مسيرون

36 والاخير

#مسيرون36
#النهاية
Shahd Alsalman
بعد كل هالسنين انجمعت اني واخوية بغرفة مستشفى صغيرة بدل ما احضنة حاضنتة اجهزة طبية
كل شي حوالينا بارد عكس كلوبنا اللي مشتعلة نار فركة و كراهية وبعد
يمكن هم كرهوني بس اني منسيتهم ولا يوم وجنت اتمنى نرجع مثل اول بس شلون وهم طردوني وجرحوني تنازلو عني لان ما سويت اللي هم يريدوه
وكفت يم راسة ونزلت دموعي لزمت ايدة واختنك كل الحجي بالبجي
- رافد حبيبي اخوية وسندي انت هنا واني واكفة على حيلي
انطيك من حيلي خويا والله بس اصحى
تدري
اني منسيتك ولا يوم والله اتذكر من تدافعلي من الولد اليضوجوني
ولمن تفكني من ايد هدية جانت تضربني وترجع انت تصالحني عليها
كوم اصالحك وصالحني انت عليها
كوم لا تكسرني هسة اني بحاجتك لا تعوفني مثل قبل اني ادري انت انجبرت تمشي وياهم وما الومك بس اذيتني لان جنت الي سند وظهر حسيت بالكسرة والتعب من بعد ما عفتوني
رافد دتشوفني ؟؟
- صابرين خيتي
- عيون خيتك كوم ارجعلي الله يخليك
- سامحيني خذلتج
- الله يسامحنا جميع
- سامحيني
- مسامحتك ومبري الذمة
- صابرين
- لا تحجي تتعب
- ضميت حصتج عن العائلة ملعبت بيها ابد
وهسة تلكيها باسمج موجودة وحتى ولدج خليتلهم حسابات وقطع ارض
- ليش ؟
- حقج وحقهم
ابنج بكلة وحدة علمود بنتي
شنطي قليل عليكم
- فدوة الك كل شي يا غالي كوملي بالسلامة ما اريد شي
- سامحيني ابريني الذمة وخلي الكل يبروني الذمة
- مبري الذمة ومسامح دنيا واخرة
رافد
رافد
ولج يمممة خويا كوم
فاتت الممرضة وحاولت تسعفة هي والطبيب وكفت وراهم بس ..
مات
اخوية وسندي راح مني
طلتعلهم صافنة ودموعي تارسة وجهي اجر النفس كوة هاي تالي الزعل والكطعة اشوف يوم وفاتة ويموت بين ايدية بعدنا ما حاجين ولا متعاتبين ولا حضنتة و لاشبعت من ريحتة

فلوس غيرت نفوس وتقاليد كطعت علاقات ما ممكن تتعوض بيوم و لا يرجع الزمن وتنعاد
ظليت ابجي واندب اخوية والكل يبجون وياية الصياح ملا المكان واخذنة جثتة لبيتة اخر مرة القهر ذبحني بناتة وولدة يبجون علي ونجلاء تتخربط كل شوية لان راح بدون ميسامحها
وهدية اختي اللي لهسة ما حطت عيني بعينها ولا حضنتني ولا حضنتها كاتلها القهر
باول يوم بعد الفاتحة اتلاكينا بالمطبخ اني وهي
- هدية شلونج
- الحمدلله
- تعبانة تريدين شي
- لا رايحة انام
- تعالي يمي اكعدي
- مو ..
- تعالي
اجت كعدت يمي ونزلت كعدت ع الكاع وخليت راسي بحضنها
- لعبي بشعري مثل قبل اني تعبانة ومحتاجة ارتاح هواية
- صابرين
كامت تبجي وايدها على راسي واني ابجي وياها
- اني ادري ليش انت متريدين تتقربين مني
علمود كامل ترة والله العظيم اني اشوفة اخوية ويوم اللي كتلج اني معجبة بي لان جنت صغيرة ومراهقة جنت احب شكلة ولبسة العسكري من يرجع من العسكرية
- اني حرمتج منة
- ابد اني زوجي عوضني عن كل شي حتى عنكم برغم احن واشتاق وروحي تفرفح عليكم
لا تخافين ابد ما افكر بكامل ادري بيج تحبي وتعشكي واني عشكت المرحوم وعشت وياه احلى ايام واحس بيج والله
- اأااخ يا خيتي مشتاقتلج والمكابر ذبحني
- احضنيني حيل ما بقالي الا انت والله ما بية بعد فراك واذية
بجينا و حضنتها حيل وتسامحنا بيناتنا
الاهل نعمة والاخت والاخ ما يجي مكانهم اي احد
كضى الليل علينا بالسوالف والذكريات بين البجي وبين الضحك وبين الحنين ونتذكر رافد
حجتلي عن كل سنين الغياب بيناتنا والحجي يطول ما حسيت نفسي الا وغافية بحضنها مثل قبل من جنت اخاف من شي برغم قاسية علية بس احب انام يمها احس بامان بحضنها ونمت نومة عوضت بيها كل السنين الراحت  و رحت لامي يم خوالي وتصالحت وياها برغم هي تعاني من زهايمر بمرحلة متقدمة ومعرفتني بس اني اعرفها واحبها و هالشي يكفيني  ...

خلصت الفاتحة ومرت ايام وشهور و رجعنا نلتم و كلب على كلب ونروح ونجي واحد ع اللاخ ردت ايام اول الية والهم الكل غلط واتعلم من غلطة ..

حسيت بمينا و بارق واحد قريب من اللاخ اذا نعوفهم وحدهم يظلون كاعدين ويحجون بكومة مواضيع بحيث يندمجون وميدرون بنفسهم شكد مر وكت عليهم
كتلة لبارق اول متطلع سنة ابوها اخطبها الك بس لا تكللها شي وفعلا اول ما خلصت السنة خطبتها ومرتاحين سوة ...

سنا كملت دراسة واشتغلت وبالشغل تعرفت على واحد وانخطبت الة ..

ضياء ومنار حيصير عدهم طفل ثاني وع الاغلب ولد كالو نسمي على اسم خالو رافد ..

لينا وسدير بعد ما كشفت مينا اوراق زواجهم قررو ينفصلون عن بعض وكلمن يشوف حياتة رجع لحبيبتة اللي كالو مرت بأزمة نفسية واتزوجها
ولينا رادت تكمل دراسة و من بعدها تشتغل
ويمكن تلكى حبها بمرور الايام او ع الاقل تتزوج من شخص مقتنعة بي و هو مقتنع بيها

اسيل وسند ظلو سوة لان بعد ما تزوجو واحد حب اللاخ وصار عدهم طفل مرتاحين سوة وعلاقتهم حلوة كلش ..

ومودة اتزوجت اخو زوج بنتي ميساء اللي جان ديدور على بنية وسافرت وياه وكملت دراستها بكندا
و تكول انه هي مرتاحة وياه واني اعرف اهل زوج بنتي خوش ناس لهذا مأمنة عليها ..

و زينة دتكمل دراسة و تريد تاخذ الماجستير هذا اللي اختارتة هي ..

وفهد كمل كلية و اشتغل وقرر يسافر يطور شغلة و يستقر بامريكا ..

من بعد ما كسرنا كل القيود والتقاليد الوهمية اللي ربطنا نفسنا بيها واللي باعدتنا وفرقت الاخوة والاهل وخلتنا واحد يكره الثاني ويحقد ع الثاني
وجان مبدأ خيرنا ميروح لغيرنا هو اللي ماشي بعائلتنا وهو نفسة اللي ما شفنة منة اي خير بس شر وتعاسة و لازم منحجي ولا نسمع  ولانشوف غير اللي مخطط النا ..

العائلة اللي تنبني على الحب والمودة يبقى اساسها قوي وما يغيرة اي شي ولا يهتز لاي سبب كان بالعكس يتماسك اكثر واكثر حتى لا تصير فركة
واذا انبنت على مادة وفلوس ومصلحة كل واحد بينا راح يشوف وين مصلحتة ويروح وينهدم البناء على هالاساس ومراح يبقى الا حطام ما يتصلح بيوم ..