مسيرون

3

#مسيرون3
Shahd Alsalman
اليوم جمعة ومثل كل جمعة اللمة تكون يا اما عدنا او يم بيت خالي نصلي سوة وناكل سوة ونحجي سوة
كل شي بحياتنا من جنا صغار لحد اليوم نسويه سوة حتى زواجنا ودراساتنا وتوجهاتنا ما بيها اي اختلاف الولد يدرسون اختصاص وحيد اللي هو اداري ومالي علمود الشغل والبنات سادس ويبطلون وزواجنا محدد احنا ناخذ من بيت خالي ووولدهم ياخذون منا
ما اعرف اذا كلهم يفكرون باللي اني افكر بي او لا واللي افكر بي مو صعب لا وانما مستحيل وممنوع انه اختار حياتي مثل ما اريد
اني ما انكر هالشي اللي ديخططو اهلنا هو لمصلحتنا وحتى يبقى الخير والحلال وميروح لغيرنا او نخسرة ونظل ع الحديدة بس مع هذا احس نفسي مسير بكل شي ما مخير بأي شي حتى اصدقائي لازم اختارهم من نفس طبقتي ممنوع يكونون اقل حتى في حالة اهلي احتاجو اهلهم بموضوع معين يسندوهم دائما جانو يدورون على اللي يفيدهم واللي يجرب يستفاد منهم يتركوه ويمحوه من قائمة معارفهم يعني يريدون يضيفون لجاههم ومالهم سلطة ما تنتهي للابد وعن طريقنا احنا يحققون هالشي حتى يبقى النا حسب كلامهم ..

اللي ادور عنة وافكر بي هو المشاعر والاحساس اني منحرمت من شي لا فلوس ولا طبات ولا طلعات ولا لبس ولا حتى سيارة كل شي جان عندي وبيدي واللي اريدة الكاه لان على كولة ابوية اذا عندك فلوس ومال وايدك وجيوبك مليانة كل شي تكدر تشتري حتى الناس

بس ما حسيت بيوم من الايام اني مستمتع بكل هذا جنت دائما وبعدني ادور على شي يملي بداخلي فراغ المحبة والحنية اهلي اكيد يحبوني بس محبة عادية ما بيها اي تنازلات
مو مثل اللي اشوفها بالكلية 3 سنوات وهسة اني مرحلة رابعة شفت انواع المحبين والعشاق وشفت اللي يحب من صدك واللي يلعب واللي يعجبة احد بس ميكول واللي راح وخطب وايدة بيدها طول الوكت وخططو حياتهم سوية بدون اي تدخل واللي حبو وتركو لان متفاهمو هذي المشاعر جنت اتمنى اجربها بس للاسف اني ممنوع عنها لاني مرتبط بانسانة بيني وبينها صلة رحم وقرابة ودم لكن ابد مجان هذا الارتباط بي حب او احساس
و مثلي مثل اخواني واخوانها كل واحد ماخذ اللي اهلنا اختارو النا

ابدا ما اعيب ببنت خالي او انتقص منها او رفضي وعدم تقبلي الها نابع من كراهية او نفور بالعكس بس ما اكدر اتخيلها زوجتي او حبيبتي او حتى شخص مقرب مني باعتبار هي حتكمل وياية والمشكلة الاكبر اني احس هي متطيقني وممتقبلتني لان دائما مينا مختلفة جنا من صغار نلعب كلنا سوة الا هي تكعد تقرة او تكعد تكتشف شغلات بالحديقة احسها انسانة الية روبوت بدون عواطف متوجهة لدراستها ودائما اسال نفسي ليش هي تقرة وتكتب وتسوي كل هذا وبالنهاية حتعوف كل شي وتكعد بالبيت واني اكيد مراح اخليها تكمل لان اهلي مراح يقبلون وما بية وجع راس ودوخة وعصبية اهلي علية ..

احس من يكولولها مثلا واحنا ع الاكل كاعدين صبي لرجلج ضياء ماعون تختنك و تتضايق يمكن هم ميحسون بهذا الشي بس اني اعرفة واشوفة واضح بعينها حتى بعد متصبلي تنطيني الاكل بلا متباوع او تبتسم او تحسسني انه هي من كل كلبها صبتة وشوي وتكوم من الاكل كانه تنتظر ينسون اللي طلبو منها لدقايق ويلتهون بغير شغلة حتى مينتبهون عليها ..
هي هواية مواقف صارت بيناتنا واني باعتبار انه مالي غيرها عروس ولا مختار ثانية فحاولت باخر سنة دراسة اركز اكثر وياها على امل انه احس شي تجاهها او هي تحس وتشتعل هالشرارة اللي يسموها شرارة الحب حتى اكدر اكمل بقية حياتي ويا زوجة متكاملة لان مينا حلوة و كلش جذابة كشكل احلى كل بناتنا وبنفس الوقت ذكية وام بيت حسب كلام و نظرة امي عنها واللي ينقصها بنظري هي المشاعر ...