مسيرون

10

#مسيرون10
Shahd Alsalman
حبيت ضياء بكل احساس بية سلمتة كلبي وخليت روحي تتعلق بي
شعور الحب ما يتقارن بأي شعور ثاني ارتبطت ارواحنا سوة رسميا بيوم اللي اعترفلي بحبة ومن يومها كتلة احبك والكلمة بالنسبة مو بس اربع حروف وخلص جنت اعنيها ..

من فرحتي بحب ضياء تمنيت الكل يعرف بي وحجيت لامي وسارة اختي عنة بالاول نصحوني وديري بالج ولا يضحك عليج بس هم يعرفوني شنو وواثقين مني وفهمتهم انه احنا متفقين على زواج وهو رايدني وشاريني ويخاف علية دعتلي امي بالخير والسعادة وسارة فرحانة الي دائما اكول عنها توأم روحي
ربيت ببيت يقدر الحب ويقدر المشاعر امي وابوية اتزوجو عن حب و بيتنا مليان دفا وحنية لهذا اني حبيت اكون مثلهم واختار شريك حياتي بقلب وعقل
ومن شافوني البنات دائما وياه ومتغيرة كلش صايرة اسرح هواية واستعمل التلفون او المسجات بكثرة سالوني ومكدرت اخفي اكثر عنهم وحجيتلهم عن حبنا كلهم فرحولي الا ايات نبهتني وبدت تنطيني نصايح و حجي متوقعت اسمعة منها
عفتهم وكمت رحت مثلت عليهم انه اني مضجت بس اني انقهرت لان اذا الكلام صحيح ف جان المفروض اسمعة من ضياء مو منها
دا اتمشى وشافني ضياء اشرلي حتى اروح يمة ورحت سلمت وكعدت و سالني
- مشمشتي شبيها ليش ضايجة ؟
- ما بية
- دحجي بداعتي شبيج مبين عليج ضايجة كلش
- ماكو شي بس جنت يم البنات وحجيتلهم عن اللي بيناتنا
- ليش حجيتيلهم
- ليش انت عندك مانع !
- لا طبعا بس يعني دا اسال شعجب كتيلهم
- ماكو شي اخجل منة واضمة وهم همين سالوني واصلا حاسين بينا فكتلهم
- حلو زين وين المشكلة ؟
- المشكلة انه ايات كالتلي شي خوفني
- اللي هو شنو !!؟
- كالتلي انه اللي دا اسوي غلط ومو لازم امشي وياك او احبك وتحبني لان محكوم على علاقتنا بالفشل
- ليش حجت هيج ؟
- تكول انتو عائلتكم متزوج ولدها الا لبناتها ومتقبلون بوحدة غريبة بينكم
- و منين عرفت هالحجي او شلون اصلا حجت بي
- ما ادري مسألتها وكلش اتضايقت وعفتهم وكمت
- لا تخلين ببالج هالحجي منار يجوز هي تصرفت هيج لان تخاف عليج عادي يعني ويجوز غيرانة منج
- تغار مني ليش !
- يعني لان تحبين واحد مثلي حلو واخبل
باوعتها صفح وعدلت ياختي ضحكت هي
- اي دضحكي يا حبيبي من الاول الله يجمعنا سوة كولي امين
- امين يا رب بس يعني ماكو هيج حجي متاكد
- اي ماكو لا يظل بالج كومي يلة نشرب شي بالنادي ونسولف لان اريد اخذ رأيج بقاط التخرج واشوفج كم صورة
- اي يلة نكوم حبيبي
- راحلج فدوة حبيبج شكد احبها من لسانج وبصوتج
- هههههه يلة امشي
- هههه يلة
رحنا شربنا جاي وكلبنا بالصور واختارينا قاط حلو
وظل يسولفلي عن شغلة
صرت احفظ تفاصيلة اوقات دوامة طريقة دراستة الاغاني اليحبها الاكل الاشياء اللي يتحسس منها
الوجع اللي دائما يشكي منة صداعة النصفي كل شي يحبة وميحبة صرت اعرفة اهتميت بي وهو ما قصر وياية
صرت احبة يمكن حتى اكثر مما هو يحبني ماكو شي يخلينا نتفارك متواصلين ليل ونهار ماكو مجال حتى تكون بيناتنا عركة ولا بيوم ترك غصة او ضوجة الا و حولها لفرحة
ارتاحيت بحبة وعشت ايام ما ممكن انساها ولا يبدلها الزمن
الشي الحلو بضياء مينتظر او يسال شنو الاحبة او ممكن يسعدني يفاجئني دائما و يحضرلي كل شي احبة خوفة علية وحنيتة ما اتصور اكو بشر ثاني ممكن يسويها مثلة
اللي جان يضايقني بسامير ايات ومتقبل تحجي بصريح العبارة وليش دتكول هالحجي وشنو الغاية منة ما ادري و ما احسها تغار بكد ما احسها ضامة حجي والحجي ثكيل وبيني وبين نفسي ما اريد اعرف شي اريد ابقى بعالمي اني وضياء مليان حب وتفاهم وسعادة..

اسعد يوم هو يوم تخرجة والصورة اول مشفتة بالقاط كلبي فز جان طالع حلو كلش لدرجة اتحرك احساس الغيرة عندي لما سمعت بنات كدامي يحجون بينهم عنة وحدة منهم تكوللهم يبوو باعي هذا الطويل ابو شعر مرفوع يخبل واللوخ تكللها هذا ضياء الطاك اللوخ تجاوبها قصدكم ضياء الصاك ميحن علية ويباوعلي
واني الغيرة اكلت كلبي اكل اتمنيت اكللهم عوفو هذا يخصني ومالتي بس همزين اجة هو وكالي خلي ناخذ صورة للذكرى كتلة ماشي ورحت وياه فتت من نصهم وهم يباوعون بكل اندهاش ووجوههم تذب الوان حسيت انتصرت عليهم بحركة عفوية منة وابتسامتي مفاركتني ...