مسيرون

34

#مسيرون34
Shahd Alsalman
من صحيت بالمستشفى الى هسة واني ما اتذكر اي شي كل اللي احسة غربة ووحدة وخايفة من ناس يكولون احنا اهلج
اكثر شخص ارتاحلة هو بارق وبعدة سنا كمت انتظر اليوم اللي يجوني حتى اروح وياهم ولو ساعات قليلة بس شوي ارتاح
تمر صور على بالي و مرات انام بس احلم بشغلات غريبة او احداث كانه صايرة وياية قبل
لحد ما يوم من الايام جنت رايحة ويا بارق للجلسة دا امشي على الجهاز غمضت شوي و شفت ضياء يضربني واني دا انهزم منة شهكت وفتحت عيني كام علية بارق ووكف الجهاز وسالني بيج شي
و بديت احجيلة ششفت وويا كل حجاية اتذكر شي لحد ما حسيت بتعب اخذني وكعدني
تقريبا رجعتلي الذاكرة صح مو بشكل كامل بس رجعت و يا ريتها ما رجعت

دكيت بنص الليل على بارق شالة وهو جفلان عبالة بية شي طمنتة عني وكتلة دا اعاني من وجع راس وصداع كلش قوي وبنفس الوقت متضايقة
ظلينا نسولف و يحجيلي عن هواية شغلات حلوة مرت وياه وضحكني بس بعدها غفيت وتركتة بدون ما اجاوب هيج جان يصير بيناتنا كل يوم وخلاني احب نسولف وانتظر الليل حتى اغفى على صوتة وشكد ما اكون فرحانة وياه ومرتاحة بالمقابل اتضايق من يكون هو مموجود او يدك او يجي واعتقد هو صار فاهم هالشي كلش زين لان كام ميكطع رسايلة عني كنوع من التواصل بيناتنة وحتى اكون متطمنة لوجودة ..
بيوم كالتلي منار راح نجي نتغدى يمكم مشتاقة اشوفج طلبت منها تكول لبارق وسنا يجون همين لان احس بامان اذا هم موجودين
واجوي كلهم حتى بيت اهل ضياء اللي اصلا ما اتذكرتهم الا بعد ما خلصنا الغدا ..

جنا كاعدين وملتمين كلنا لازمني صداع وصور تمر على خيالي يمكن تكون حقيقة ويمكن لا اباوع لكل الوجوه الكاعدة و مركزة على ضياء ومرتة و امي دتكص الكيك بالسجين من وكعت من ايدهة صوتها رن بأذني و لاحت بعيوني صورة ضياء وهو ديلحكني بالسجين و من وكع ووكعت السجينة منة جان نفس الصوت

بديت اغمض بعيوني والزم راسي واسمع اصوات صياحي و صياح ضياء وامي
كل ما اباوع لاحد منهم اتذكر شي وكأنه رجعت اتسلسلت الاحداث عندي من جنت صغيرة لحد يوم الحادث الوحيد اللي اتذكرة بس مجنت اعرف ليش صار
- ضياء ليش ضربتني بذاك اليوم ؟
- شنو ؟؟؟
صار هدوء و نظرات دهشة من الموجودين والكل موجهة عيونها علية
- انت ضربتني ذاك اليوم وجريتني من بيت اهلي لبيتك وبعدها صار الحادث بس ليش ؟؟ 
- انت دتتذكرين ؟؟؟؟
- مينا ماما دتتذكرين ؟؟
- انت زوجتيني الة برغم كتلج ما اريدة ومموافقة وكتيلي موضوع ديون بابا اللي ماخذها من عمو
- مينا صدك دتتذكرين ؟
- اي منار دا اتذكر كلشي
- يا رب الحمدلله والشكر رديت ذاكرة بنتي
- احجي ضياء ليش ؟
وحجالي ضياء كدامهم عن كل شي وليش اتسرع واني اباوع لماما بنظرات اشمئزاز وامي تخجل تحط عيني بعينها اللي غركتها الدموع
- تدرون يا ريت لو باقية فاقدة الذاكرة ولا عرفت شي عنكم تسوين سحر وصلت بيج الدرجة من الطمع والحقد حتى تاذين وتدمرين عائلة
انتو الكاعدين هنا واحد مجبور ع اللاخ وكلكم متريدون هالحياة انت بابا بعمرك محبيت ماما ولا اهتميتلها
وانت عمة هم نفس الحال حياتكم باردة وما بيها اي شي مهم خلصتو عمركم تجمعون فلوس بس ما جمعتو حب والاهم عدكم ما يروح الورث لغريب
وهالشي كررتو ويانة ضياء ما رادني وهسة اكدر اكوللكم ضحكنا عليكم بموضوع زواجة حتى تقتنعون و لا تحرمو من اللي حبها وحبتة
مثل مسويتو ويا سدير زوجتو لينا اختي وانتو تعرفون هو ميحبها ابد وجان يحب غيرها جبرتو يتركها مو صح منار مو انت هيج كتيلي
- صحيح
- لا تخجلين لينا باوعيلي اليخجل لازم اهلج اللي حرموكم من حياتكم وخططو الها بدون ما يحسبون حساب الكم ولمشاعركم ورغباتكم خفتو لا يطبقون بيكم اللي سوو بعمتي صابرين طردوها من العائلة واذوها
ومن صارت حاجتهم ما تكضيها الفلوس اللي جمعوها ولا كدرت تساعدهم رجعوا لخالة صابرين وتذكرو صلة الرحم والرابط البينهم وهاي اليوم ولدها بيناتنا علمودي اني وواحد منهم عايش بكلة وحدة حتى اني اعيش بكليتة الثانية ..

علموتنا نخاف ونسكت ونضم كل شي ونعيش غصب وناخذ بدون مننطي
وعمة صابرين علمتهم المحبة و يسون كل شي مقتنعين بي و بدون اي مصلحة نقذوني
حتى مفكرتو لليوم تعتذرون منها على اللي سويتو وياها وباول محاولة الكم ابتعدتو لان تعرفون نفسكم غلطتو بحقها وماكو شي ممكن يخليها تسامحكم ..