مسيرون

26

#مسيرون26
Shahd Alsalman
سافرنا بعد يوم من العرس شهر عسل وتركنا كل شي ورة ظهرنا عشنا احلى ايام نطلع ونفتر وما نرجع الفندق الا الفجر نرتاح كم ساعة ونطلع مرة لوخ مخليت شي بنفسها لا اكل ولا لبس ولا اي مكان وهي محرمتني من شي وفرحانة وياية ..

خلص شهر عسلنا و رجعنا وطبعا راح نسكن اني وياها ومينا بنفس البيت استقبلتنا هي وجانت مسوية اكل ومرتبة غرفتنا وهي ومنار كلش وحدة متفاهمة ويا اللوخ مرات انقهر  على مينا لان انظلمت وهالشي بركبة اهلنا وما بيدي شي اقدمة الها واتمنى الله يعوضها خير عن كل شي ..
بعد فترة من زواجنا صارت منار حامل وطبعا امي واهلي كلهم فرحانين ما عدا بيت اهل مينا يعني خالي ومرتة اللي كل متجي تسمع منار حجي او تغثها فكتلها لمنار بعد متطلعين من الغرفة من هي موجودة وتبقين هنا لحد متروح وهيج شوي خفت المشاكل
بعد ولادة منار لبنتنا اللي سميناها دانيا خليتها عند اهلها تكضي فترة الاربعين يوم بس مفاركتهم ابد كل يوم يمهم وصرت اضوج اروح لان هي مو بالغرفة واشتاق لهاي الصغيرونة اللي لعبت بكلبي خلتني اشوف الدنيا بلون ثاني
مشاعر الابوة وخاصة بأول طفل متنوصف الاعبها وانومها بحضني ومن افوت اسمعها تبجي اول ما اكول باباتي حبيبي تسكت وتظل تباوعلي تعصر اصبعي بيدها الناعمة اندمج وياها لدرجة منار غارت منها وتريد هي هم تشوف اهتمام مني تضحكني بتصرفاتها وغيرتها من بنتها واحضنهم وابوسهم هم الاثنين
والحمدلله خلصت فترة الاربعين و رجعنا لبيتنا ومنا بدت تتغير حياتنا ..

جنت متخيل راح نكون اسرة صغيرة هادية ونسعد بعضنا اني ومنار بس من اول ما رجعنا كأنما اني وهي مثل الديج والدجاجة بس نتناكر ونتعارك على اتفه سبب مثلا اول يوم من رجعت جانت مينا عند اهلها وسافرت وياه اختي واخوها كم يوم تغير جو اول ما فاتت منار كالتلي انه دتشم ريحة مطيبة كلش بالبيت اني فكرت ممكن تكون اكو زبالة او شي  بالثلاجة كتلها ماكو  شي وهي ممقتنعة ظلت تدور وتدور وصايرة عصبية كلش من كتلها ماكو شي عاطت بوجهي وكالت شنو ماكو عفتها ومجاوبتها بس ضجت من اسلوبها وتكرر هالموقف لحد ما كمت اني هم ارد عليها بنفس طريقتها
طول الوكت ضايجة ومتوترة ومخنوكة واني هم ما اطيق البيت صرت ابد وانهزم منها باول فرصة تصيرلي تقريبا اني وهي صار شهر ونص هذا حالنا
رجعت مينا وكامت تنتبه على الجو المشحون بينا
شفتها كاعدة بالحديقة من رجعت من الشغل رحت كعدت يمها
- سلام عليكم
- عليكم السلام الله يساعدك
- و يساعدج شلونج
- الحمدلله وانت
- الحمدلله
شمكعدج هنا لوحدج
- والله ماكو بس شوية الجو حلو كلت اشم هوا
- اي زين سويتي
- ضياء شبيكم انت ومنار ليش هيج صايرين تتنرفزون واحد ع اللاخ
- والله ما اعرف هي عصبية ورة الولادة طول الوكت واني ما اتحمل هالشغلة وتكب بيناتنا
- زين خاف عدها كأبة ما بعد الولادة
- وهاي شنو نوب
- يعني هاي حالة تصير بعد ما تولد الام ويسببلها عصبية وقلق باعتبار الوضع جديد عليها
- والله ما اعرف زين اخذها للدكتورة ونشوف شتكولين
- اي شكو بيها اقلها علمود صحتها هي
- خوش لعد خلي اروح اشوفها واشوف دندن اشتاقيتلها
- اوكي عيني الله وياك
فتت للغرفة ولكيتها شابة نار بحيث دندن صوت بجيها لجوة واصل وهي عايفتها ولا يمها
- هاي شبيها دندن ليش تبجي
جانت تباوعلي بعصبية وكامت سحبتها من حضني بقوة والطفلة عاطت وصارت تبجي اقوى
- شبيج منار
- وخر عنها روح كمل حديثك ويا ست الحسن ليش صعدت
- ام عقل الصغير غرتي عههههه
- لا مغيرانة ما اغار على واحد مثلك
- واحد مثلي !!
- اي اذا عاجبتك مجان ظليت وياها شكو جيتني
- هاي نبرة ونغمة جديدة منج سدي السالفة وكافي
- ليش كافي قابل مجذبة لو مالي حق احجي
- استغفر الله العظيم
طبعا ويا صياحها تبجي الطفلة عفتها وطبيت للحمام وهي مستمرة تصيح ومدا افتهم شي من حجيها احس نفسي مخنوك منها لدرجة اريد ما اتلاكى وياها ابد
طلعت من الحمام واخذت دندن بحضني سكتتها و غفت عندي ونامت وديتها لغرفتها ورجعت بداخلي اريد اراضي منار بس احس دا انفر منها واعتقد هي نفس الشي
نمت يمها وحضنتها وخرتلي ايدي تحارشت بيها اريد شوية تفك كامت تدفعني
- شجلبت وخر عني
- منار شنو هاللسان الطويل شبيج انت
- اني لساني طويل لو انت متعرف تتصرف
- خلص نامي وباجر حضري نفسج نروح للدكتورة
- يا دكتورة
-دكتورتج حتى نجيك وضعيتج ووضعية دندن وبنفس الوقت نشوف ليش انت عصبية بعد الولادة
- خو كولي انت مخبلة على وجه ليش تلف وتدور
- نامي عاد كافي الطفلة حتكعد على صياحج
- اشو ما انام
- كيفج تصبحين على خير
درت وجهي ونمت بدون ما اديرلها بال حتى لا تكمل كلامها وغفيت ...