مسيرون

31

#مسيرون31
Shahd Alsalman
اول مكان رحنالة هو بيت اهل زوجها بمساعدة عمو ابو ضياء طبعا لان منندلة نزلنا وجان البيت بابة مقفولة بالزنجيل والقفل يعني مبين متروك من سالنا الجيران كالو ماكو احد ومن زمان سافرو سالنا على خالة صابرين وكالو يجون بين فترة وفترة يجيكون البيت بس اخر مرة طولو وبعدها ما نعرفلهم خبر
صعدنا السيارة وكلش متضايقين
اقترحت منار علينا ندور عليهم بمراكز الشرطة واذا عدنا معارف هناك ممكن ننطيهم فلوس ويدلونا بيتهم وعنوانهم
وفعلا سوينا هيج وبعد اسبوع تقريبا او اقل اجانة خبر عن عنوانهم
من درت ام مينا اصرت الا تروح ويانة وتبجي وتولول وضياء ميريد يباوع بوجهها اصلا بعد التوسل والمشادات بينهم اخذناها ورحنا اني وياها وضياء وخالة ويانة وابوها لمينا
الكل مشدودة اعصابهم وبالاخص خالة وعمو ابو مينا
فتنا بالفرع اللي يودينا لبيتهم وخالة صافنة ع الشارع كالت بصوت متوتر وخافت
صابرين
سالناها وينها واشرت بيدها لمرية طويلة وجذابة ومبين عليها استاذة او موظفة بمكان راقي لابسة تنورة ميدي وسترة وقميص وكعب عالي يعني اللي يشوفها كلش ينجذب الها دتمشي وشايلة كتب
وفاتت لبيت طبك ضياء السيارة ونزلنا منها دكت ام مينا الباب وطلعتلنا بنية و توقعت هي بنتها لان بيها شبه منها سلمت عليها وطلبت تصيح امها استغربت منا وفاتت تصيحها
دقيقة مرت
واجتي خالة صابرين ويمها واكفة بنتها تباوع بعيونها المفتوحة على وسعها كأنما ماتت الكلمات واختفت منها ومنهم
- خالة صابرين اني ضياء
- شتريدون وشعدكم جاين لهنا ؟؟
- خية صابرين خل ندخل ونحجي فدوة لعينج
- ليش نجلاء ميكفي الصار من سنين شعندج بعد ؟
- اختي خل نفوت وبعدين نفهمج
- اختك !! ههههه ضحكتني مالك اخت هنا
من رخصتكم
سدت الباب بوجهنا وضياء وكفها
- خالة بس دقيقة الله يخليج الموضوع مهم
- ماكو بيناتنا مواضيع امشو منا
ورجعت سدت الباب مرة ثانية بقوة

ام مينا كامت تبجي وتصيح راحت بنتي مني اخذها عمو ابو مينا وصعدها السيارة وخالة ام ضياء ساكتة وماكو اي تعبير على وجهها غير اللون الاصفر الشاحب واني وضياء منعرف شنسوي
رجعنا البيت و كلنا متأثرين وتعبانين صعدنا اني وياه لغرفتة جان منهار كلش
- منار شراح نسوي خالتي ما اعتقد راح ترضى ولا حتى تسمعنا
- حنروحلها مرة لوخ ونحاول اني وياك لا تفقد الامل وتنهار
- واذا مقبلت
- خلينا نحاول وبعدها الله كريم
- يا رب دخيلك
- ضياء لحد هسة مسالتك شصار بذاك اليوم وليش تذب اللوم كلة على امها واعتقد صار لازم تحجيلي
- ااااخ يا منار شحجيلج كلة من ورة امها واني الي حصة من الصارلها بس مو بقصدي والله
بلش يبجي ويلزم ايدي حضنتة وكتلة اهدى واحجيلي حجالي كل شي وشلون راح وكتلها وشلون جانت امها السبب بالسحر السوتة النا
- اني متسرعت بكد ما جنت اربط احداث والسيد يحجي تخيلت ممكن تكون هي
- يا احداث
- قبل لا نتزوج اني وياج مرة سولفنا ودنحجي وتوصيني انه اعيش سعيد وياج طلبت تشوف ايدي اليمنى ...

- شسوين بيدي ؟
- شو يكولون يبين منها راح تتزوج قريبة لو غريبة
- هههههههه بس هاي خرافات وما اتوقع صحيحة
- اكيد خرافات ههههههه بس هيج نتونس شو بلة
- ها شطلعت
- غريبة لان الخطين مفصولة معناها صحيحة
- ههههههه زين وانت ؟
- اني امممم
ياااا هاي شنو
- شنو
- قريب !
- صدك شو
- هاك شوف الخطين متلازكين معناها قريب
- اممم يجوز يعني تبقين وياية
- ههههههه راح ابقى على كلبك

والموقف الثاني من جنت اتعارك وياج دائما تحجي وياية بهداوة ومرة كالتلي
- ضياء اتحملها هي تحبك بس يمكن تريدك يمها دائما او يجوز تحس بغيرة مني
- يا غيرة منار تحبج اكثر مني
- اعرف تحبني واني احبها بس هالشي مو بيدها اني افهمها لان بنية مثلها
- وانت عليمن تغارين  ؟
- ما اغار بس دا اكلك افتهم البنات شون يفكرون
- هاا اوكي
عبالي هي هيج حجت حتى تخليني افكر بيها
.........
-ومرة كالتلي ممكن يكون بيج كآبة ولادة تخيلت بلحظتها انه هي هيج كالت حتى تخليني ابعد عنج
واللي زاد كل هالتخيلات
كثرة روحتها لاهلهة وتبقى عدهم ايام وتجر اسبوع
- اي بس جانت تكلي علمود تاخذين راحتج انت وضياء وتريد تخلينا لوحدنا مجانت تقصد شي
- الشيطان عمى عيوني وخلاني اتخيل هيج
- مجان لازم تتسرع لان تدري مينا شكد حبابة وصايمة مصلية تخاف ربها وعوفك من كل شي هي مثقفة مراح تلجأ لهاي الطرق ابد اذا رادت تسوي شي
- مفكرت منار مفكرت كل اللي ردتة اكتلها واشرب من دمها العصبية دمرتني ودمرتها
خايف لا تموت واعيش طول عمري بعذاب الضمير
- اللي لازم يتعذب هي امها مو انت اذتنا واذت بنتها وجانت تريد تدمر حياتنا وكلة من كيدها لا حول و لا قوة الا بالله ...