مسيرون

1

#مسيرون1
Shahd Alsalman
- يلة يا بنات دنلحك نوصل قبل الازدحام
- ماما يا شال البس احلى المشجر لو المقلم
- لا المشجر يلة بسرعة اني برة واكفتلكم
- اني كملت
- شكملتي يمعزاية هاي شلابسة تريدين يحجون علينا امشي روحي بدلي لبسي الفستان الاخذتي اخر شي
- يمة ذاك مال مناسبات شون البسة عروس اني لو رايحة خطار
- لعد انت شنو مو عروس يلة لا تظلين تحجين
- بس اني ما اريد ومحد طلبني
- دمشي من كدامي لا تغثيني
اني طالعة قبلكم حكعد بالسيارة يم اخوكم لا تتعطلن
اخذت جنطتي وطلعت حتى اكعد بالسيارة يم ابني ضياء
- ها يوم وين البنات
- هسة يجن
- عود ليش البنات هلكد يطولن بالتبديل
- لبس مكياج شال شعر غير كلة ياخذ وقت
- روحكم طويلة والله والكم واهس
- اي من تشوفون وحدة مخربطة ومحلوة عود هم كولو هيج انتو الولد كلشي ميعجبكم
- هههههه يعني كل شي بالمعقول حلو

اجوي البنات وصعدو وكل شوية وحدة طالبة من ضياء يفتحلها اغنية شكل و هو على هواهم لأن  كلش مدللهم
وصلنا لبيت اخويا وكالعادة استقبلتنا مرة اخوية نجلاء بالاحضان والبوس وفتنا البيت

احنا بنات اثنين واخوة اثنين
اخوية رافد ابو سند الجبير ومرتة نجلاء بت خالي
وعندة بنات اثنين لينا ومينا وولدين سند و فهد

واني هدية متزوجة من ابن عمي كامل
وعندي اثنين ولد سدير وضياء و 3 بنات اسيل ومودة و زينة

اخويا عابد البعدي توفى من جان عمرة 18 سنة جان مريض قلب من الولادة

واجتي بعدة صابرين اختي الصغيرة تزوجت غريب وعاندتنا وتبرينا منها ومن ذاك الوكت ومر اكثر من 18 سنة واحنا منريدها بعد
لان بعائلتنا ممنوع زواج من غرب و خيرنا ميروح لغيرنا فكلنا متزوجين من اقاربنا

ولهذا السبب زوجت ابني سدير لبنت خالة لينا وبنتي اسيل لابنة الجبير سند
والباقين نفس الشي ياخذون الاخوة بس زينة حاجزها ابن عمتها من الصغر

طبعا ما نعيد الغلطة وناخذ رايهم مثل ما سوينا ويا صابرين اللي دخلت الكلية ومناك تعرفت على زوجها ايهم وصارت بينهم علاقة وتحدتنا وتزوجتة لهذا كل واحد منهم يعرف مصيرة ويا بنية راح ياخذ والبنات كذلك يعرفون منو حياخذهم حتى لا يفكرون بغير واحد .

هيج نظام عائلتنا و ممنوع احد يعترض لان بالنهاية احنا نريد نحافظ على املاكنا ونكثر نسلنا بزواج الاقارب وهمين النعرفة احسن من اللي منعرفة منأمن بأحد غريب ..

بيناتنا احنا واخويا ابو سند شغل مشترك مو بس علاقة عائلة او صلة قرابة
من قبل كامل زوجي تشارك وياه بشركة اثاث وبعد ما كبرت ونجحت بجهودهم طبعا فتحو مشروع ثاني شركة استيراد وتصدير للمواد الاولية مال اثاث همين يعني تقريبا صارت هي مصلحتهم والهم وكالات ببغداد وبمحافظات ثانية وطبعا بخارج العراق
اللي لازمها هو سند وسدير بعد ما اتخرجو من كلياتهم واكيد اختارينالهم قسم ادارة الاعمال والمحاسبة حتى تفيدهم بشغلهم وضياء يشتغل ويا ابوه لحد ما يتخرج باقيتلة سنة وحدة
وفهد بعدة بكد مودة يدرسون سادس وهمين متفقين اذا خلص سادس ودخل اول كلية يلزم الشغل ويا ضياء يتدرب ويتعلم وياهم ..

البنات جانو يحبون يدرسون اقصد بنات اخوية وبناتي بس احنا مو بحاجة دراستهم بالاخير هم حيتزوجون وماكو بنية تشتغل كل شي متوفرلهم فلهذا حدهم للسادس ونكعدهم بس الولد لازم ياخذون شهادة لان تفيدهم بشغلهم ...

الحمدلله لازمين الامور كلها بيدنا ومسيطرين عليها ولدنا ميخالفونا واللي يخالف يتحمل نتيجة اعمالة لان هسة هالوكت بي هواية مغريات فلازم يعرفون انه مرجعهم الاول والاخير هو احنا وماكو شي برغبتهم او بمزاجهم يسوو بدون ما نوافق احنا علي وهم يعرفون هذا الشي لهذا كلهم ماشيين على اللي احنا مخططيلة ..

حاليا اللي عايشين من اهلي هم خوالي وامي اقصد بيبية اولادي " حمدية " بس ساكنة يم خالي الجبير بغير محافظة
وعمامي اثنين ووابوية عبد القادر متوفي بسبب موضوع صابرين لان فشلتة كدام عمي الجبير اللي جان رايدها لابنة وحاجزها وطبعا كلنا جنا نلومة لان يدللها وينطيها مجال هواية وحتى كلية خلاها تدخل..
احنا انجبرنا نزفها من بيتنا بس كنالها انه هذا اخر شي ممكن نقدمة الها لان كدام الناس منريد ياكلون وجهنا
ومن وراها تنسى عدها اهل ولا تحاول تتصل بينا ومن قوتها وصلافتها كالت عادي وميهم واتذكر كالت احسن ما اكون صفقة وشروة وبيعة الكم اختار حياتي اللي اريدها لان هذا زواج مو تخليص اتفاقية تجارية وورة ما اتزوجت وراحت باسبوع ابوية انجلط وظل فترة يعاني لحد ما اتوفى ومع هذا كاللنا اني راضي عنها ومسامحها لكن من اجتي لفاتحتة كنالها انه هو غضبان عليج وحرمج من الورث وبشهادة اخوية و مرتة وزوجي حتى بعد تأيس لان منريد يروح المال والورث لرجلها الغريب ...