مسيرون

5

#مسيرون5
Shahd Alsalman
تمنيت اكللها اني مو مستحي منها بس ما اريدها وما احس بيها واشوفها مثل اسيل ومودة وزينة
بس شنو الفائدة هم مقررين وخلص اني علية التنفيذ
- يوم هسة مو وكتة هالموضوع
- شنو  مو وكتة ابني صير مثل ابن خالك سند كسب ود اختك اسيل من ايام الخطبة وشفت بعينك شلون خالك انطاهم بيت بأسمة وسيارة يعني انت هم مراح تنحرم من شي
- بس اني كل شي عندي ممحتاج من خالي شي ولا حتى زواجي منها لازم يكون بمصلحة
- ليش هو الزواج شنو اذا ميرفعك ويعليك ويخلي حالك احسن شنو لزمتة لو تتزوج لو لا ومينا تعرفها لا طبة ولا طلعة ومن مستواك وكتلك من تتزوجها الخير كلة عندك يصير
- يعني انت برأيج هذا منطق للزواج او تبلشين حياتج بكذبة ومصلحة
- يا كذبة هاي ويا مصلحة ليش هالنبرة الجديدة بصوتك انت من شوكت تناقشني بهالموضوع خليها ببالك ترة اذا اكو وحدة من هسة تنساها انت لمينا ومينا الك وخلص بعد غير هالحجي ماكو لا تكعد تتفلسف وتدورلي حب وسوالف تعبانة
- الحب سوالف تعبانة !
ع العموم ارتاحي ما عندي شي بس هيج دنسولف
- اي عبالي وحضر نفسك باجر تروح تاخذها وتتعشون برة اخذ رخصة من خالك لان نجلاء كالتلي حنطي علم حتى انت تكلة طالعين
- باجر عندي شغل
- اجلة لشغلك هسة مو وكتة وشوف احد يسوي بمكانك

عافتني وراحت انطتني لستة اوامر وتعليمات وتنبيهات وتحذيرات بدون حتى ما تفهم اللي اكولة او تسأل نفسها ليش ابني ديحجي هيج
يكولون كلب الام دليل و يحس بابنها او بنتها حتى لو بعاد بس اني قريب منها وما فد يوم حسيت بخوف علية او لهفة

مرات اسال نفسي امي المن تجمع هالفلوس والعمارات والبيوت وليش تخاف على مركزها الاجتماعي وتحسب حساب لكل شي ما عدا اللي احنا نريدة
هواية اسئلة ببالي ما الكالها اجابة والي يعذبني اكثر انه اني ضعيف كدامهم ما فد يوم حاربت وقاومت علمود شي بنفسي حتة لو نستلة ما اكدر اكول اريد وما تطلع مني نبرة عناد
مرات احس البنات اقوة مني برغم هم كسروهم هواية وحجمو طموحاتهم بس صرت مثلهم ..

بدلت ورحت نمت و دا افكر بباجر شلون راح يكون ما اخفي بداخلي اتمنى مينا تكول ما اريدة او معاجبني يمكن هيج راح اتشجع واحجي بس بهذا وضعي صعب راح احرج اهلي واجرح خالي واكسر بمينا ..

كعدت ثاني يوم رحت لكليتي وهموم الدنيا كلها على ظهري عبالك محد بالدنيا مهموم مثلي وبس اني الوحيد
شافني هاشم واجة كعد يمي طبعا هاشم كلش قريب علية ويعرف شنو مشكلتي
- صباح الخير
- هلو
- هلو !
شبيك شصاير؟؟
- و لا شي
- شلون ولا شي وجهك ميتفسر وواكع حملك بالداوودي شكو؟
- اليوم راح اطلع ويا بت خالي
- اي ! ووين المشكلة ؟
- يعني جنك متعرف وين المشكلة
- ضياء حبيبي انت مو تكول اهلي قافلين واحنا من صغرنا مخطوبين وبعد كلها شهور على التخرج وتتزوجها
- اي
- اي يعني فكها يا اخي لا تعقدها اذا تكول البنية حلوة ومرتبة وبت خالك واخلاقها زينة
- بس هذا مو كل شي
- ماكو شي كامل ميصير انت نفسك مو كامل يعني مرات نتزوج حلوة بس بلا اخلاق ومرات كلها اخلاق بس مو ذاك الجمال
-مشكلتي مو بالاخلاق ولا بالجمال مشكلتي باحساسي مدا اتقبلها
- هسة اليسمعك يكول تحب ورايد وحدة بعدين انت من خلال هالطلعة اتعرف بيها يجوز يشدك الها شي يجوز تطلع احسن مما انت متخيل ليش تاذي نفسك بتفكير سلبي وبالنهاية تخسر فرصةالتجربة
- اني مطالع وياها لان دا اجرب شي او اتعرف
اني طالع حتى اتعود عليها و تتعود علية
- لعد واجه مصيرك وارفض
- معناها انحرم من كل شي
- ضياء انت متريد تخسر شي وانسان ضعيف لان تعلمت كل شي متوفرلك متكدر تتقبل فكرة النقصان او المجازفة او حتى الخسارة يا خوية راح تتعب هيج وكل شي بالاخير راح يفلت من ايدك متكدر تسيطر فعندك حل من اثنين يا تسكت وتتقبل او ترفض وتتهيأ للنتائج انحرم من كل شي بس لا تضيع نفسك
يلة اروح عندي محاضرة
- هاشم
- خليك لوحدك اريدك تفكر وتقرر واتمنى تفكر بنفسك وبدون اي تاثيرات لان هاي حياتك ..