مسيرون

32

#مسيرون32
Shahd Alsalman
خلص علينا الليل بالهم والقهر وكل واحد منا يفكر بشي يمكن افكارنا مختلفة بس الهم جان مشترك
ما صدكت شوكت يطل الصبح حتى اخذ ضياء ونروح لخالة صابرين
بدون منكول لاي احد طلعنا ورحنا لبيتها جانت توها دتطلع اول مشافتنا تجاهلت وجودنا وكملت مشي ركضنا اني وضياء كدامها حتى نوكفها باوعتلنا
بنظرة هروب من مواجهتنا مو نظرة حقد مثل مجانت تباوع البارحة لخالة وعمو وام مينا
- خالة حبيبتي بس لحظة
- اني مو خالة احد ورجاءا وخرو عن طريقي وراية دوام
- صدكيني خالة مراح نعطلج كلها دقايق نحجي بيها والقرار الج
- اني مستحيل اسامح احد فلا تعبون نفسكم و لا ....
- خالة افتهمتي غلط ضياء واني مجايين علمود هالشي
- خالة كل شي بينكم احنا مالنا علاقة بي
- ها شكلتي نكعد و نحجي ؟
بعد سكوتها ونظراتها المتعاقبة علية وعلى ضياء مشت كدامنا ورجعت البيت و رحنا وراها فوتتنا وكعدنا ومنتظرة منا نحجي وجانو ابنها وبنتها موجودين ومستغربين من وجودنا
- خالة اني ضياء ابن هدية يمكن انت تعرفيني او شايفتني اني وصغير وهذي مرتي منار
- راح ندخل بالموضوع ومنطول عليج
- يا ريت
حجينالها كل شي من اول زواج ضياء بمينا لحد اللي صار بينها وبين ضياء ولحد موضوع التبرع بالكلة جانت تسمع وملامحها تتغير من القساوة للعطف والحزن التمست بيها حنية مخفية لان متريد تبينها النا وحتى بنتها بجت وابنها متأثر
- واهلك دزوك حتى تقنعني وتطلب مني هالشي
- صدكيني خالة وداعة بنتي دانيا اهلة لضياء  ميدرون احنا اجيناج بس اتعشمنا بيج ومالنا اي علاقة بالماضي البينكم
- خالة ساعديها انت املنا الوحيد حتى تعيش مينا مالنا ذنب باللي سووه اهلنا
من دنحجي  بنتها هي وتبجي كالت
- ماما خلينا نروح ونساعدها
- سنا معليج انت ولا تتدخلين
- ماما هي بحاجتنا واحنا ممتعلمين ولا انت معودتنا انه نخذل احد بحاجتنا
- بارق اطلعو انت واختك سنا منا
وانتو تفضلو اذا خلصتو كلامكم عندي شغل
باوعنا بيأس واحد ع اللاخ اني وضياء وكمنا طلعنا من يمهم
اول مصعدنا السيارة ضياء كام يبجي ويصيح اني هم بجيت وياه رجعنا للمستشفى ومشاعر الحزن مسيطرة علينا حنخسرها وما بقالنا امل وغير الانتظار ما عدنا ..

بعد مرور يومين تقريبا جنت بالمستشفى وامها توها طلعت لبيتهم كاعدة وداقرة دعاء سمعت صوت ولد
- السلام عليكم
رفعت راسي وممصدكة اللي اشوفة بعيني سنا وبارق هنا دمعت وضحكت رديت السلام وحضنت سنا
- عليكم السلام
- شلونج حبيبتي
- اني هسة صرت زينة
- امي مجانت موافقة بس احنا متعودنا منساعد واللي بينهم معلينا بي وهالشي انساني
- ما اعرف شكلك بارق والله ممصدكة
خليني ادك لضياء افرحة
دكيتلة ومجان مصدك كالي هسة جاي
منتظرت يجي ضياء وديتهم حتى يسوون التحليل وتمنيت من الله انه يطلع واحد منهم مطابق بعز فقداني للامل ويأسي رب العالمين حولة لفرح وفرج
بعدهم يسوون التحليل واني انتظرهم برة الغرفة اجة ضياء حضني وممصدك الصار اول مطلعو حضن بارق واتشكر منهم هو وسنا مثل ما توقعت هم طيبين كلش وحتى خالتهم بس اللي صار قبل اثر عليها وعلى قرارها ...

طلبت سنا تشوف مينا وبارق هم راح وياها وويا ضياء حتى يفوتون يشوفوها
دقايق قليلة وطلعو وهم مقهورين على حالتها
اخذنا ارقامهم وراحو وبقينا اني وضياء ممصدكين بعدنا ورجعنا البيت كنالهم وشوية رجعت الروح بيهم

بعد فترة قصيرة وقبل لا تطلع التحاليل دكتلي سنا وكالت انه امها تريد تسوي هالتحليل بس بدون متشوف اي احد منهم وفعلا سوينا مثل متريد وحللت هي همين وفات وكت الانتظار مثل حبات الرمل اللي بالساعة الرملية بطيء وكلش مستفز
و طلعت التحاليل جنا خايفين نسمع النتيجة
توتر وترقب وخوف و دموع محد كدر يسيطر عليها من كاللنا الطبيب صار التطابق ويا كلة بارق ويكدرون يسون العملية خلال هاليومين
ابو مينا سجد شكر لله وام مينا حالة البجي الهستيرية اللي خلتها تكبر 50 سنة لكدام مفاركتها

اتهيأنة كلنا لعملية مينا وبارق و الوجوه تلاكت برغم كل التهرب والرفض من الملكى
صابرين وهدية ورافد و نجلاء واكفين وكفة وحدة وينتظرون كلهم انتظار واحد اولادهم بين موت وحياة
ساعات طويلة وامل بالله ما ينطفي انه يتشافون
طلع الطبيب وبشرنا العملية نجحت والاثنين بخير
ضياء وسنا حضنوني وشفنا لقطة ما ممكن تتكرر خالة صابرين واخوتها واحد يحضن اللاخ بقوة وبدموع وشهكة ومحاسين على نفسهم ..