مسيرون

20

#مسيرون20
Shahd Alsalman
صحيح اني اتفقت ويا ضياء انه ما نتدخل واحد باللاخ ولا حتى نبين نوع علاقتنا كدام اي احد بس مع هذا يضايقني حال ضياء احسة تعبان ومهموم مع العلم اني وياه مجبورين اثنيناتنا بس اني متماشية ويا الموضوع واذا مخاب ظني ضياء يحب وجان مخلي ببالة بنية معينة بس بسبب زواجنا فقدها وع الاغلب هو هذا اللي مأزم حالتة ..
من رجع حاولت احجي وياه بس جان تعبان واصلا نايم برة البيت فما صار مجال انه نكعد وانتظرتة لحد ما صحى من النوم سويتلة اكل وكالعادة ما ياكل الا القليل بحيث نازل وزنة بشكل يخوف ودائما صايرة عندة حالة نزيف بخشمة بدون سبب معين سالتة اكثر من مرة كالي عادي ماكو شي مهم واعتقد هو ديرتفع ضغطة
جيت وكعدت كدامة و هو ديكلب بماعون الاكل وسرحان لو تنفجر يمة عبوة هم ما يحس عليها
- ضياء
- ...
- ضياااء
- ها
- ممكن اكطع افكارك شوي اريد احجي وياك بشي
- احجي
- شوف اني منتبهة على حالتك ومقدرة وضعك بس هالشي التسوي غلط بحق نفسك انت دتتوجع وتتاذى بدون اي فائدة
- ليش شبية اني اذا على خشمي ف عادي كتلج مليون مرة متعود
- اني اقصد على كلبك
- كلبي ؟
- او خليني اكول حبك
من كتلة هيج رفع عيونة وذب الخاشوكة من ايدة وانتبه لكلامي مستغرب ومن هالتصرف افتهمت هو فعلا يحب
- لا تستغرب اني صح ممريت بهاي التجربة بس اكدر احس باللي يحبون واعرف كل الانت بي بسبب فقدانك الها
لا تضم اكثر
- اذا ضميتة او حجيتة شنو النتيجة
- راح تفرق هواية
- شتقصدين
- انت اذا ضميتة راح تخسرها ومترجعلك حتى لو طلكتني
اما اذا حجيتة راح اساعدك ونحاول اني وياك نلكى حل وسط يرضيك ويرضيها
- مثل شنو ؟
- تتزوجها علية وتكون مرتك
- ههههههه هذا سامعة اللي يكولون عشم ابليس بالجنة
- ليش
- لسببين اول شي ابوج والثاني هي
- هي وافتهمناها بس ابوية شنو علاقتة
- انت تعرفين ليش اني مقاومت ولا دافعت عن منار
- اسمها منار ؟
- اي
- زين
كمل ليش
- لان ابوج لازم على ابوية لزمة او خلينا نكول ابوية متدين منة وخالي هو اللي كافلة فلهذا اي تصرف غلط مني راح افلش عائلتي واهلي بيدي وادخله السجن اذا ما مات بسبب هالموضوع
- انت فاهم الموضوع غلط ابوك هو اللي كافل ابوية
- شلون ؟
- امي هيج كالتلي لان اني هم رفضتك وكتلها وطبعا بعد ما خوفتني بكلام الناس والحجي وسمعتي كالتلي نفس اللي انت تكولة بس الفرق انه ابوية اللي ممكن ينسجن
- اذا هالشي فعلا صاير معناها احنا بلعبة جبيرة وامي وامج هن اللي سون هالشي حتى منكول لا ابد ولا نقاوم خاصة اني جانت فرصتي اكبر باعتباري احب وحدة واريدها فممكن اسوي اي شي حتى لو اخسرهم
- اكيد بس الغريب بالموضوع انه انت مجيكت هالشي بحسابات او شفت ملف او شغلة معينة تخص هالموضوع يعني ليش متحققت
- لان هالشغلات سرية وابوية وخالي يخلون كل اوراقهم واتفاقياتهم بخزنة خاصة حتى رمزها بس هم يعرفو
- هالشي جذب وما اتوقع صحيح لان ابوك هدانة بيت بزواجنا
- لا ابوج اللي هدانة هالبيت
- ههههههههه استغفر الله
ضياء احنا بجذبة جبيرة دخلونا كوة وجبر عليها يحجون الك عكس اللي يحجو الي
لهذا العين بالعين
- شون العين بالعين
- مثلما ما هم جبرونا نعيش حياة هم رايديها بالخداع والجذب
احنا هم حنعيش حياتنا مثل ما احنا نريد وحساعدك حتى توصل لمنار مرة لوخ وتعيشون سوة وبهذا البيت
- وانت ؟
- طلكني اذا تريد او بقيني على ذمتك
- مو هذا قصدي مينا اقصد وانت شنو تستفادين
- بصراحة اني ما اريد اي شي لان اني دائما الطرف الخسران فليش اخلي الحواليا هم يخسرون اذا بقيت وياك فأني راح عمري بدون هدف ولا معنى واذا تطلكت راح يلحكني لقب المطلقة على كولة امي واول اللي يصيحوني بي هم اهلي وطبيعي مراح اتزوج
اللي جنى علية و خش بخطيتي هم اهلي مو انت ونفس الحجي ينطبق عليك بس انت فرقك عني انك رجال وشايل عيبك وما راح يفرق او يتغير عندك شي
- هذا ظلم الج واني ما اكدر اظلم اكثر يكفيني منار اذيتها دا اموت كل يوم من عذاب الضمير
- بس احنا مالنا سلطة على كلوبنا كل شي نتحكم بي الا المشاعر وانت تعرف نهايتكم شنو بس مو بيدك متحبها هالشي ميفيد حتى لو عاندت نفسك وكلت ما افكر بيها ..