مسيرون

7

#مسيرون7
Shahd Alsalman
تكررت لقاءاتنا واغلبها سلام بتلويح الايد من بعيد وابتسامة فرحانة مني ومنها
من اشوفها احس الكون اختفى وتلاشو كل الناس وبس هي كدامي ما اسمع ولا صوت و لا احس بوجود اي بشر حتى نظري متوجه بس الها ..

شفتها بيوم تبجي وتمشي بسرعة متوجهة لباب الكلية وطلعت كمت بسرعة وراها ولحكتها
- منااار
مناار
- ها ضياء
- شبيج تبجين شصاير
- بابا بالمستشفى
- شبي خير
- ما ادري متخربط ومودي
- امشي اوصلج
- ما اريد شكرا هسة اخذ تكسي
وين راحو التكاسي اختفو
- خلص اهدي انتظريني شوي وراجعلج
رحت جبت السيارة واجيت لكيتها مموجودة منتظرتني واكيد شافت تكسي وراحت
بقيت افكر خاف صارلها شي هي او ابوها وما اكدر اسأل عنها احد حتى صديقاتها ظليت بهذا القلق لمدة اسبوع وزادن عليها يومين العطلة وهي ماكو متداوم
رحت داومت وكلي ضوجة وتعب حتة شهيتي قلت و ردت اعرف وين هي اول ما فتت لكيت شلتها ملتمة ويتباوسون فتحت عيني وشفتها هي موجودة ودتسلم عليهم بقيت واكف بلكت تجي وتحجيلي شصار وياها بس ما اجتي مشافتني اصلا وراحت هي والبنات
واني هم دخلت محاضرة وبنص المحاضرة طلبت اطلع من الدكتور لان حسيت بخنكة واتضايقت
رحت كعدت بالنادي وحدي ودا اكلب بالتلفون على ولا شي حتى ما اعرف على يا تطبيق داخل مسطور
وانجر الكرسي من كدامي وكعدت منار يمي
- صباح الخير
- صباح النور
- شلونك طبعا اني اعتذر عن ذيج المرة بس مكدرت اصبر وعفتك و رحت
- عادي مو مشكلة شلون صار والدج
- الحمدلله زين جانت جلطة والله سترة
- حمدلله على سلامتة
- الله يسلمك
بيك شي ؟؟
- لا
- تمام اترخص اني و شكرا واعتذر مرة ثانية
- الله وياج
لازم تحس انه اني زعلان منها ومهاضم التصرف السوتة ردت شوي الفت انتباهها علية
وفعلا اللي ردتة صار واجتي مرة ثانية واعتذرت ومنها بدينا نتعرف على بعض وصرت انتزرها وتنتظرني يعني تقربنا كأصدقاء وتعرفت بشلتها مريم و غيداء و تسنيم وهم همين تعرفو على جماعتي صرنا تقريبا شلة وحدة وحلوة الوحيدين اللي كلش مقربين من بعض هو اني و منار ..
اول ايام جنت دائما اريد اعرف عنها كل شي وهي همين بس اني احب اسمعلها اكثر
عرفت انه امها مخلصة ماجستير وابوها مخلص دكتوراه ويشتغلون اثنينهم بنفس الجامعة بس شوية وضع ابوها الصحي تعبان هالفترة وعدها اخت وحدة اسمها سارة تدرس اعدادية واخ واحد اكبر منهم اسمة كرم مهندس ويشتغل بشركة مقاولات انشائية
هذا اللي عرفتة عنها بشكل عام اما بشكل خاص جنت كل يوم اكتشف شغلة حلوة بيها بنية مليانة تفاؤل وحب وتساعد الكل ولسانها يلين اكبر واحد قافل ودائما ابتسامتها على وجهها متفاركها وعدها نشاطات بالكلية وتقريبا اغلبية الطلاب والطالبات يعرفوها يعني من نمشي ميبقى احد ميسلم عليها
وهي ترد السلام وابد ما عدها تكبر او غرور
طلبت مني اساعدها بموضوع السفرة الجماعية لطلاب الجامعة حتى نعمم هالاعلان ع الكل
- يا سفرة ؟
- شنو يا سفرة حتتخرج هالسنة ومتعرف احنا هالسفرة نسويها جماعية وخلي نكول هي تقليد للكلية
- بصراحة لا
- اكلك شي بس متزعل
- حتكليلي انت معقد مو
- اممم يعني بصراحة اي لان ما احسك عايش حياة الكلية لا تعرف اكل النادي لا تعرف طلاب غير هاشم وعبود و...
- وما اعرف هواية اساتذة وما ابقى بالكلية هواية وحتى المحاضرات على كدها وخلص
- يعني ما ادري يكولون حياة الكلية احلى حياة واجمل فترة بحياة كل واحد بس انت ما اعرف شون عايشها
- اني مو معقد ابد بس ما عندي وقت لكل هذا ولا متفرغ لهيج اجواء
- ليش متزوج وعندك 15 جاهل بركبتك
- هههههههههه لا مو هيج
بس عندي شغلي ماخذ كل وقتي وتفكيري وفعلا ما منتبه على كل الكلتي وعندي الونسة هي اخر يوم بالاسبوع بيوم العطلة اشوف بيها الولد وهيج مكضي حياتي
- بس هيج اشوفها مملة لان انت دتعيش فترة على حساب فترة
- شتقصدين مفتهمت
- يعني تعيش بس لشغلك اللي ممكن تسوي بعد الكلية او على اقل تقدير تخلي الشغل حاليا ثانوي وتلحك ع التعب مراح يطير وراح توصل مرحلة تكوم تشتاق للراحة ولهيج ايام وتتندم انه معشتها
- اللي مثلي ميصير يعرف الندم
- ليش
- ولا شي كومي يلا نسوي الدعاية خلي تكون اول تجربة الي وياج اذا حبيتها اساعدج بعد
- واذا محبيتها
- امممم ابقى وياج وهم احبها ههههه
- ههههههه يلة كوم
رحنا افترينا على الاقسام وخلينا الاعلانات على لوحاتهم وبديت اتعرف على الشباب و البنات الموجودين جانت اجواء حلوة ومختلفة احس فعلا اليوم الة قيمة وطول الوكت اكو فد حركة غريبة ممجربها قبل وحلوة صارت عندي كعدة الصبح الها معنى والها هدف مو هيج امشي مسير وكأنما الحياة واكفة واني كوة امشيها ....