مسيرون

19

#مسيرون19
Shahd Alsalman
اليوم تخرج منار رحت شفتها من بعيد وبعدها لابسة اسود بس متحسنة عن ذيج الفترة
كل الايام الراحت اللي جنت اشوفها بيها جنت اشوف وحدة ثانية مكسورة ومتدمرة
تمنيت احجيلها ليش اني هيج سويت بس ما تتقبل تسمعني ومو حلوة مني اكتبلها السبب برسالة ممكن متوصلها باعتبار تلفونها طول الوقت مغلق وع الاغلب هي مغيرتة
اريدها تصدكني من نبرة صوتي مثل قبل
اخذتلها صور بدون متنتبه يمكن بعد ما اشوفها وما اتحمل لان مشتاق الها بكل تفاصيلها مع انه لا لمعة عينها موجودة ولا نشاطها فعلا كسرتها ..

فاتت ايام وانتهى الدوام واخر امل الي حتى اشوفها هو يوم النتائج بقيت منتظرها لحد ما اجتي
مجانت قلقة ولا بوجهها اي تعبير غير البرود وكأنه ممهتمة لشي شافت النتيجة ناجحة جانت ولا فرحت حتى
وكفت كبالها وطلبت منها تسمعني لاخر مرة على امل انه تصدكني وتسامحني وهالمرة اقتنعت وطلبت انه نطلع لحديقة واخذتها حتى ممصدك هي قابلة كمت امشي بسرعة بالسيارة ..

- احجي
- قبل لا اكول اي شي احلفلج كل الحجي صدك و الله العظيم
- اوكي
- منار اني انجبرت على هالزواج حتى مينا بنت خالي مثلي واني وهي عايشين اخوان ببيت واحد والله ما تقربتلها
- اي
- اللي صار هو ....
وحجيتلها من قبل لا اعرفها لحد موضوع الديون ولحد ما اتزوجتها وحتى الاتفاق اللي بيناتنا كتلها عنة بس اللي صدمني ردها
- وهسة شنو المطلوب مني
- اريدج ومحتاجلج ومحتاج تسامحيني
- واني مسامحتك لان سبق وكتلك انت متهمني
- اذا ما اهمج ليش اجيتي وياية وليش قبلتي تسمعيني
- ما عندي شي كلت اطلع اتونس واغير جو واشوفلي فلم من افلامك
- بس اني حلفتلج بالله العظيم هذا كل الصار
- وقبل هم وعدتني و حلفتلي نظل سوة
- مكدرت اوفي بوعدي بس هسة مستعد اوفي بي و دالم كل الدين اللي على ابوية واسددة حتى اطلك مينا ساعتها اني وانت نرجع سوة
- هههههههههههههه هههههههههه غير خيال واسع عندك بابا انت شارب شي قبل لا تجيني لو حلمان ودتسولف
- منار شنو هالحجي وشنو طريقتج هاي
- اوووي حبيبي معجبتك طريقتي
- منار
- انت كملت كلامك لو شنو
- ليش
- لان اريد اروح صار عندي جالي هلكد ما كابلتك
مدري شون مشيت وياك ذيج الفترة
- هاي شبيج منار صدك تحجين
- لعد جذب
انت فد يوم سمعت واحد انجوى بنار يرجع يحط ايدة بيها مرة لوخ وهو يعرف حينجوي
- كافي انت ذليتيني هواية ودتكسريني بكلامج اكثر ما اني مكسور
- ههههههههههههههه بعدك مشايف شي وتستاهل اكثر من هيج والله قليل بحقك بس اني شنو راح اسكت حتى اخاف لا ابن ماما وبابا ينجرح
- منااااار
- لا تصيح ترة عيب لو ماما ما علمتك هذا عيب
- انت شلون تحجين هيج وياية بعد كل توسلاتي وملاحكتي الج تجاوبيني هيج
- محد طلب منك تلحكني ولا كالك تذل نفسك ولا حتى تمرغل روحك حتى ارضى اباوع لخلقتك
انت تدري اذا هسة ماما شمت خبر انت كاعد وياية ودتحجي و عايف مرتك اللي جبروك عليها راح تزعل منك هواية ههههههههههههههههه
بلا وعي مني ضربتها راشدي كطعت ضحكتها وباوعتلي والدمع بعيونها
ردتلي الراشدي وكامت تضربني على صدري اول الضربات جانت قوية بعدها صارت خفيفة وتبجي بدون صوت لحد ما غصت وصارت صيحة قوية حاولت تلزمني من القميص بس وكعت بالكاع وتبجي حيل واني بجيت وياها
كمية الالم اللي بداخلها تخلي الحجر يتفطر حاولت احضنها ظلت تدفع بية وتبجي لحد ما استسلمت وبقت على صدري تحجي حجي ممفهوم وتشهك وتغص لبعد شوية هدت ووخرت نفسها عني وطلبت مني اوديها للبيت
كومتها وتمشي كوة كل شي بيها يرجف وصلتها البيت وبقيت لوحدي بالسيارة مكدرت اعوفها ظليت انتظر بلكي تطل من شباكها او تطلع مرة ثانية ..
لحد ما شفت اخوها ديطلع بالسيارة بسرعة واختها تسد الباب وصعدت جانت ساعة 3 الفجر
رحت وراهم وطريقهم للمستشفى نزلت اختها واخوها وجابو سدية مكدرت اميز منو اللي ديدخلو هي او امها نزلت من سيارتي و رحت وراهم وشفت امها اللي متخربطة وهي لازمة بيدها قوي خايفة من فقد ثاني ..
ووكفت وياهم لوجه الصبح بس مشوفتها نفسي ابد حتة لا تتضايق
وللظهر تقريبا طلعو من المستشفى ورجعو لبيتهم واني هم رجعت البيت ..