مسيرون

23

#مسيرون23
Shahd Alsalman
بعد مدة قبلت ام منار وصار لازم نتحرك قبل لا تخلص سنة ابوها ونبدي بخطة  حتى يقبلون اهل ضياء بهذا الموضوع والخطة جانت باتفاق اتوصلنا الة اني وضياء وبعد ما رتبنا افكارنا و الشي اللي راح نكولة الهم
رحنا يم بيت اهلة يعني بيت عمتي وجان يوم جمعة يعني كلنا ملتمين وموجودين وبلش ضياء بالحجي والكل منتبه لكلامة
- طبعا يا جماعة اليوم اريد استغل فرصة انه احنا ملتمين حتى ابلغكم عن قرار اخذناه اني ومينا
- خير يمة
- خير كل خير بصراحة ومن الاخير حتى بلا مقدمات
اني قررت اتزوج
كلهم بكلمة وحدة وصوت واحد كالو
- شنوو ؟؟؟
علامات الذهول والصدمة مرسومة على تعابير وجههم وخاصة بابا اللي بلش يسالة هو وابوه
- ليش تتزوج على بنتي ؟؟
- ضياء شنو هالسالفة السخيفة منك ؟
- خالي ؛  يابة هالشي بالاتفاق صار وماكو اي كذب او شقا اني محتاج اتزوج مرة ثانية ومينا راضية
- بنتي فهميني شديحجي رجلج شصاير بينكم وهيج يريد يسوي ؟
- ماما اني وضياء ما بيناتنا شي بس كل الموضوع انه ما اكدر اخلف وعندي مشاكل هواية اقصد امراض وهو من حقة يشوف حياتة وجهالة شلون امنعة والشرع حلل اربعة الة
- يعني انت كل عقلج راضية ؟؟ 
- اي طبعا اذا رجلي يرتاح معناها اني ارتاح وهالشي مراح يأثر علينا
- متحجين شي ام سدير ابنج شديخربط
- شحجي بعد مخططين ومكملين وجايين يبلغونا وعاد انت لاكي مرة لو تريد ندور لحضرة جنابك
- يوم هسة احنا هذا اللي صار ونريد نكللكم واني مو  صغير
متزوج وفاهم شدا اسوي والبنية اني ما ظالمها هياتها موافقة وبلا اي ضغط
- يا ما ظالمها تريد تحط مرة على بتي وتكلي ما ظالمها وبعدين شنو الامراض العدها هيج متصبر حتى تتعالج كبل تتزوج عليها
- ضياء مراح يتزوج علية حنتطلك وهو يشوف حياتة
- شنوووووو ؟؟؟،
ولج انت عقلج بي شي نوب تتطلكين
- بنتي سافرو تعالجي برة وعلى حسابي مراح يصير شي اذا انتظرتو بعد خما من اول سنة يصير شي عادي هواية ينتظرون
- ماكو امل ولا اكو  داعي للانتظار رجال يريد يشوف حياتة واني مقدرة وضعة وخلص
- باعو علية انت وياها هالموضوع تسدوه وما اسمع هالحجي منكم انت لمينا ومينا الك وماكو زواج ثاني تنتظر وتجيك خلفة
- واذا ما اجت وضاع عمري بالانتظار
- و شنو ذنب بنتي ؟؟
- ما ذنبها شي خالي بس هاي قسمتها هيج ميصير عدها جهال حاولنا نعالجها من اول شهر وماكو امل شبيدي اني
- حسبي الله ونعم الوكيل بيك يا ضياء
- هاي شبيج نجلاء تتحسبين على ابني كدامي
- لعد شسويلة اركصلة لو ابوسة على هالحجي
- اي وتدعين علي وتتحسبين
- جان استحى يحجي هالحجي كدامنا هو هذا العشم مو هدية
- يا جماعة صلو ع النبي وماكو داعي للصياح والعصبية
- ماكو داعي مو
طبعا لو صاير باختك هيج جان كلبتو الدنيا على راسنا بس الكم حلال ولغيركم حرام
- خالة شنو السالفة انت ليش عصبية هيج
- ولك والله لا اخليك تبوس الايادي وارجعلك مينا
- شيبوس عيني نجلاء وعلى شنو يرجعها
- ها هسة صارت بنتي كخة وما تعجب مو
- ما كلت هيج بس انت زودتيها كلش
- لا زودتها ولا شي اني اخذ بنتي واروح وبيتكم ما ادوسة وخلي ببالج اسيل راجعتلكم ما اريدها جنة الي بعد
- نجلااااء
عاط ابويا بأمي وسكتها هي تخاف من عصبيتة ومكدرت تكمل
- كافي لغوة زايدة يلة كدامي للبيت
- خالي مينا متروح وياكم ترجع وياية
- لا مترجع دزلها ورقتها
- ها شدتحجي يا خويا كول يا الله خل ترجع مينا ويا ضياء ومن تهدى الامور نحجي لا تتسرع
- بابا ما ارجع رايحة ويا رجلي روحو انتو وارتاحو
باوعني ابويا بعصبية و دار وجهة و راح حتى ما علق شي وامي تبجي واعصاب والباقين يباوعون علينا ممصدكين اللي صار كلة
سلمنا عليهم وطلعنا لبيتنا وبنص الطريق كمت اضحك بصوت عالي وضياء ضحك على ضحكي
- هههههههههه شفت شصار بيهم ؟
- هههههههه اي بس ترة امي وامج انكلبو حموات على غفلة هههههههه
- ههههههههه كامت وحدة تعدد للوخ
- هههههههههههه
- هههههههههه
تدري مدا اصدك شكد خايفين على موضوع الاملاك لدرجة ربكهم زواجك وطلاكي منك
- المشكلة مديفتهمون احنا كشفناهم ولو باجر راح يبدون يألفون قصة جديدة
- اني عن نفسي راح اتعامل ويا اهلي بدور الزوجة المثالية واللي مخلية كل الامور بيد زوجها ومتقبلة كل شي حتى ما اناقشهم
- واني مستعد ينذب كل شي براسي يكفي لهسة اللي سويتي وياية ما انسالجيا للموت والله
- ما سويت شي بس كل جرف كبالة شاطي هم خدعونا وهاي النتيجة
- بعد راح استغل موضوع عصبية امي من امج والعب ع الوتر الحساس
- الله يسهل عليكم ويجمعكم
- امين يا رب
وصلنا البيت  بدلنا هدومنا وفتنا نمنا مرتاحين كأنما انتقامنا منهم جان مريح لدرجة متخلينا نفكر بوضعهم ابد و لا يرفلنا جفن ...