مسيرون

6

#مسيرون6
Shahd Almsalman
صار وقت العصر و دكت علية امي تذكرني بالموعد حتى اروحلها لمينا ورجعت للبيت بدلت ومريت على بيت خالي استأذنت منة علمود نطلع وقبل ووصاني عليها اجتي هي سلمنا وطلعنا ..

مو بس الجو بارد حتى اني وهي باردين كل واحد بينا بعالم ثاني مسوي نفسي ملتهي بالطريق ودا اسوق وهي تباوع لجهة وحدة بدون متندار او تنطق حرف
حتى اكطع هالسكتة والسنطة فتحت اغنية ونصيتها شوي
- ضياء بيها مجال اعلي الصوت؟
- اي اكيد اخذي راحتج
- شكرا
- شنو انت مثل مودة وزينة يحبون يسمعون اغاني بالسيارة هههه
- اي هو الجو هم يساعد
- شكلها راح تمطر كلش مغيمة
- يمكن هم كالو اكو امطار خلال اليومين الجاية
- منو كال
- بالاخبار غير
- هاا يعني تابعين اخبار
- سياسية رياضية اقتصادية والطقس اختمها يالا اكلب القناة
- ههههه حلو بس شعجب اني اعرف البنات ميحبون الاخبار ابد
- هي مو مسألة حب بس شوية واحد يعرف شكو بالعالم شديصير يعني معلومات خل نكول
- هم صح
- شوفي مطرت الدنيا
- اييي شكد حلو
- تحبين المطر
- كلش وانت
- امممم يعني نص ونص بصراحة ما احب اتبلل اتضايق ما اعرف ليش
وصلنا المطعم نزلت وبيدي الشمسية واخذتها وياية جانت قريبة مني كلش واثنيناتنا جوة الشمسية ومع هذا محسيت بشي ابد ...

كالي راح اعدل شعري بالحمام واجي لان تبللت شوية هزيت براسي بمعنى روح
اول طلعة النا سوة وامي من قبل يومين توصي بية احجي وياه واسمعة واسولف واصير سبعة وحركة واكون ضاحكة ومبتسمة طول الوكت وافتح مواضيع من جوة الكاع ووصتني اوافق على اي شي يكولة
ما اعرف منو بينا لازم يسوي كل هذا وليش اتصرف بهذي الخفية
يعني بهالحالة لازم يحس اني ميتة علي واريدة واني ما اريد بس معارضت امي كتلها اي عادي ومع هذا مسويت اي شي طول الطريق هذا الحديث الدار بيناتنا واغلبة سكتة وهدوء واحس بي مجبور مثلي واكثر ..

طلبنا اكل ودننتظر ماكو بيناتنا اي حديث مشترك كل شي نحجي بي ينتهي بعد جملتين هذي هي مختصر طلعتنا اللي بالنهاية بدل ما نتقرب من بعض بيها صرنا ابعد من البعد نفسة

رجعت وحجيت لامي لان هي دتنتظرني على نار حسب مكالت ومن حجيتلها كالتلي عادي هاي دلع بنات وخجل مبيها شي طبطبت على جتفي وكالتلي تتعود تتعود وطلعت وسدت الباب بدون متنتبه على وجهي المهموم
داومت ثاني يوم كلية ومر يومي كلة طبيعي وعادي لحد اخر ساعة من الدوام جنت اريد اطلع انداريت دا اسلم ع الولد لان كالولي الله وياك وشفت البنية نفسها اللي شفتها بذيج الليلة هي ومشيتها وشعرها الطويل اللي لامتة بنفس الذيل وتركض بمشيتها جانت تريد تلحك محاضرة ومن بعدها عرفت هالوجه ليش مألوف بالنسبة الي لان هي ويانة بس اني ممنتبه عليها ولا حتى الولد
رجعت ورحت وراها دا اشوف اي قاعة دخلت ومن قريت الجداول وارقام القاعات عرفت هي قسم علوم احياء ومرحلة ثالثة بس مطولت ولا انتظرتها لان اجاني تلفون من سدير علمود الشغل ورحت

بقى بالي وكل شي يم القاعة جنت اتمنى لو احجي وياها بدون سبب وبدون ليش .. مرت الايام وكمت اشوفها من بعيد بس ما اكدر اتقرب منها طول الوكت صديقاتها وياها
هاشم بدة يلاحظ علية شرودي وصفناتي لان سألني بس محجيتلة شي ردت تكون هي سري اللي اضمة عن الكل
جنت محتاج اعيش قصة ولو وهمية وياها بعدين سألت نفسي ليش وهمية خليها تكون حقيقة
اتقصدت امشي من يمها واخليها تنتبه لنظراتي بس الظاهر هي عرفتني ورأسا ابتسمت واني هم ورحت قريب منها
- مرحبا
- هلا شلونك
- هلا بيج شلون صدفة حلوة هاي
- انت طالب هنا ؟
- اي وانت همين مو
- اي
- بصراحة شبهت عليج بس من ابتسمتي اتاكدت هاي انت
- هههه والله اني هم ؛ فرصة سعيدة
- اني الاسعد واسمي ضياء
- واني منار
- عاشت الاسامي
- شكرا .. من رخصتك حتبدى محاضرتي

ترخصت مني وراحت واني عيوني وراها وورة مشيتها واحسها دتباوعلي بس تستحي تندار الي
حسيت بشي حلو لاول مرة بحياتي يشبه الكهرباء الخفيفة اللي تنتل الاصبع من واحد يفتح الضوة او يلامس اي نوع من الكهربائيات ..