مسيرون

11

#مسيرون11
Shahd Alsalman
بعد فترة صارت امتحانات نهاية السنة وهذا معناه اني حخلص كلية ولقاءاتي بمنار حتقل بحكم شغلي واوقات دوامي بس مراح يمنعني شي عنها وححاول ارتب وانظم وقتي لخاطر شوفة عيونها ما اكدر اصبر على فراكها هي كل شي حلو بحياتي
وطبعا الفترة الراحت ما تخلى من تدخلات امي ومرت خالي علمود مينا وحتى اطلعها ونكون سوة بس اني صرت اغلس و ما اهتم ما اريد بعد يعولون علية بشي واذا مينا ذكية راح تفهم تصرفاتي كلها و ع الاغلب هي افتهمت هذا الشي لان اني وهي من نكعد حالنا حال الكرسي اللي كاعدين علي مجرد ديكور وجماد بالغرفة لا روح ولا نفس ..

امتحنا وخلصنا وبيوم النتيجة طلعت ناجح وهي همين وطبعا شلتنا الولد والبنات هم نجحو وقررنا نطلع نحتفل كلنا ونتغدى سوة جان احلى يوم
كملنا الاحتفالية مالتنا وكلمن راح لبيتة
لكيت اهلي ينتظروني ويمنا بيت خالي وكلهم موجودين باركولي و جانو جايبين هدايا
- هاك ضياء حبيبي هاي هدية مينا خطيبتك الك
- تسلمين مرت خالي
- هههههه شون يستحي لا تخجل امي اتشكر من مينا
- شكرا
طبعا مينا مجاوبتني ولا فتحت حلكها بحرف من اول ما فتت بس كالت مبروك
اترخصت منهم ورحت لغرفتي اتحججت تعبان واريد انام بس رحت حجيت ويا منار اشتاقيتلها هواية وكلبي يدك بسرعة ولازمني صداع قوي كلش
- الو حبيبي
- هلا حياتي شلونك
- الحمدلله وانت
- اني زينة شبيك عبالك تعبان
- راسي ياذيني مصدع كلش وكلبي يوجعني
- اسم الله حبيبي شنو يوجعك شصاير
- ما صاير بس يدك بسرعة و كلش تعبان
- كوم روح مستشفى
- لا هسة انام على صوتج واصحى مثل الورد
- حبيبي ...
- بس هي هاي التشفيني عيديها
- شنو هي
- كلمة حبيبي
- حبيبي
- افييش يا الله عبالك مخدرات
- هههههه هسة لا تخلي بالي كوم لخاطري
- ...
- ضياء
حبيبي
نوم العوافي كلبي
احبك هواية
غفيت واني اسمعها تصيحني بس ما بية اجاوبها ونمت على كلمة احبك هواية ..

من ثاني يوم بعد التخرج استلمت شغلي الرسمي وصرت كلش مشغول حتى راسي ما اكدر احكة بس مسجاتي واتصالاتي بمنار متنكطع وهي مقدرة انه هذي اول ايام الي ما تشتكي و لا تزعل مني برغم احس بتقصير تجاههة ...

فاتت العطلة وحديث كل يوم يلة واتزوج مينا وبعد ما عندك شي والبنية دتنتظر
بلغتهم اني هسة مشغول و ما عندي وقت و منا لفترة يالا اكدر اكون جاهز بس امي ظلت وراية
- ضياء زودتها هواية واللي تسوي كلة ما منة فايدة
- ليش شدا اسوي اني
- ماكو داعي نلف وندور فاتت 4 شهور وحندخل الخامس وانت ولا يمك حتى مينا هاملها فأذا مخلي ببالك تتراجع لسبب اني وانت نعرفة ترة راح تهدم كل شي بنيناه و تكون منبوذ
- شتقصدين يوم ؟؟
- اقصد اللي غيرت حالك كلة انت رجال ومن حقك تشوف وحدة واثنين وتلاثة وتصادق اللي تجي على هواك بالنهاية انت شايل عيبك بس يبقى الاصل بيتك و مرتك ومينا هي الاصل تريد تبقى ويا صاحبتك هسة ماكو مشكلة بس انسى يصير بينكم غير شي واني راح ابلغ خالك انه الشهر اليجي تصير خطبتكم
- بس هذا مو حجي ومدامج انت تعرفين اني بخاطري وحدة ورايدها معناها ....
- معناها تنساها مراح اخلي كلام ابوك وخالك بالكاع وادوس علي واترك كل العز والجاه هذا علمود وحدة يمكن حابتك لطمع او غاية هي تريدها وما اعرف اصلها من فصلها
لهنا وخلص الحجي وياك واذا تريد اغضب عليك ليوم الدين بعد انت حر
- يوم هذا زواج واني ما اكدر اتقبل مينا
- بالعشرة والايام ومن تنقفل عليكم باب راح تتعود وتعيش وكتلك عادي روح واعرف عليها بس مو كدامها ولا تفكر ترتبط بوحدة ابد غيرها ممستعدة اخسر هسة بعد كل البنيتة
- واني مستعدة تخسريني ؟
- اذا انت ابن بطني ومن صلب ابوك مراح نخسرك
اتحضر الشهر اليجي خطبتك
تصبح على خير

طلعت وخلتني بحسرة ووجع ما ينتهي هذي امي تعرف بكل شي و سكتت ومع هذا ما اهتمت لاحساسي او رغبتي اهم شي عدها امبراطوريتها اللي بنتها وعلاقتها باخوها مو مهم شنو اني وشنو اريد
حاولت خلال الفترة هاي اجمع كل فلس حتى اوكف على رجلي واراوغ وياهم على اساس الوقت
بس مكدرت وانجبرت اخطب مينا بسبب امي لان وكعت من طولها بيوم اللي تعاركت وياهم و وكفت بوجههم وكلت ما اريد مينا وكامت توصي ووصلت مرحلة الموت ...