مسيرون

17

#مسيرون17
Shahd Alsalman
شهر فات على غياب والدي وبعد 10 ايام تصير الاربعين وهو نفس الاربعين اللي يفصل بيني وبين ضياء
كل شي باهت وما بي اي حياة ولا طعم احس اتغيرت هواية مو مثل اول ولا اني اللي اكدر ابجي بحركة ولا اضحك بكل قوتي
ماكو شي اسوي الا اشتغل بالبيت اللي طفى نورة من بعد عين ابويا حتى اصواتنا ما تطلع كل واحد بينا مواجه الفقد على طريقتة
امي اعتزلت الدنيا كلها والتزمت بالعدة وليل نهار تبجي وحاضنة الصور وتشم بهدومة وتردد ليش عفتني
وحالها مو احسن من اختي اللي كامت تشرب حبوب مهدئة حتى تكدر تغفى وتنام ومتقبل تدرس او تطلع او تسوي اي شي غير البجي انصدمت لان هي جانت مدللة بابا والصغيرة لهذا فقدتة من وكت احنا اقلها كدرنا نحصل على مدة اطول وياه بس هي بعدها وتحتاجة اكثر من اي واحد منا
حتى من اخويا اللي يداري حزنة ويحاول يكون هو رجال البيت دفن نفسة بالشغل ومتطلبات البيت زادت مسؤولياتة ويحس دائما هو مقصر بحقنا وميريد ينقص شي علينا وكأنه تقمص شخصية ودور بابا حتى يعوض النقص اللي صار عندة قبل لا يصير عدنا ..

استمريت بداومي ومنين ما اندار اتذكر ضياء ما بطل اتصالات ولا مسجات وكل ما احضرة ارجع اشيل الحضر عنة يمكن اني ما اجاوبة صح بس احسة موجود وياية محتاجة لكلامة ولشوفتة اريد اذب حملي كلة علي اريد اعاتبة واريد الصار كلة يكون عبارة عن حلم مخيف وراح اكعد منة بيوم ويكون هو الي ما يتركني ولا غيري تصير حلالة
ويرجع ياخذني من بيت اهلي وابويا يسلمني بيدة الة ..
بس كل هذا وهم الاماني ..

بعد ما عدة الاربعين فتت للكلية بلبسي الاسود ووجهي جان تعبان واصلا ذبلت وضعفت كلش بعد كل الصار شفت هاشم كدامي حاولت اتهرب منة حتى ما اواجهة صارت مشاعر الخجل من علاقتي بضياء تلاحكني لان ما جنت اتصور هيج راح انخذل منة
- منار شلونج
- هلو هاشم الحمدلله وانت
- الحمدلله خير لابسة اسود ؟
- بابا توفى
- الى رحمة الله والله ما ادري جنت مسافر ورة ما خلصت امتحانات بيوم وبارحة يالا رجعت البقاء لله
- تسلم
- شخبارج انت اليوم ضياء والولد راح يجون اتفقت وياهم لان من سافرت متصلت بأي احد لهذا معرفت بوفاة والدج
- ان شاء الله من رخصتك عندي محاضرة
- اعتذر اخرتج واي شي تحتاجين امانة كولي اني اخوج لا تشيلين هم كلنا لهالطريق
- متقصر اشكرك
مع السلامة
- مع السلامة

توقعت هاشم يدري بزواج ضياء بس من كلامة افتهمت هو ميدري باللي بيناتنا وميدري احنا تركنا
من سمعت اسم ضياء فز كلبي لاول مرة بعد ما حسيتة مات كل ذيج الفترة
نبضة مشت بكل جسمي مثل الكهرباء خلت حيلي ينهد ورجعت استقرت بنص كلبي
اخذت اول محاضرة وردت اطلع حتى لا اشوفة ما اريد برغم ميتة ومحتاجتلة بس ما اريد
اخذت الاستنساخ من المكتبة ومشيت بسرعة للباب حتى اطلع مثل اللي مهزومة من شي وخايفة لا تنلزم
و انلزمت وصار وجهة بوجهي اللي بيناتنا عبارة عن 5 سانتيمات هذا هو القرب الظاهر للكل
واللي ممبين هو البعد اللي صاير بارواحنا كأنه كل واحد بقارة
ارتبكت نظرات عيونا واحنا نحاول نحجي كل شي اللي نريدة من خلالها لان ماكو وقت نبقى على هالوضع
صاح اسمي ومجاوبتة وخرت من عندة بخطوة وحدة ليورة وتقدمت باتجاه اليسار حتى اروح منة وطلعت لحكني وصار قريب مني من دارني علي

- منار حبيبتي اسف والله اسف ليش هيج صايرة شبيج كلة من وراية ادري بس ليش تاذين نفسج
- وخر عني
- منار اني ما استاهل يصير هيج بيج من وراية اني واحد حقير بس والله مجبور وحق كلشي بيناتنا مجبور
- انت شمتخيل نفسك الدنيا تدور حواليك وبس لو انت محور الكون لو فد انسان ميتكرر حتى اموت اني من بعدك
- حقج بكل شي دتكولي
- مو انت التقرر حقي او مو حقي انت واحد بلا رحمة ولا كلب تضحك على الدنيا كلها بكلامك بس مو غبية لدرجة انخدع بيك مرتين ولا بلا عقل حتى اموت نفسي من الهم انت اصغر واتفه من انه اخليلك هيج اعتبار
- منار لهاي الدرجة كارهتني
- اذا اكرهك معناها انت ببالي بعدك بس انت هسة انسان غريب عني ما اعرفك ولو صارت صدفة ثانية ما اريد اتعرف بيك
...