مسيرون

27

#مسيرون27
Shahd Alsalman
من بعد ما رجعت اني وضياء لبيتنا كمت اختنك من يتقربلي او اشوفة احس من يروح ارتاح دائما راسي يوجعني وشهيتي قلت و بس اتمنى اتعارك واصرخ حتى بنتي كوة طايقتها
ما انام بالليل زين اكوم على فزة من النوم بسبب الكوابيس ودائما شي خانكني بالحلم بس من اروح لاهلي ارتاح واحس اشتاق لضياء ومن نرجع احس بكره تجاهة حتى ريحة دائما مطيبة بالبيت ولا بضياء برغم انظف اني ومينا وارش معطرات جو بس مديفيد
رحنا طبيبة مثل مراد وبعد جهد جهيد لان ظليت اتجادل وياه ومينا تفاكك بيناتنا وتهدينا وبالنهاية طلع ماكو شي مجرد اعصابي مشدودة انطتني مهدئ خفيف لان ارضع بس مفادني بشي ابد ..

جنا دنصب الاكل اني ومينا لان ضياء على جية واندكت الباب طلعت ام مينا وفاتت وطبيعي لازم تسلم بخشم يابس وتظل تباوعلي من فوك ليجوة وتذب حجي ما معناه اني خطافة الرياجيل وبواكة الزلم هاي اللي دائما تكولة الي
مينا كالتلي صوت دندن تبجي رحت صعدتلها جانت توها كاعدة وتبجي جوعانة رضعتها و سمعت صوت ضياء و نزلت كعدنا كلنا ع السفرة ودناكل وضياء يحجي ويا مرت خالة ويسولفون
كملنا اكل واحس معدتي نار بيها وراسي يريد ينفجر
بس رحت نمت وهمين الكوابيس ما خلتني اتهنى بنومي
كعدت على صوت صلاة المغرب جفلانة اجة ضياء علية جابلي مي وفتح الضوايات ومسح على راسي يسمي بالله ويصلي ع النبي واني اختنك بالزايد اريدة بس يسكت
متعودين نصلي سوة ضياء كدامنا واني ومينا وراه لنص الصلاة ووكفت ودخت ردت اوكع رحت كعدت كملو صلاتهم واجوي علية كتلهم دايخة كلش
وتكررت هالحالة وكمت اضوج اصلي اصلا تركتها ومن يحجون وياية اكللهم بعدين اصليها او مثلا اتحجج بملابسي وصخة من استفراغ دندن المهم ما اريد اصلي
وبعد كم يوم طلبت من ضياء يوديني لاهلي كم يوم احس ما اتحمل اكعد دقيقة بغرفتي او البيت حتى اهل ضياء كارهتهم كلش وهم ديحسون اني تعاملي متغير وياهم بس اني صدك ما اعرف شبية ممرتاحة كلش واحس كلام امي صحيح من كالتلي اخاف مترتاحين ويا ضياء واهلة وهسة بين كلامها بس بعد شيفيد الندم
اخذني لاهلي اول مرة انام مرتاحة كعدت لوجه الظهر تقريبا حتى دندن ما حاسة عليها سارة يمها اول مطلعت من الغرفة جانت امي فاتحة قران بالبيت هاي عادتها تفتح شبابيك البيت وتمسحة وتفتح قران قبل اذان الظهر
من سمعت صوت القارىء عبد الباسط كمت ابجي سارة فزت علية
-شبيج عيني اسم الله
- نصي عفية سارة
- شكو يوم اسم عليج حبيبتي
- ماما سدي سدي ما اريد اسمعة
- اسم الله الرحمن نصي يمة سارة
- دا اكلج سدي سدددي

سدتة وحضنت امي وجسمي كلة يرجف ما اقبل اهدها وهي تقرة على راسي يزيد وجعي وتهيج اعصابي اكثر واكثر دفعتها بلا ما احس وكمت اركض للغرفة سديت الباب وابجي بصوت عالي واسد اذاني ما اريد اسمع شي وهم يدكون الباب علية وخايفين
تكورت على نفسي بالكاع وصرت اهدى شوي شوي لحد ما نمت وحسيت على كسرة الباب وفات اخوية شالني حطني ع الفراش خلوني نايمة للعصريات كعدتني امي وتسالني واني ما اتذكر اي شي من الصار سارة كالت يجوز جنتي حلمانة وجفلانة ..

بقيت تقريبا اسبوع عدهم كمت من اشوف امي تريد تفتح قران اطلع من البيت بحجة افر دندن او مثلا ابقى بالغرفة واحط سماعات بعد متحملت ابقى اكثر رجعت للبيت ونفس الشي ولا كأنه ارتاحيت عند اهلي اشوف البيت جنة مكبرة والفراش هو كبري
بهذا اليوم حاول يتقربلي ضياء وصرت ادفعة واضرب بي وابجي حتى الطفلة فزت على صياحنا ومينا اجتي تريد تسكتها اخذتها لغرفتها ونومتها ورجعت علية وضياء صاير اعصاب نار وبس يصيح
- صلو ع النبي يمعودين شبيكم بتكم حتتخبل من وراكم والله
- كليلها لهاي شوفيها مثل المخبلة
شبيج انت يا الله شبيج
شال الكلاص القريب يمة ع الطبلة وكسرة بالحايط
- ضياء كافي مدتشوفها شصاير بحالها
- طبها مرض هاي مخبلة مو صاحية لج شتريدين منو مضوجج هنا وهيج دسوين بية كرهتيني بكل حياتي
- مينا طلعي برة اكرهة اكرهة ريحتة تلعب النفس
- محد يلعب النفس غيرج
- لك عيني فدوة كافي روح انزل اشرب مي
- اريد اشرب من دمها
لج اتخبل منج والله اكرهج
- طلكني ما اريدك حتى بنتك ما اريدها بس طلكني
كام يكفر و يغلط ويكسر كل شي يشوفة حتى الفراش ملخة تملخ وكل ميريد يوصل ويكتلني مينا تصدة وتصير بيها
لحد ما صاحت بينا بكلمة " بس " هو سكت واني سكتت بس ابجي اخذ سويجة وطلع واني كومتني مينا بغرفتها نومتني وغفيت ..