بكلمة عمري والعمر فاني .. انت غير الناس عندي ولَك غلا ثاني

37

ف بيت ابو حمدان .. كانوا مهره وفهد بعدهم يتضاربون والكل موجود..
( ام حمدان- ابو حمدان- شوق- حمدان-سهيل -ناصر)
وكلهم يحاولون يهدون الاثنين لكن ما شيء فايده ثنيناتهم معاندين
فهد: اسمعيني عدل اخر مره تطلعين من البيت بدون ريال معاج فاهمه ولا لا
مهره: لا مب فاهمه .. وبعدين انت منو عشان تتحكم ف حياتي امي ابوي اخوي ولا ريلي
فهد: انا فهد وهذا يكفي .. وبعدين الي أقوله يتنفذ لو منو ما تكونين ان شاء الله لو خدامتي
ابو حمدان: فهد احترم نفسك عيب اتكلم حرمة اخوك بهذي الطريقه
فهد:يبه يعني مب عيب الي هي قاعده  اتسويه ... وبعدين يبالها حد يربيها ومب محصله حد شكلها
مهره صارخت: تدررري ان اليووم اكتشفت انك واحد وصخخ ... وبعديييين بننننت سعيييد تربي مب تتربى اذا انت مب محصل حد تعال عشااان اعلمك الأصول فه..
قاطعها سهيل: مههههرررره عيييب الي قاعده تقولينه
مهره: يعني ما تسمعون شو يقولي .. وبعدين ابوي خط احمر
حمدان  سحبها : تعالي بنروح داخل
مهره وهي تبطل أيدها : ما بروح  مكان ابا أشوف شو اخرته معاه
فهد: اسمعيني انتي هيه .. مب وحده نفسج تعلمني الأصول والسنع .. وبعدين علمي نفسج قبل لا تعلمين غيرج
حمدان: فهد بس عاد مصختها تراك احترم نفسك عشان ما تندم بعدين
فهد: صدقني اذا بندم .. بندم على شيء يسوى مب على وحده مثل هذي
مهره: وهذي الي مب عايبتنك تسواك وتسوى عشر من امثالك فاهم ... وبعدين مريلتك هذي طلعها على حرمتك مب عليّ ان..
قاطعها كف حار من فهد
حمدان : فههههههههههههههدددددد تعدييييت حدوووووودك عااااااااااااااد
..................................
عند نوف و سلطان
نوف: سلطان ممكن اتكلم معاك شوي
سلطان: مب فاضي
نوف: بس لازم تسمعني
سلطان: شو انتي ما تفهمين قتلج مب فاضي لازم أعيد الكلام مليون مره
نوف: لازم تسمعني... انا مب مستعده كل مره اتسمعني نفس الكلام وتباني اسكت .. انا مب حيوانه عندك
سلطان: وبعدين يعنييييي ها ... ما تبيني أعيد ولا اسمعج نفس الكلام كل مره انتبهي على عيالج وما بقول شيء بالعكس بتم ساكت ... اما اتخلين العيال جذي وكأن ما عندهم ام هذا انا ما احبه
نوف: وانت وين يعني .. مب لازم انت بعد تهتم فيهم مثل ما انا اهتم .. مب لازم تربيهم مثل ما انا أربيهم .. انت ابوهم مثل ما انا امهم
سلطان: اسمعيني زين ... انا مب فاضي حق خرابيطج هذي عندي شغل اهم منج ... اطلعي برا وسكري الباب وراج وإذا بتطلعين برا القسم بعد ابرك
نوف طلعت من عنده مقهوره و قعدت اتصيح ما تعرف شو اتسوي  وشو الي خله سلطان يصير جذي فجأة ... حست بحد يمسح على راسها ... رفعت راسها شافت ميره الي يوم شافت دموع امها مسحتهم وحظنتها .. ونوف زاد صياحها
ميره: ماما لا اتصيحين .. انا ما احب اشوفج جذي
نوف وهي تمسح دموعها: ان شاء الله يا ماما من عيوني
...................................
عند حمدان.. كان قاعد يهزب اخوه على الي سواه ف مهره ... وقاطعهم دخول شوق اتصيح
شوق: حمدااان .. حمدان مهره .. روح لها بسرعه
طلع حمدان يركض على قسمه والبقيه وراه..  دخل حمدان وانصدم من الصاله منجلبه فوق تحت وكأنه كان شيء حرب ف هالمكان .. راح صوب غرفته هو ومهره وسمع صوت التكسير بس ها المره مهره مالها صوت
حمدان يدق الباب : مهره ... مهره .. حبيبي انا حمدان بطلي الباب .... مهوور
سهيل: عندك مفتاح ثاني
حمدان: كل المفاتيح داخل الغرفه
سهيل: انت تستهبل ولا شو يعني ما تعرف عن حالتها هذي ... الحين لو صار فيها شيء شو بتسوي
حمدان: ان شاء الله ما يصير .... مهره بطلي الباب ... مهور .... مه..
قاطعه صوت الباب وهو يتبطل وطلعت منه مهره وعلى طول حضنته وقعدت اتصيح .... بادلها حمدان الحضن .. والبقيه راحوا بهدوء من بعد ما اتطمنوا عليها
حمدان: انتي بخير؟؟
مهره: لا .. مخنوقه حمدان احس اني بموت
حمدان: بسم الله عليج .. يومي قبل يومج .. تعالي ارتاحي داخل
راح حمدان مع مهره غرفه ثانيه وخلاها ترتاح شوي .. يابلها عصير وخلاها تشرب
حمدان: مهره بقولج شيء
مهره: قول
حمدان: لا تطرين الموت على لسانج مره ثانيه ما احب اسمع هذي الكلمه
مهره: بس لما تحس انك صدق بتموت لازم  اتقول الكلمه هذي .. حمدان انا تعبت والله العظيم خلاص احس ما اقدر اتحمل ولا حتى اصبر .. كل مره شيء كل مره مصيبه على راسي.. اول شيء يدتي وبعدين عمتي وبعدن مريم وبعدها يت العنود والحين فهد .. يعني ما ارتاح .. ما ادري هم يحبون المشاكل ولا المشاكل تحبني
حمدان: مهور فهد غلط وعرف غلطته .. و لازم تعرفين ان الواحد اذا كان ف دوامة مشاكل ما يستسلم بسهوله .. انا اباج تواجهين تتحدين تتحملين وتصبرين .. عشان تكونين الأقوى
مهره: بس انا مب قويه .. ولا عرفتها القوى .. كل ما سويت شيء يحطموني .. كل ما قويت نفسي يكسروني والمشكلة دايماً الي يكسروني يكونون القريبين مني .. ليش جذي حظي .. انا شو سويت عشان اتعاقب بهذا كله
حمدان: ما عاش الي يكسرج ما دام انا موجود  وإذا على القوه انا ما خذيتج على الفاضي .. انا خذتج عشان اكون انا الدرع الي يحميج وامدج القوه .. دامج معاي يخسي واحد يكسرج صدقيني ... لانج بكل بساطه قلبي وروحي وعمري ودنيتي كلها ... وبعدين انتي حامل ولازم ترتاحين .. الدكتوره قالت لج اتجنبي الاشياء الي تسببلج التوتر عشان صحت الجنين
مهره بابتسامه خفيفه: تصدق اني نسيت اني حامل
حمدان: هههههههه والله اخاف باجر اتسوين شيء من كثر ما تنسين الي فبطنج
..................................
بعد يومين ( العزيمة  ) كانت العزيمة  ف بيت ابو حمدان
نوف وسلطان ما زالوا على خلالفهم
مهره وفهد .. اتسامحوا بس لين الحين محد شاف الثاني
اتجمعوا كلهم ف بيت ابو حمدان .. والكل كان موجود الا مهره وحمدان الي متأخرين كالعاده ..
حمدان: مهور وين حطيتي غترتي
مهره: عندي ... امسك كنت اكويها
حمدان: احس ان ابوي بيروغنا بالعصا لان متأخرين كالعاده
مهره: هههههههههههههههههههه
حمدان: خلصتي ولا بعدج
مهره: خلاص خلصت بس باقي البس الشيله
...................................
ف بيت خليفه .. كانوا متجهزين و بيطلعون خلاص لكن سلوى اخرتهم شوي
خليفه: سلييييو يلا خلصينا
سلوى: دقيييييييقه
جاسم:من متى اتقول دقيقه ولين الحين ما خلصت
خليفه: هذي دواها أركبها السياره بكشتها
سلوى: احم احم جنكم تتكلمون عني
جاسم صفر : شو ها الجماااااااااااال ياااا ناااس
خليفه: لا لا ما اصدق
جاسم  بالمصري: يا ارض احفظي ما عليك
خليفه: جسوم اتشوف الي اشوفه
جاسم: اكيد .. لو سمحت عبود ممكن نتصور معاك
سلوى: نعععععععععمممممممم !!! 😡😡
خليفه وجاسم : ههههههههههههههههههههههههههه
سلوى : انتو يبالكم ضرب تراه .. افف بروح أبدلكم
جاسم: بتلاقين احسن عني اصلاً إنتوا ويا هالراس .. وبعدين منو هذا الي بيرضى اصلاً انج تكونين اخته ها!!
خليفه: لا عاد كله ولا سلوى
سلوى بدلع : هيه اخوي فديتك دافع عني .. اصلا منو لي غيرك
جاسم: انزلي لا اشوتج finger وتوصلين عند ابليس على طول مب الطابق الأرضي بس
سلوى: افف انت إنسان ما فيك ذرة ذرابه وذوق واتكيت على فكره
خليفه: بسكم خلاص وايد تتكل.....
فجأة وقف بنص الدري وهو يشوف الشخص الي واقف قدامه .. اخر إنسان توقع ان يشوفه .. اما سلوى وجاسم وقفوا اول ما شافوا ان أخوهم وقف .. وفنفس الوقت خافوا من ردة فعل خليفه من بعد ما شافه .. يخافون انه ينفعل ويغلط وما في حد كبير معاهم عشان يهدي من بينهم
...........................
ف بيت بو حمدان .. كانوا البيت ضحك وسوالف وحشره وغيره .. وايد كانوا مستانسين .. طبعاً بعد الغدا الريايل والحريم قعدوا ف ميلس واحد وقعدوا سوالف مع بعض
ساره: مهور شفيه ويهج مصفر
مهره: ما فيني شيء .. بس يمكن من الفونديشن
شوق: لا بس مهور اليوم غطيتي علينا بجمالج
مهره بغرور: حبيبتي انا أحط مكياج ولا ما أحط بغطي عليكم بجمالي so انصحكم بعمليات تجميل
نوف: بدينا عاد .. مهور والغرور ربع تراهم
شوق: اقولج ترا نحن بعد نعرف الغرور وربعه مب بس انتي
مهره : يا واثق الخطوة لاتحسب أنّك (مّلك) تبي تعرف مشي الملووك (اتبعني).
البنات: اوووووووووووووووووووه
الكل لف عليهم .. مستغربين صرخة البنات
ابو حمدان: شفيكم جذي اتصارخون
مهره وقفت بثقة : خالي كنا نتكلم عن ا...
قطع كلام مهره ......
.
.
.
.
.
.
.
.
.
1. شو تتوقعون الشيء الي شافه خليفه وممكن انه يثور منه؟؟؟
2. مهره شفيها و شو الي قطع كلامها؟؟؟!
3. احلى موقف عندكم من كل ثنائي و شخصيه ف الروايه ؟؟
( ساره & طلال )
( نوف & سلطان )
( مهره & حمدان )
وباقي الشخصيات