مسيرون

22

#مسيرون22
Shahd Alsalman
- اني اللي تحملت فوك طاقتي وتأذيت وهسة اذا فكرت انه ارجعلة راح يصير الحمل هواية علية لان رجال متزوج شيريد يكون موقفي كدام اهلي واهلة والناس
- زين انت اذا كصيتي شعرج كصير وصبغتي احمر مثلا وجان عاجبج كلش برغم انتقادات واسئلة الناس راح تهتمين ؟
- لا لان عاجبني واشوفة شي حلو ع الاقل لنفسي
- شفتي معناها المهم عندج هو نفسج والاهم انه انت تعرفين كل ظروف الولد صحيح غلط وما كالج من الاول ومشى وياج بحلم وردي وما راد يصحى منة واني فهمتج هو شنو جانت نيتة لمن امة صدمتة بموضوع الديون وشكد حاول يكون وياج انت وبس لكن غشهم النا وكعنا بهيج مطب وصرنا لعبة بيدهم
- انت ليش دتسوين هيج ؟ هو دزج ؟
- هو ما دزني اني ما اريد نخسر كل شي اقلها واحد بينا يعيش مرتاح وانت هم وياه ومن كتلة احجي وياها برغم كل احراجة مني لحيت علي ووافق ومن يومها لليوم هو ممصدك وعايش بالامل انه تكونين الة
- صعبة مينا صعبة حيل ومنو يكول اهلة يتقبلوني او اني اتقبل وضع انه هو متزوج ونظرات الناس الي
- الناس عوفيهم لان ميعيشون حياتج وبالنسبة الي مو مشكلة نتطلك او منتطلك فاني مو محور حياتة ولا حتى هو اما اهلة ما اكدر اضمن شي
بخصوصهم ويمكن ويا الايام يتقبلوج او يعادوج ما اعرف والله بس بالنهاية انت وهو عايشين ببيت وحدكم ومنعزلين عنهم وتقومون بواجبكم وياهم
- ما ادري حيرة والله
- لا تحتارين اعتبريني اختج وشوري امج واهلج واحجيلها كل شي و صلي صلاة استخارة يرتاح بيها كلبج وينور رب العالمين طريقج وبعدها قرري وويا كل فكرة اتذكري ضياء يحبج هواية واني وياكم واكفة حتى لو امج مقبلت مستعدة احجي وياها
فكري زين حبيبي
صار لازم اروح اتاخرت
فرصة سعيدة اتعرفت بيج وان شاء الله ما اكون ازعجتج
- بالعكس هلا بيج وشكرا على جيتج
حضنتني كانه جانت منتظرة اللحظة اللي تطمنها انه هي بعدها بكلبة والموضوع مجان لعب او ضحك عليها واني هم حضنتها وبستها
طلعت لضياء حجيتلة عن كل الصار وكتلة اعتقد اكو امل منها تسامح بس يبقى موضوع اهلها اذا قبلو لازم نواجه اهلنا احنا بزواجك للمرة الثانية هز راسة بمعنى صحيح ورجعنا البيت وكل الطريق يسالني عنها وعن ردها وطريقتها واسلوبها واني اعيد واكرر الجواب احسة يرتاح
كلش شعور حلو من تشوف لمعة الحب بعيون العاشقين والمحبين او تسمع رجفة الصوت بكلامهم عن بعض وتبتسم ويا البسمة اللي مستحيل تنشال من شفايفهم
بس يا ويل اللي يدخل بهالتفاصيل ويكون هو طرف منهم لان كل هذا داخلة الم ولوعة واشتياق ولهفة وهذني اصعب احاسيس ممكن واحد يمر بيها وما ممكن تنطفي بيوم من الايام تظل تحفر بالكلب وتترك اثر وجروح مثل ما سوت بمنار وضياء ..

مرت الايام والاسابيع بس منار مردتلي اي خبر برغم تركتلها رقم تلفوني حتى تبلغني وما ردت احرجها بطلبي رقمها
بعد اسبوع لاخ واتصل بية رقم غريب كلت ممكن تكون هي شلتة وفعلا جانت منار سلمت علية واسمع صوتها مبحوح ومتوتر مو مرتاحة
- مينا ما اكدر اكمل ويا ضياء
- ليش ؟
- ما اكدر صعبة
- اهلج موافقو مو ؟
من كتلها هيج كامت تبجي
- منار حبيبتي لا تبجين بس كليلي انت تحبي رايدتة 
- اي بس اهلي
- ميخالف اني اليوم امرلكم واحجي ويا خالة واتفاهم وياهم بس اريدج هادية وكوني متأكدة اذا الله كاتبلكم تبقون سوة حتبقون مراح تنظلمون
- ان شاء الله
- يلة هسة ابدل وادك لضياء يجيبني واحتمال يفوت وياية اوكي
- ماشي
بعد ما اجاني وصلنا يمهم وفتنا اني وهو وطبعا امها جانت عصبية وضايجة بس ما قللت من احترامنا ابد وانطيناها كل الحق
كعدت اشرحلها كل شي وضياء هم حجة كل العندة وهي شوية شوية خفت لان اللي افتهمتة منها انه هي هم جانت تحب ومرت بهاي التجربة ويا ابو منار الله يرحمة بس جانت صعب تصدك او تتقبل وضعي ويا ضياء وبالنهاية سالت عن اهلنا كنالها راح نكدر ندبرها ونحاول وياهم وكل شي يرجع طبيعي واني اتطلك منة ويعيشون هو ومنار لوحدهم كالتلنا راح افكر ويصير خير وطبعا عيوني مغابت عن عيون منار اللي كل الوقت تباوع لضياء عكسة هو ينتهز الفرص حتى يباوعلها واحس عيونهم تحجي كل الشوق البداخلهم ...