مسيرون

4

#مسيرون4
Shahd Alsalman
بعد يوم الجمعة اللي صاير بالنسبة الي يوم ممل وكئيب خابروني جماعتي الولد حتى نطلع نغير جو شوية وكتلهم جايكم

- ها شباب شلونكم
- هلا ضياء حبيبي استريح
- شلونك هاشم
- الحمدلله بخير
- واني مالي شلونك بس لو بس هاشم
- هههههه انت الكبد مالتي حبيبي وليد
- اي اضحك علي خطية تدري اليوم دورة وانت رحت لمرتك الاولى هاشم وكام يغار
- والله يا عبودي شكلك انت مرتي الثالثة وغيران منهم ههههههههه
- مو كتلكم لحد يكلة نطلع
- هو غير انت خابرتة ههههههه
- شسوي كلبي طيب
- والله زين خابرتوني طكيت من البيت
- اي والله ملل دا افكر باجر عكبة من نتخرج وين ننطي وجهنا
- صدك ضياء فد سؤال
- كول عبود
- انت دائما اصدقائك هاي كلاس وفيكات من رفعت وشيل ايدك شعجب مصادقنة
- اني احبكم وارتاح وياكم ذولاك مو اصدقائي ذولاك معارفي بس انتو مثل اخوتي واعز
- اهلك يدرون بينا ؟
- ادري انتو صدكتو متزوجكم وضام عليهم هههههههه
( برغم تهربت من سؤالهم بضحكة لكن بداخلي كلش منحرج ومقهور لان هم يعرفون اهلي متحكمين بحياتي وهالشي يخليني احس انه اني بلا شخصية )
- يلة تتعشون لو نكضيها نراكيل ومشاريب
- لا خل نتعشى ونحبسلنا نفسين معدلات
- ايوااا كدة يا وديييع ههههه
- هههههههه

طلبنا اكل وكعدنا نحجي ونحشش وياهم احس نفسي انسان ثاني ما متقيد بشي اللي اريدة اسوي
واضحك من كلبي وما احس اكو مصلحة من ورة هالصداقة بالعكس احسهم اخوان ما ولدتهم امي ..

عبد الرحمن طلب نغير مكان الكعدة بمكان كافيه مفتوح وناخذ نراكيل كالعادة وفعلا كمنا ورحنا
بالطريق هاشم كاعد يمي ويفتح اغاني والولد ورة يصفكون وهلاهل فضحونا بالشارع بس تونسنا كلش والجو جان شوي بي برودة بس من الركص والحماس   بدينا نحس بحر وفتحت الجامات كلها ؛
من دا اسوق انتبهت اكو بنات اثنين واكفات ويا شباب تلاثة بس يحجون بنبرة عصبية برغم مدا اسمع اللي يكولوه من صوت الاغاني بس مبينة جان الوضع كلش متوتر بينهم مشيت وكملت طريقي
وفجأة وكفت وطفيت الاغنية ورجعت ليورة
على البنات
- شبيك ليش طفيتة
- هاي وين راجع شكو
- اصبرو لحظة ذني البنات مدري شبيهن
- هاي شبيهن صدك شو يصيحن

نزلنا احنا الاربعة ونسمع صياح وحدة منهم
-  انت ما عندك تربية ولا اخلاق
- ليش تتجاوزين شكد ساقطة
- محد ساقط غيركم
بديت احجي وياهم وانتبهت عليهم ديتجاوزون بالحجي
- يا شباب خير شبيكم ويا البنات
- وانت شعليك
- لا اني معلية بس شنو كلت اشوف خاف محتاجين شي والبنات ما انطوكم
- ديلة جر منا انت وياه
- اي صار ادلل
البنية جرت الوياها و ديمشون يوخرون من يمهم كامو يلحكوهم جريناهم اني والولد من ياخاتهم ووكعناهم ع الكاع وبسرعة كامو
- لك انت شون تسوي هيج
- كلب تافه تتعدون على خواتي
بعدني ممكمل الجملة بدو الولد يضربون بيهم وهم يريدون ينهزمون من عدنا عبالهم صدك البنات خواتي وطفرو بس الترابة وراهم من الركض ؛
اجوي البنات وتشكرو من عدنا جانو ديتحارشون بيهم وضوجوهم بالحجي فوحدة منهم وكفت وحجت وياهم دترزلهم وزاد الملاسن بيناتهم

اخذتلهم تكسي ورحت وراهم وهم ميدرون لحد ما نزلو دخلو البيت يالا ارتاحيت ورجعنا كلمن لبيتة بعد تعبنا واتأخر الوقت همين
طول طريق الرجعة جنت افكر بالبنية ام شعر الاسود ملامحها مألوفة احسها مو غريبة علية بس عجبتني شجاعتها برغم اني انتقد البنية اللي تجاوب ولد يتحرش بيها بس هم مبينين زودوها هواية وياهم وطبعا اللي خلاني انزللهم لان دائما اخلي خواتي كبال عيني واكول كل شي يصير خاف يتعرضون لهيج شي حتى بلكت الله يسخرلهم احد يدافع عنهم او يجفيهم شر ولد الحرام ..

وصلت البيت وشفتهم نايمين رحت لغرفتي والظاهر امي كاعدة لان دكت الباب علية وفاتت
- ها يمة وين جنت ؟
- يمة طالع افتر شوية غيرت جو
- شبيها هدومك مبهذلة ؟؟
- ماكو شي منيلها مبهذلة
- طالع قميصك وياختك مخربطة متعارك ؟
- لا يوم جنت دا انزع وانت جيتي
- اكيد؟
- اي اكيد
- اكلك يوم اريد احجي وياك بموضوع
- اي يوم كولي
- شوف اني اليوم حجيت ويا مرت خالك نجلاء
وفهمتها لازم تطلعون سوة انت ومينا بعد حتى تتعودون واحد ع اللاخ
- اي ؟؟
- اي ! وشنو اي يعني انت ما تحجي بشي وياها ولا هي وتستحون واحد من اللاخ الى متى وبعد كم شهر زواجكم
...