العجوز والقبيحة

22

#العجوز_والقبيحة22
Shahd Alsalman
كل يوم اسمع قصة شكل تقهر وتوجع الكلب اللي طارديها بناتها واللي ولدة متعدين علي بالضرب واللي جناتهم ما متحملاتهم لان مرضى
واللي واللي اشكال والوان
جنت اشوف هالشغلات بالتلفزيون والمسلسلات اكول سترك ربي الحمدلله ما عدنا هيج هنا ثاري الانسان كل ما يعيش اكثر يشوف اكثر
عبالي بعدها الدنيا بخير والناس طيبة والاولاد عدهم بر باهاليهم بس لا كل يوم تحي حالة اتعس من القبلها واني من ضمنهم
اللي يموت الانسان هو القهر والهم مو المرض ولا قلة العافية
كلنا همنا بكد الجبال ومدنتحملة لا احنا صغار ونتأقلم ولا احنا اللي عدنا قابلية حتى نكول تكضي وتعدي
هي كم يوم ونقابل بيها رب العالمين بس معقولة تاليها نكضيها بهالدار مثل اللي لا خلفو و لا صار عدهم ضنا او صار وما عرفو يربو
مرات من قهري اتحسب على ولدي بعدين اسكت واكول لا وارجع ادعيلهم مو بيدي كلبي يحن عليهم واخاف لا رب العالمين يضوكهم من اللي ضكتة

بيني وبين نفسي حيل اشتاق لبلسم واكول بلكي تكون بخير و اتذكرها هواية واحس بنغزة من اتذكرها ما اعرف ليش عندي احساس دائما هي مو زينة او خلي نكول كلبي مقبوض عليها وما اريد اتفاول بشي بس خايفة كلش و شكد مر وكت ما سالت علية وادري بيها لو راجعة جان دورتلي بهيج اماكن

صحتي تدهورت هواية خلال هالشهور الفاتت يحيرون بية خطية وشكد يداروني بس اني اعرف نفسي من اظل افكر ومقهورة ما اكدر اتعافى وابقى هيج
كمت كل يوم اتخربط ويصعد ضغطي او سكري او مرات اوكع ووكعة الجبير صعبة للن اذا انكسر بية شي ما اكدر اتعالج منة ويعني ممكن اموت بسببة
بحكم عندي السكر

فد يوم كالو حتجي مجموعة طبية تعاقدنا وياهم حتى يكونون مسؤولين عن صحتنا ومنحتاج ندز على اي دكتور اقلها من نسوي هيج راح يكون الطبيب عندة علم بكل امراضنا
اجتي المجموعة الكالو عنها وما شاء الله كلهم شباب
تخيلت اسد المفروض يكون هسة مثلهم طبيب والة مركزة بس سبحان الله ما شفت هاليوم الجنت احلم بي اني وابو ...

رحنا لدار مسنين هم ادارة المستشفى اختارونا 7 اطباء ووزعونا على الكبار الموجودين
اني اختاريت 10 مرضى اتابع حالتهم التقيت بكل واحد بيهم وطلبت من ادارة الدار صور الهم حتى اخليهة على الفايل لان سويت لكل واحد بيهم تقرير طبي يخصة اسمة عمرة وحالتة الصحية هيج يعني حتى اكدر احفظهم وبنفس الوقت اسجل بي
انقهرت عليهم بس اني لازم اكوي كلبي شوية حتى اكدر اعالجهم وبنفس الوقت ارفع من معنوياتهم لان نص المسنين اذا مو كلهم امراضهم بسبب حالتهم النفسية ..

رجعت حجيت لأسد على هالموضوع وكالي احسنلك تسوي برنامج وتخلي بي بيانات المرضى اليخصوك حتى اللي بالعيادة وتبوبهم بحيث يكونون مقسمين مرضى المستشفى ومرضى الدور اللي تروحلها ومرضى العيادة مستقبلا وفعلا فكرتة حلوة ومرتبة احسن من الاوراق بس اني ما عندي هذا الوقت واا اكدر اسوي هيج شي وكتلة حخلي مبرمج يسوي الي كالي نكدر نروح لجمانة هو هذا اختصاصها اصلا استحيت خاف ازاحمها بس هي فرصة جانت حتى اشوفها مرة ثانية وشرطت علي تاخذ فلوس مقابيل هالبرنامج ووافق ...

دك عليها لان هي انطتة رقمها من ذيج المرة هو طلبة منها و كاللها وقبلت تسوي وعلساس نروحلها اني وهو بس صار عندة شغل وكالي روح انت وحدك وتلاكينا بالمطعم المقابيل دائرتهم علمود وكت استراحتها
- سلام عليكم
- هلا وعليكم السلام
- طبعا جدا اعتذر دا اخذ من وقتج وازعجج بس اسد اصر لان كال هذا اختصاصج
- لا بالعكس تأمرون امر انت واسد
- الله يسلمج صدك اسد
- اي خابرني وكالي ما اكدر اجي
- ها خوش
خلي نطلب اكل شحابة تاكلين
- كيفك مو مشكلة

دزينا على لفات وكعدت اشرحلها شنو الاريدة بالضبط وهي ساعدتني بافكارها بس الصراحة مو كل الحجي اتذكرة ولا افتهمة لان جنت سرحان بيها اتغدينا وسولفنا شوية وتناقشنا على موضوع الفلوس وهي مقبلت تاخذ كالت انت من طرف اسد ومرضت ..
كملنا شغلنا واخذت هي الحاسبة وطلبت رقم تلفونها حتى نكدر نتواصل كالتلي كم يوم وادكلك حتى اسلمك الحاسبة والبرنامج وهمين حتى اعلمك علي
ما ادري ليش احس نفسي منتعش وكأنو نستني كل شي اهلي اختي تعب الشغل نسيت كل همي وياها عبالك سحر بيها هالبنية ...