصال حتى نلكى الناس ونحجي وياهم
- ان شاء الله يكون بيدج الخير يا يمة

كلبت بالفيس وبحثت عن الاسم كامل انكليزي عربي لقب بدون لقب ما خليت شي يعتب علية بس ما لكيتة ولا واحد  لان هي تشوف الصور مالتهم وتعرفة
طولت بالبحث ساعة وشوية وتالي هي ملت وكالت ماكو عوفي
صار وكت علاجها نطيتها الدوة وخليتها ترتاح لان العلاج ينوم شوي

ما مستغربة من هالحالة اللي مرت بيها لان هواي اشوف واسمع حالات من هالنوع وخاصة انه جان اكو فكرة ببالي افتح دار للمسنين بس ما عندي السيولة الكافية دا احاول اجمع واحط فلوس بالبنك وارتب الوضع ومباقي شي حتى انفذة ان شاء الله
فمخلية بحساباتي اتعامل ويا الموضوع بعقلانية لان اكيد حشوف هواية حالات تفطر الكلب

بس مرات واحد من يشوف الشي كدامة ويعيشة على ارض الواقع يصير صعب
الرأي اللي ممكن يكون مثالي كلش بساعة اللي نكولة  مراح يشبه التصرف اللي يصير بلحظة اصطدامنا بالحقيقة وهالشي عشتة باكثر من موقف وتعلمتة وواجهتة هواية
يعني مثلا من نكول مراح نتاثر اذا تعرضنا لخيانة وراح ننسى هالشخص لان ميستاهل بس الواقع من يصير بينا هيج نتأذى وناخذ فترة وسنين لحد ما نتأقلم ومراح ننسى لا الشخص ولا الخيانة
لكن دائما ادعي من الله انه يخليني كد هالمسؤولية واكدر اساعد كل شخص جحد باهلة وذبهم بتالي عمرهم يكضون بقية حياتهم بالحسرات والقهر ..