مسيرون

33

#مسيرون33
Shahd Alsalman
فتحت عيوني لكيت امي وضياء وسنا يمي يتحمدولي ع السلامة سالتهم نجحت العملية وكالولي نجحت ولازم هسة ترتاح
رجعت نمت احس بتعب او نعس قوي يمكن جان تاثير البنج ..
بعد مدة من الوقت كعدت وجانت سنا كاعدة ع الكرسي القريب يمي
- حبيبي بارق
- سناوي
- شون صرت عمري
- اني زين بس عطشان
- هسة اشربك مي لحظة
- تسلميلي
- عوافي
شدتحس
- شوية وجع بظهري
سنا وين امي
- طلعت ترتاح ضياء حيوصلها
- بيها شي
- لا ما بيها بس شفتها تعبت ودزيتها ويا ضياء
- ومينا ؟
- كال الطبيب هي زينة بس تحتاج وقت اطول منك حتى تصحى
- ان شاء الله تطيب
- ان شاء الله
يلة حجيبلك اكل تاكل شوية
- لا ما اشتهي
- لا شنو متشتهي شوف الدكتور كاتبلك على دوايات وابر كومة و نبه علينا انك تتغذى زين
- خليها فد شوية بس ارتاح
- ماشي
حعدلك المخدة
- اي والله يا ريت
بعد شوية دخل خالي ابو مينا واتحمدلي بالسلامة هو و مرتة وميعرفون شلون يشكروني اترخصو منا حتى يخلوني ارتاح وبعدها طلعو ..

اكلت واخذت دوايا والدكتور اجة وشافني واني مبطلت سؤال عن مينا كل شوية اسال عن وضعها شغلتلي فكري شابة وبعدها اول عمرها تتعرض لهيج حادث وبنفس الوقت هي بنت خالي اللي امي ما بطلت بيوم تحجي عنهم مرات جانت تحس بقهر وظلم ومرات تحجيلنا عنهم بحب

امي متعلمت تكره احد حتى لو يأذيها وهالشي اخذناه منها اني واختي الصغيرة سنا واختي ميساء حتى من تزوجت وسافرت تحسسنا بحنيتها وتسال علينا دائما وما كطعت بينا ابد واحنا كعائلة مترابطين كلش ابويا الله يرحمة مجان يرضى ناكل كل واحد وحد لازم الا كلنا وحتى الطلعات واللمة وبما انه ابوية جان عندة اخت وحدة وممتزوجة وتوفت قبلة فظلينا نحن لجو الاهل واللمة والجمعة برغم انه امي ما تقبل نختلط باهلها او نحجي وياهم ما عدا منار وضياء ..
شوية شوية كمت اتعافى ومينا بعدها مواعية و لا صحت اسبوع وماكو اي استجابة منها لاي شي
كمت كل يوم اروح يمها اداريها مثل مجنت اسوي ويا ابوية من دخل بغيبوبة السكر واللي ادت لوفاتة امسحلها ايديها بوصلة مرطبة و اقرالها قران ومرات كتب او اكعد احجيلها اخبار او منشورات على الانترنت
ملامح مينا حزينة كلش وهالشي هو اللي شدني الها تمنيتها تصحى وتفتح عيونها وتكمل حياتها مثلها مثل اي بنية

بعد ما عرفت قصة زواجها من ضياء وشلون كدرو يعيشون سوة بدون اي ضغط واحد ع اللاخ وشكد ساعدتة حتى تكون منار الة كبرت بعيني اكثر ..

فد يوم اني وكاعد دا احجيلها نكات من كتاب يضحك ودا اضحك وياها انتبهت على ابتسامة خفيفة انرسمت على شفتها وبسرعة راحت
ومرة ثانية حركت ايدها كأنه تريد تلزم شي بيها
وخليت ايدي بيدها ودست الدكمة اللي ينادون بيها الطبيب
اجة وحجيتلة وكالي هاي اشارات استجابة ويمكن فترة قليلة وتصحى وانطاني امل كلش جبير
فرحت وبشرت الباقيين وفعلا مطولت كم يوم و صحت
اول واحد شافتة جان ضياء و معرفتة وبعدها منار هم معرفتها
وبعد الفحص تبين انه هي فاقدة الذاكرة حتى اهلها متتذكرهم كل اللي تتذكرة هو اخر حدث صار من اندعمت بالسيارة وهالشي دخلنا بدوامة ثانية لان تعتبرنا احنا اغراب عنها وخاصة امها تخاف تتقرب منها
كل يوم نروح يمها و اهلها يحاولون يذكروها بشغلات ويشوفوها صور وتعرفت على امي واختي وبالنسبة الي ابقى يمها احسها ترتاحلي..

الدكتور كال انه هي بحاجة علاج طبيعي ولازم يكون مكثف بس هالشي يتم بعد ما تطلع من المستشفى طلعناها بعد فترة ورجعت البيت بس بعدها علامات الاستغراب عليها مبينة
بما انه امي متحجي ويا اهلها فطلبنا منها تسمحلنا نروحلهم وممانعت
يعني كل يومين نروحلها تقريبا نتطمن عليها ونرجع
خابرتها امي اللي مينا عبالها وحدة غريبة عنها ومو اخت ابوها حتى تسال عليها و كامت تبجي بالتلفون
- اني ممرتاحة ومخنوكة هنا
- ليش حبيبتي منو مضوجج
- محد بس ما اريدهم احس نفسي غريبة بينهم
- زين انت دتروحين للعلاج الطبيعي
- لا
- ليش لا
- ما اريد اروح وياهم
- بس هيج ميصير معناها مراح تطيبين بسرعة شنو رأيج ادزلج بارق و سنا وتروحين وياهم للعلاج
- اي اريدهم بس هم ارتاح وياهم
- يلة هسة ادزهم لعد وكافي تبجين ماشي حبيبتي
- اي خالة
اخذت سنا ورحتلها بعد ما امي خابرت ضياء و حجتلة ع الصار بيناتهم وطلبت منة ميضغطون عليها ...