مسيرون

16

#مسيرون16
Shahd Alsalman
كعدت ضياء من نومة اللي مبين مجان مرتاح بي او ديحلم بشي خانكة العرك يطلع من وجهة وحركات عيونة وهو مغمضهم سريعة وجسمة ثكيل مثل المشلول كعدتة وميسمعني لحد ما خليت ايدي على جتفة وخر مني وكام بسرعة وراح للحمام

عفتة على راحتة الله يساعدة اني حاسة بي واعرف هو مجبور حتى من قبل لا يكلي البارحة ولو اني مالي ذنب ومكسورة جناح مثلي مثلة بس تركتة يحجي اللي بداخلة بدون ما اسكتة او ابجي كدامة مشاعرة اللي يحس بيها اصعب من مشاعري لان هو رجال والرجال اذا انغصب على وضع معين ينكسر ويتألم من داخلة ويكسر اللي حواليه ميكدر يعبر عنها ببجي او صراخ مثلنا احنا
بعد تقريبا نص ساعة اجوي اهلنا يباركولنا بالصباحية وامي اخذتني على صفحة وسالتني شسوينا مجاوبتها شي كتلها كلشي تمام بوستني وكالتلي انت بخيلة ومتحجيلي شي جاوبتها بابتسامة مثلتها بخجل حتى تقتنع وتتركني بحالي وعيون ام ضياء عمتي متوجهة علية ..

كامت عمتي واخذت ضياء على صفحة بس خفت لا يجاوبها شي ويتناقض كلامنا حتى لو مجبور اني هم مثلة مجبورة ما اقبل ينطي بية كدام اهلة لان اني حافظت علي كدام اهلي
رحت لحكتهم جانت توها دتحجي وياه
- ضياء حبيبي بس لحظة
ها عمة اسفة دتحجون
- هههه لا عمة تعالي
- بس من رخصتج اريدة شوي
- اي عماتي اخذي
- شكرا حبيبتي
تعال

اجة وياية ولزمت ايدة دا اصعدة حاول يجرها عصرتها والظاهر افتهم علية وهو هم بقى لازمني
من اختفينا عن انظارهم تركت ايدة
- شبيج ليش صحتيني
- ضياء اني اعرف هالوضع مفروض عليك وادري عمة شراح تسالك بس اريد اطلب منك طلب
- شتريدين
- لا تحجيلها شي لا تخجلني كدامهم امي سالتني وكتلها كل شي تمام
صدكني ما اريد شي منك غير بس تحافظلي على كرامتي كدامهم
- وليش كلتي هيج
- لان اذا اكول غير هيج معناها راح يزيد تدخلهم خلينا نمثل كدامهم كل شي ومن يطلعون نتفق بيناتنا على كم شغلة
- وانت ليش دسوين هيج
- لان اني مثلك مجبورة وما اكدر اكول لا
سكت هو و صفن شوية وتركني ونزل وان شاء الله ميخجلني هاي كل امنيتي حاليا ..
كعدنا يمهم واتريكنا سوة واني وضعي مو احسن من وضع ضياء اللي بدة يمثل الدور مثل مدا اسوي اني واعتقد اقتنعو اهلي واهلة انه احنا مرتاحين ومتفاهمين سوة ..
طلعو وودعناهم وبديت الم الغراض ولو امي وامة مخلوني اشتغل كملو كل شي بس ردت شي التهي بي
واجة ضياء وكعد يمي واني دا اشتغل بالمطبخ
- مينا صدك انت مجبورة
- يهمك تعرف ؟
- اي
- اني مجبورة من زمان بيك واعتقد انت هم نفس الحالة صدكني مو انتقاصا منك او كرها بيك بس مكدرت اشوفك غير انك ابن عمتي ومثل اخويا
- واني هم ما بيوم تخيلتج غير بت خالي واختي
- وعلى هالاساس احنا لازم نمثل كدامهم مرتاحين حتى يبطلون يتدخلون بحياتنا وبنفس الوقت ما الي اي دخل بحياتك واذا انت تريد تتدخل بحياتي بعد هاي راجعتلك لان انت زوجي حتى لو مجبورين
- ما اتدخل بحياتج ولا اضوجج ولا اغثج واسف على كلام البارحة بس جنت متضايق كلش
- ولا يهمك مصار شي
- ما اعرف شلون اشكرج شلتي مني حمل وهم جبير
- اني اريد اشكرك لان فهمتني سهلت علية واختصرت شرح طويل

وهيج اتفقنا بيناتنا انه نعيش هنا مثل مجنا قبل لا نتزوج مجرد ساكنين بالبيت ومنتدخل واحد باللاخ ابد
بس هالشي يحرك الكلب حيفنني عمري وتروح ايامي بالنهاية الخاسر الوحيد هو اني سواء كملت وياه او تطلكت منة مجتمعنا وبالاخص اهلي ميذبون اللوم على الرجال والبنات بالنسبة الهم هم وخلصو منة بزواجهم
برغم كلت لامي قبل لا تصير خطبتنا اني مراضية ومموافقة اخذت منها راشدي فر راسي وكالتلي تريدين تفضحيني بين اهلنا علمود يكولون عاشكة لو عدها شي وبالاخير تبورين ومحد ياخذج تكعدين على كلبي
اذا هي امي متنازلة عني بسبب الناس وكلامهم وبسبب الاملاك ف اني لا شيء بالنسبة الها
وفكرت هواية حتى اتخلص من هالزواج حتى انهزم منهم واطلع بليلة ظلمة وما التفت وراية لكن بالتالي راح يلكوني مو علمود يحتضنوني او يسمعوني اكيد
بس علمود انقتل او اذا صار تدخل من احد راح ارجع لنفس النقطة اللي هي زواجي من ابن عمتي ضياء ...