مسيرون

9

#مسيرون9
Shahd Alsalman
ختمنا كل الالعاب الموجودة ومن التعب كعدنا بلمة وحدة حتى نمد السفرة وناكل كلنا سوة
كعدت يم جماعتي وهي همين بس عيونا كل شوية تتلاكى وكل نظرة بيها ابتسامة ميفهم معناها الا اني وهي
كملنا الاكل ورجعنا نمشي مرة لوخ والصبر عندي وصل حدة ونشف من كلبي اللي يضرب على صدري كأنه يكلي انطق كول اللي اريدة
- منار اريد اكلج شي
- اكيد كول
- وجودج غير هواية شغلات بحياتي
- مثل شنو
- كل شي خليتي حياتي احلى وكل يوم انتظر اشوفج حتى احس نفسي عايش
- ههههه شنو هاي ليش انت مو عايش
- لا
قبل مجنت عايش هسة عرفت شنو يعني روح وشنو يعني انسان يسوي شي لسعادتة مع انه شغلات بسيطة بس انت علمتيني شلون اسويها
- اي
- منار ما اريد لاي سبب تتركيني
- شتقصد ؟
- اريدج دائما وياية
متبطلين تنطيني تبقين تضوين كل حياتي وتحلين كل يوم يمر علية
لا تصفنين
اني احبج
احب كل شي بيج
باوعتلي بذهول بس كطعتة بابتسامة علنت بيها موافقتها على حبي الها وخجل مر من خدودها لعيونها اللي نطقت بمكان شفايفها
- احبج والله واتمنى تكونين الي وبس بعد ما اتخيل حياتي بلياج
انت تحبيني ؟
- اممم
- منار اتعودت على صراحتج واتعلمت منج اكول كل شي احسة وما اضم او اخجل منة
- اني هم احبك
- متأكدة ؟
- متأكدة
- وشلون عرفتي تحبيني
- ما اشوف احد غيرك احس براحة وياك دون الكل ما اعرف صدكني اول مرة احس نفسي كلش مشدودة لانسان وبهيج طريقة
- تبقين وياية طول العمر
ومتتركيني ابد
- ابد
- واني اوعدج ميفرقني عنج غير الموت ماكو شي يبعدني عن روحي

صاحونا الشباب وصار وكت الرجعة وكل الطريق نضحك اني وهي جنا فرحانين هواية ارواحنا مثل طيور بجناحات كبار وترفرف بكل مكان ..

بعد ما وصلنا خابرني هاشم وحجة وياية خلاني اعترفلة باللي سويتة واني فرحان واحجيلة عن الصار بيني وبين منار صدمني وحبط معنوياتي كلها
- ضياء خلصت كلامك ؟
- اي
- اصحى من هالوهم واسحب نفسك من منار
- ليش ؟؟
-شنو ليش انت نسيت اهلك ومينا ونسيت كل شي محسبت حساب اذا منار تأذت من هالعلاقة او لا
- ليش تتأذى بعدين اني ناوي اخطبها بس اكمل هالسنة
- ومينا !!
- ما اريدها وما اكدر اتقبلها كزوجة لازم اهلي يفهمون هالشي
- بس انت ممتعود تكوللهم لا ومحد حيوكع بيها الا انت ومنار وبالاخص هي ... 
- هاشم ليش تطير الراحة كوة
- هذي راحة مؤقتة ووراها مليون وجع وحسرة اصحى يا صاحبي ولا تلعب بمشاعرها انت مراح تكدر لاهلك ومنار مراح تتقبل موضوع بنت خالك ولا اهلك حيتقبلون منار افهم هالشي
- انت مو كلتلي فكر وعيش لنفسك
- صحيح بس اسالك سؤال وجاوب اي او لا
- انت تتهرب من اهلك ونظراتهم هسة
- اي
-فكرت بيوم تحجي عن منار كدامهم
- لا
- فد يوم نسبت كل اللي انت بي لمنار او حسستهم انت معجب ببنية
- لا
- معناها انت متكدر تسوي شي لهذا الحب ونهايتكم تعيسة ومؤذية اسحب نفسك هسة وكوللها اي شي حتة لو تكوللها حبيتج مثل اخت او صديقة
ولا تضحك على نفسك لان احنا اصدقاءك متكدر تواجه اهلك بينا مو عاد بنية وتريدها تبقى وياك او تتزوجها

سديت التلفون وكلام هاشم بقى ببالي صحيح اللي يكولة واني مراح اكدر اعصيهم بس راح انتظر لحد ما اخلص كلية وانتظرها هي تخلص همين واكون بهاي الفترة لميت فلوس ووكفت على رجلية وحتى لو اطلع منهم واكعد وحدي واخطب منار
واخلص من كل هالالتزامات اللي اني ما اريدها ابني  حياتي وياها وشوية شوية تتحسن حالتنا مراح نبقى هيج اكيد ..

مرت ايام حلوة بيناتنا واللي فهمتة من منار انه هي كايلة لامها ولاختها عني وحتى صديقاتها عرفو باخر فترة بس مرة جتني ضايجة ومقهورة اول مرة اشوفها هيج ...