مسيرون

14

#مسيرون14
Shahd Alsalman
اخذت تكسي وكوة دليتة العنوان احس تهت وما اعرف وين اروح اتذكرت كلام ايات وتحذيراتها وتذكرت حجي ماما وسارة من كالو لا يضحك عليج برغم هم فرحولي
وثقت بي لدرجة ما اشوف نهاية حزينة ولا فراك بيناتنا وما فكرت بيوم يضحك علية واكون بحياتة مجرد علاقة ووقت كضاه ..
مستحيل ..

وصلت البيت انطيتة فلوسة وراح شفت هوسة ولمة
جوارينة وعمامي ركضت بسرعة وفتت واسمع بطريقي صوت صريخ ونحب وبجي وامي تكول
يمة ابو بيتي راح
ملتمين !!
ملتمين على تابوت ابوية اثنين لازمين امي من جوارينة وسارة دتلطم وتصيح والكل يبجي بحركة
صدمتين بنفس اليوم واثنينهم ودعوني بلا كلام ولا معاتب ولا مسامحة..
ليش !!
بقيت واكفة ما سويت اي شي وصافنة على نعشة لابوية كامتلي سارة تلزمني وتحضني وتهزني وتكلي مات ابوية مات وتصيح بعلو صوتها تريدني اواسيها بهالمصيبة
نزلت دموعي وبس هي اللي جانت تتحرك وتوكع من عيوني تنزل للكاع مثلي جنت بسابع وبهاي اللحظة نزلت لسابع كاع
تقربت من اخويا اللي واكف ويبجي بلا وعي منة ويصيح بصوت مخنوك وحجيت وياه
- افتحليا
- شفتح  منار شفتح مات وراح
راح حزام ظهري شفتح
- افتحليا اريد اشوفة
- استغفر الله يا رب لك يابة كوم منار تريد تشوفك

عفتة ونزلت ع الكاع كعدت وفتحت التابوت رادو يوخروني وامي كالتلهم عوفوها
فتحتة وجان ملفوف هاي تاليتة لابويا ينلف ويتغطى وما اشوف وجهة الضاحك المنور كل حياتي
وخرتة الغطا عنة واخويا يصيح كافي
والنسوان يكلولي كافي يمة مو زين عليج
ردت بهاي اللحظة اشكيلة واحط همي بحضنة واحس بيدة تمسح على راسي واكلة ع الصار بية
بعدني مشبعت منة وبعدني باول وكعة بحياتي المن اشكي بعدة و منو يفهمني مثلة
من فتحت طلعلي وجهة شاحب وشفافة زركة وبعدة وجهة هادي ومريح حتة والروح طالعة منة باوعتة وصافنة علي عاتبتة بدمعي ونظراتي دمعاتي ما يطلعلها صوت اختنكت بعبراتي وحسرتي
كومني اخوية وشالني منة والرياجيل غطوه وشالو للتابوت
ويصيحون لا اله الا الله
زاد الصريخ والصياح وامي فقدت بالبجي واختي تضرب على وجهها والبقية واكفين ومقهورين
كعدت ع الكرسي بدون اي كلام ولا صياح ولا اي ردة فعل
اجتي وحدة من الجوارين الكبار ويا عمتي وكعدو يمي لزمو ايدية يريدوني احس او احجي اسوي اي شي  خافو علية
- منار حبيبة عمتج صرخي لا تسوين هيج
- يمة مو زين هيج عليج لا يصيرلج شي
- ما بية شي
اني زينة
- منار حبيبتي
- هاهية عمة شسوي مراح يرجعلي ولا يكلي اني هنا
كامت تبجي عمتي وتلطم
- كومي سارة
نقوم بعزة ابونا كومي يلة
ظلت تبجي كمت عليها وضربتها راشدي وصحت بيها كومي يلة كومي نسوي حقة علينا
سكتت وهي تبجي وكامت حضنتني وصعدتها بدلنا لبسنا الاسود و عزلنا البيت وحضرنا الفاتحة وعماتي ويانة امي ظلت كاعدة وما سكتت من البجي

3 ايام فاتت علية بس جنهم
نار تحركني ما اعرف على شنو انقهر لو على شنو ابجي
انسى انه هو ميت واسمع صوتة واني اشتغل اندار لان هو صاحني راد مني مي ومن اباوع ما الكة احد بس نسوان لابسة اسود
احجي بداخلي ليش يابة هيج شلون انطاك كلبك تعوفني وتخليني اشهك على صوتك واتمناك يمي بعد ما جنت كبالي ليش تروح بلحظة وما تنتظر احجي وياك هيج هنت عليك وانت التحبني واني اللي متت بلياك لا اشوفك لا اسمع صوتك لا اتحارش بيك لا تحس بية كل هذا ماكو بعد
وميفاركني خيال ضياء وكلامة معقول كدر يتزوج غيري ويلزم ايدهة لو يضحك بوجهها لو هي حتخاف علي مثلي
هيج هنت بسهولة عليهم بابا وضياء كسروني وهدو حيلي بروحتهم 
بابا الة عذرة وجان مريض وراح لدار حقة يمكن ارتاح بس عافلي التعب والقهر
بس ضياء شنو جان عذرك ليش بشنو قصرت وياك معقولة بالنهاية ضحكت علية وصرت بالنسبة الك مجرد علاقة
صرنا روح وحدة احس بيك وتحس بية اعرفك شمحتاج من غير كلام ومع هذا محسيت ولا خليت بيوم ببالي هالغدر
ومنك انت ؟
بشنو اصبر نفسي وشلون راح اتخطى كل هالوجع والعذاب
برغم جرحة وغدرة وخيانتة الي بس محتاجة اغفى على صوتة ومشتاقة اسمع منة كلمة تريحيني تهون علية مصيبتي
سلمتك بيد الله ياخا..
مكدرت اكول خاين او ادعي علي بعدني اكول بداخلي يمكن مظلوم وارجع اصارع احساسي اللي خذلني واكول لا هو تركني هو ضحك علية وكذب كلشي كالة الي كذب ..