مسيرون

28

#مسيرون28
Shahd Alsalman
رحت لامي وحجيتلها الصار لان ظلت تسالني ونمت بغرفتي ببيت اهلي احس روحي راح تطلع ومدا افتهم ليش كل هذا ديصير
ثاني يوم امي اخذتني ورحنا البيت دتشوف منار كعدتها وكعدتني ومينا يمنا همين
- منار بنتي احجيلي بشنو مضوجج ضياء
- خالة ما اريدة
- علساس اني ميت عليج
- اسكت انت وياها احجيلي بنتي مقصر بشي وياج ماذيج ضاربج شمسوي
- ممسوي شي بس تلعب نفسي منة ومن ريحتة ما اريدة خلي يطلكني
- منورة حبيبتي لا تبجين هي عمة دتحجي وياكم حتى تحلون هالمشكلة اللي انتو بيها بعد لا تكولين طلاك ابد
- مينا ما اكدر اتحمل خالة افتهميني حموت من الخنكة ما اكدر وما اريد حتة دانيا خل ياخذها
- اسم الله الرحمن يا خنكة هاي ؟
- مخنوكة خالة اريد هيج املخ نفسي
- بنتي انت دتصلين ؟
- ....
- احجي دتصلين دتقرين قران
- لا
- ليش
- ما ادري بس انسى
- كومي بدلي هدومج دنروح
- وين يوم
- كومو يلة
مينا يمة خلي البنية يمج منطول
- اي عمة
دلتنا امي على الطريق ونزلنا بمكان بابة مفتوحة وناس طابة طالعة وسيد كاعد ويقرة على راس الناس
كعدت امي وحجتلة ع الصاير وسال منار جم سؤال حتى على علاقتنا همين كاللنا هاي اعراض سحر والعياذ بالله
طبعا منار كل الوقت جسمها يرجف واني لازم ايدها
كال السيد حجيكم للبيت يوم الخميس اريدة نظيف وطاهر وطلب منا احنا هم نتطهر ونتوضى
وفعلا يوم الخميس اجة وكلنا موجودين اني ومينا وامي ومنار اول ما فات ظل يردد كلمات وادعية وايات وانكسرت مزهرية تفلشت من وحدها صارت الف وصلة برغم هي قوية وسميكة كلش
منار هو ويحجي تبجي وترجف صعدنا فوك بالغرفة وظل يردد نفس الكلمات وهي تزيد بالبجي واني معدتي توجعني كلش
لزمها كعدها بالكاع وصار يقرة ايات تخص السحر ويمسح على راسها وهي تصيح ويتقلص جسمها من كامت تقاومة وتريد تنهزم منة اشرلي حتى الزمها بس مكدرت اطول هواية لان كمت اتقيأ واللي يطلع مني عبارة عن شي اسود وهواية شغلات انهد حيلي من الاستفراغ ومينا وامي لازمين منار
طبعا المنظر جان مخيف كلش وكل اللي ديخطر ببالي منو اللي ممكن يسوي هيج شي ويانة وشنو السبب حاولت استجمع كل قوتي والزم منار اللي كامت تصيح بعلو صوتها وتتوجع كلش وبدت هي هم تستفرغ ومن بعدها اغمى عليها غطيتها والسيد طلب نبقى فاتحين سورة البقرة
وكال السحر والربط موجود ببيتكم وبغرفتكم وانه احنا مو بس سحر مكتوب او مرشوش لكن حتى سحر مسكي يعني شاربي او ماكلي ومنار تأثرت اكثر لان جانت بفترة نفاسها ومو طاهرة فثبت اسرع عليها اما اني جان شوي شوي يتمكن مني بس بقراني والصلاة يبطل بسرعة
كالي اكدر اعرف منو  المسوي بس احتاج وقت كال المهم ما تتهمون احد ولا تحجون بالموضوع لاي احد  حتى يكدر يكمل شغلة
بعد فترة اسبوع تقريبا او اكثر شوي بدت منار تتحسن صحتها بس بعدها مثل اول نفسيا و رحنالة وكال العمل موجود بالفراش وورة الكنتور ومكتوب بي اسامي اني طبعا ما كدرت اسوي هالشي لوحدي اخاف كلش لا اسوي شي غلط ويرجع علية فتوسلت بالسيد حتى يجي البيت وهو يسوي ..

اول ما فتنا طلب مني اشك الفراش وادور وسويت مثل مكال لكيت جيس ثكيل بي صورتي اني ومنار وشعر ووصخ وعظام ما اعرف شنو المكتوب بس هو قراه وكال هاي طلاسم للكراهية والتفرقة
كلبت الغرفة وسحبت الكنتور لكيت اوراق صغار ومحروكة من النص وكالي السيد هاي مكتوب طلاق منار بنت باسمة من ضياء ابن هدية ومرض وابتلاء والثانية مكتوب بيها طلاسم محبة بينك وبين بنية اسمها مينا بنت نجلاء وتسخير الها

من كالي هيج الدم صعد لراسي وكلش ضجت كل هالفترة تمثل علية وعلى منار تالي هي اللي طلعت ورة كل هالعذاب والاذية
كمل السيد كلامة كال هاي وصاخة ونكاسة مقري عليها كلام معكوس حتى تصير ريحة بالبيت تنفر منك زوجتك
وهسة ربطت ليش جانت تشكي منار من الريحة .. 

رجعت السيد لمكانة ورحت لبيت خالي حتى احاسب مينا على كل شي سوتة وياية لو ما حاجي لامي جان هسة بيتنا مهجوم دكيت الباب بقوة
طلعتلي مرت خالي وتصيح شصاير شكو
عفتها وصعدت فوك على مينا جانت كاعدة بغرفتها مثل مكالتلي امها بس شفتها هجمت عليها كتل وضرب بكل مكان امها تريد تفكها مني متكدر وهي تصيح وتسال ليش وشكو وشصاير ..