بكلمة عمري والعمر فاني .. انت غير الناس عندي ولَك غلا ثاني

20

بعد صلاة المغرب بدوا البنات يجتهزون .. وأول وحده مخلصه كانت سلوى .. أما البقيه بعدهم
ميره: ماما يلا ابا البس فستاني
نوف: صبر يا ماما خليهم يخلصوني
ميره: ماما انتي وايد باقلج .. انا بسرعه بخلص
نوف: ميروه لا تحنين فوق راسي لعوزتيني تراج
ميره:ماااااامااااا
ساره: انزين خليها تلبس فستانها هني
نوف: حاطتنه ف الكبت فوق
ميره: بقول حق بابا ينزله
نوف: بابا محد بعده ما وصل
ميره: اتصلي عليه بيوصل
نوف: ايبي الفون انزين ما تخلين الواحد ف حاله اففف
راحت ميره يابت الفون وعطته نوف الي بدورها اتصلت على سلطان وعطته حق ميره عشان تكلم ابوها
سلطان: الو
ميره: بابا انت وينك
سلطان: ليش تسألين
ميره: بابا ابا البس فستاني وماما حطته فوق
سلطان: انزين اصبري يوم بتخلص بتلبسج اياه
ميره: ما اريد بابا باقلها وايد هي
سلطان: خلاص تعالي انا فالغرفة
ميره : اوك
نوف: ميروه اتسبحي وبعدين البسي الفستان .. ولا تلعبين بالأغراض اتلبسي وتعالي هني على طول بسوي شعرج
ميره : أباه مفتوح اوك
نوف : يصير خير انتي روحي وتعالي
..............................
بيت ابوحمدان بالتحديد ف غرفة حمدان .. كان داخل هو امه ف نقاش حاد شوي
ام حمدان: حمدان اسمع كلامي مهره ما تنفعلك صدقني
حمدان: يما اليوم الملجه شو تبيني اسوي
ام حمدان: كنسل لا تملج خلاص ما بيصير شيء
حمدان: انا احب مهره ومستحيل اسوي شيء مثل جذي بعدين شفيها مهره عشان ما تبينها
ام حمدان: ما فيها شيء بس انا أباك حق العنود
حمدان: وانا ما ابا العنود ما احبها
ام حمدان: شو يعني بتعصيني يا حمدان
حمدان: لا .. بس هذي حياتي وما احب حد يدخل فيها .. خليني اتهنى يا اميه لا توقفين بطريجي
ام حمدان: انزين يا حمدان انزين .. باجر اذا ندمت لا تيني فهمت .. بشوف يا انا يا انت
حمدان: ما بندم لان متأكد انه الي بأخذها شيء نادر
..................................
بيت طلال ... كانت قاعده مخلصه تجهيز والحين قاعده اتجهز عمر الي مطفرنها
ساره: عمور يلا البس بنسير سياره
عمر: no شياله( سياره ) no
ساره: تعال هذوه بابا يا
عمر : بابا ههههههههه
ساره: عمووور تعال يلا
عمر: ماما دادا ههههه
وطلع ركض برا.. طلعت ساره تلحقه .. مسكته وقَعَدت تلبسه وتلعب معاه وهو يضحك وساره تضحك معاه .. دخل عليهم طلال بهدوء وهم ما حسوا فيه
عمر وهو يشوف ابوه : بااااااابااااااا هوبه هههههه << شرايكم فيني وأنا اتكلم لغة اليهال ههههههههههههه
ساره لفت عليه: هههههه .. متى ييت ما حسيت فيك
طلال تم ساكت ويطالعها
ساره بابتسامه : شفيك اتطالعني جذي ههههههه
طلال:....
ساره: طلال عاد رد اشفيك ساكت ههههههههههههه
طلال: انتي ساره ولا القمر
ساره راحت له وهمست بأذنه : احبك وأموت فيك .. لو كانت النجوم تتكلم كنت طرشت مع كل نجمه كلمة احبك وأموت فيك يا روحي
.................................
بيت ام سلطان .. كان منصور ف غرفة امه
منصور: امييه كويلي الكندوره
ام سلطان : خل الخدامه تكويلك اياه انا عندي هالكثر شغل على راسي
منصور: انزين بقول حق مهره
ام سلطان: مهره الحين تتجهز مب فاضيه حقك
منصور: يعني عند منو اروح .. خلاص ما بحضر الملجه
ام سلطان: روح بروحك أكوي الكندوره
منصور: بتحترق الكندورة وبحترق انا والبيت بكبره بيحترق
ام سلطان: اعوذ بالله من الشيطان الرجيم .. روح عند قوم سلطان وقول حق نوف
منصور: مشغوله مع عيالها
ام سلطان :عيل اتريا يوم بخلص بعدين
دخل سلطان : امايا عندج دهن عود
ام سلطان : هيه امايه تعال بعطيك.. خذ ها العود بعد
سلطان: مشكوره
ام سلطان: العفو ... سلطان وينها نوف
سلطان: مع البنات قاعده تتجهز .. بغيتي شيء امييه
ام سلطان : ايوا .. لا والله بس منصور يبا يكوي كندورته ومب محصل حد
سلطان : عطني انا بكويها لك
منصور: لا خلاص بوديه الدوبي
ام سلطان: خلاص عطه اخوك وهو بيسويلك اياه الدوبي بعيد عليك
منصور: خلاص ما يحتاج بتريا وحده من البنات أتخلص وتكويلي اياه
............................
اما عند مهره كانت اتحط مكياج فجأة
مهره: اوييييييييه بنات الحقوا
البنات : شفيج
مهره: منصور ... نسيت أكوي كندورته
نوف: خوفتيني الله يهديج .. عادي بيلاقي اي حد يكويله اياه
مهره: عطيني الفون بكلمه
شوق: يا ربيييه على الي مهتمه بأخوها
سلوى: خلاص انا بطلع اشوفه .. وبكويله الكندوره اذا مب مكونها
مهره: زين اتسوين
طلعت سلوى عشان أدور منصور راحت غرفته وما حصلته .. قعدت ادوره ف كل مكان ف البيت .. اخر شيء طلعت الحديقة ادوره .. كانت تمشي وفجأة
سلوى وهي ماسكه رأسها: وجع اخخخخخخخخخخخ شو ها
عبدالعزيز: أسف اختي ما شفتج
سلوى:شو انت كيف تمشي كنت بتكسر راسي
عبدالعزيز أنصدم من سلوى اول ما رفعت رأسها قال بدون ما يحس : هلا بالزين كله
سلوى: نعم !!! ... كأنك قلت شيء
عبدالعزيز : ها لا ولا شيء .. السموحه ما شفتج
سلوى : حصل خير
منصوربصوت عالي : سلووووووووى
سلوى لفت عليه: هلا
منصور وهو يقرب منها : شو اتسوين هني
سلوى: كنت ادورك مهوور مطرشتني عشان كندورتك
منصور: وليش طالعه الحديقة
سلوى : شو انته ما تفهم .. اقولك قاعده ادورك
منصور وهو يأشر عليها من فوق لتحت : طالعه بهالشكل
سلوى سكتت شوي تستوعب كلامه وبعدين :هئئئئئئى منصووووووووووور شعري
منصور : روحي داخل انزين
ركضت سلوى داخل وشافها جاسم اخوها وسألها ورقعت السالفه وشردت عنه .. اما عبدالعزيز ف أول ما يا منصور راح بعد ما أشر له
.........................................
بعد صلاة العشا بدوا الناس يتجمعون و الأغاني اشتغلت والبيت صار ربشه .. وصل الملاج وملج على مهره وحمدان... وشوي وبدت زفة مهره عشان تنزل كانت لحن هادي .. نزلت بكل إناقه ودلع .. كانت جميله والكل شهد على هذا الشي وصلت لمكانها وبدوا الكل يباركولها .. شوي ويت وحده اول ما شافتها مهره على طول حظنتها << عرفتوها صح
روضة: مبروووك ... والله وايد مستانسه
مهره: الله يبارك فيج وعقبالج يارب
روضة: وحبينا وخذينا الي نحبهم بس هم ما يدرون هههههه... متى بتعترفين له
مهره: يوم بيكون الوقت المناسب .. الحمدلله انج يتي على بالي بتسحبين عليّ
روضة: لا ما اقدر اسحب عليج .. بس أزعجت اخوي ويابني عندكم
مهره: زين سويتي خليج عندي
روضة: الحين بيدخل حمدان بروح انا
مهره: خلج قريبه مني ما عليج من حمدان
روضة: خلاص ان شاء الله
...................................