مسيرون

35

#مسيرون35
Shahd Alsalman
قاطع حديثي كلام بابا
- اكو بنتي
بارق
سنا
احنا قسينا على امكم هواية برغم هي ما سوت شي حرام و لا غلط حتى من اتزوجت جان ابوكم بشهادة الكل خوش انسان صحيح مراح نكدر نرجع الزمن ليورة ولا نعوضها ذيج السنين بس نكدر ننطيها حقها
- رافد شدتحجي ؟
- هدية اسكتي احنا عشنا حياتنا طول وعرض وتمتعنا بفلوسنا وحرمنا اختنا وهو حقها بيها
- يعني شتريد تكول احنا اكلنا حقها
- اي اكلنا حقها شهدنا زور على وصية ابوية اللي ما فد يوم كال حرموها من الميراث ولا كال ممسامحها
- وهسة شنو ضميرك صحى ؟
- من زمان دا اتعذب هذي الفلوس حركتنا لان حرام اولادنا متفرقين وممرتاحين وبداخلهم كره
وبنتي ردت اخسرها اني ممستعد اكمل بعد بهيج ظلم
- بارق امك بالبيت مو ؟
- اي خالة نجلاء
- كومو نروحلها
- ها نجلاء اشوفج تريدين تتسامحين منها
- اي اريدها تسامحني المصيبة الوكعت بيها خلتني اصحى على نفسي شكد اذيتها واذيت نفسي واهلي
- يا سبحان الله نسيتي شكد جنتي تعبين براس امي عليها وشكد حجيتي عليها كدام ابوية
- ما نسيت وانت هم لا تنسين نفسج من رحتي اتزوجتي كامل وجنتي تدرين بي يحبها اجة ابوه وخيرج بينة وبين اخوه الجبير
وكتيلة اريد كامل عمي
وتعرفين هي جانت مايلة الة و كتيلها بكل عين صلفة روحي وتزوجي اخوه الجبير
- عيب نجلاء
- ليش عيب هو هذا الصدك وعشتي حياتج تعيسة كل يوم تشتكيلي من كامل وبرودة وياج وحتى من معاملتة الج جنتي تكليلي كل شي يسوي وياية واجب مو اكثر لحد ما كطعتي امل منة
- شفتو شلون نفوسنا مريضة
صابرين اختي واني حسوي كل شي حتى تسامحني واردلها فلوسها
- واني وياك رايحة
حتجين ويانة لو لا
- ما ادري
- شمنتظرة مو كافي فوك ما عايلين وياها نكبر راسنا
واخذهم بابا بسيارتة ورحنا وياهم عاتبتهم عمة صابرين و طلعت كل شي بكلبها حجي وبجي وملامة
و بالاخير ما رضت تسامحهم ولا رضت تاخذ حقها منهم كالتلهم ما اريد منكم فلوس
رجعو خايبين الامل جان عبالهم لان هي ساعدتني راح يكدرون ياثرون عليها باعتبار كلبها طيب بس مفاد هذا الشي ..

من بعد هالمواجهة بارق و سنا ما كامو يجون للبيت بس نتواصل ع التلفون اني وياهم وجانو يشجعوني حتى اكمل علاجي
و نتيجة العلاج الطبيعي بينت الحمدلله ورجعت امشي واتحرك مثل اول وذاكرتي اصلا رجعتلي بس طول الوكت احس نفسي فاقدة شي مهم ومحتاجة لوجود بارق يمي برغم ما كطعنا تواصلنا ..

ورجعت طلبت الطلاك من ضياء وطلكني و قررت اكمل دراستي لان هي السلاح الوحيد اللي يخليني اوكف على رجلية واكمل حياتي بدون حاجة اي احد ومحد اعترض منهم
يمكن جان صعب عليهم يتقبلون فكرة انه اكمل دراسة
بس بعد اللي صار عرفو غلطهم وتركو الاجبار وخلونا على حريتنا ودخلنا اني وبنت عمتي مودة الكلية واختارينا قسم التحليلات المرضية
وفهد دخل هندسة ميكانيك محد جبرة على قسم مثل البقية
كمت اشوف سنا هناك لان جانت هي مرحلة ثالثة وصرت كل يوم اشوف بارق بس ما ردت اكون ثقيلة او الزكلة كمت ابعد نفسي عنة وفكرت اذا اهلة واهلي هيج مستحيل ننجمع بيوم فماكو داعي اعيش بهاي الاوهام ..

منار كالتلي هي وضياء راح يحاولون مرة لوخ ويا عمة صابرين وكتلها ما اعتقد اكو امل لان بابا حاول وياها هواية وهي مقبلت
خلصت مرحلة اولى وجنت احس مسوية انجاز انه طلعت امتياز صار عندي طموح اكمل المراحل البقية بنفس النتيجة واكمل اريد اعوض سنين راحت مني ..

بالعطلة دك علينا اخوية فهد وكال بابا بالمستشفى متخربط وحالتة خطرة خفنا علي اخذت امي ورحنا ودكيت لضياء وكال جايكم اني وسدير
والفحص يكول انه عندة ذبحة صدرية اسودت الدنيا بوجهي دكيت لبارق واني ابجي مسيطرت على دموعي
- هلا بمينا المختفية
- باارق
- شبيج ؟؟؟
-  بارق بابا
- شبي مينا احجي
- بابا بالمستشفى تعال الله يخليك
- ليش شصاير ؟؟
- ذبحة وحالتة خطرة
جيب عمة صابرين وتعال اخاف يموت وهي ممحاجيتة الله يخليك جيبها
- خلص هسة جاييكم وين انتو ؟
وبعد نص ساعة تقريبا اجانة هو و عمة صابرين اللي وجهها احمر من البجي حضنتها اول مشفتها وتوسلتها تسامحة وطلبت مني تشوفة ودخلناها
الطبيب سمحلها ب 5 دقايق و بس مو اكثر ..