بكلمة عمري والعمر فاني .. انت غير الناس عندي ولَك غلا ثاني

30

وصلوا قوم حمدان البيت ونزلوا
حمدان: روحي بدلي ملابسج وتعالي عندي ف البيت لا تقعدين بروحج
شوق : ان شاء الله
راحوا حمدان ومهره صوب قسمهم او فلتهم او بيتهم .. ويا حمدان يبا يبطل الباب و شاف شيء ظرف على الباب شله ودخل داخل ودخلت وراه مهره الي ما كانت منتبه على الظرف الي ف ايد حمدان .. راحت الغرفه عشان تحط مرهم على الحرق وحمدان قعد ف الصاله يشوف الظرف وانصدم من الي فيه .. دقايق ونزلت مهره وهي تربط شعرها
حمدان: تعالي
مهره: هلا
حمدان وهو يعطيها الصور: شو هذا
مهره شافت الصور وانصدمت : حمداااان .. حمدااان شو هذا
حمدان: انا ما اعرف شو ..انتي شو اتشوفينه
مهره: وانت ليش جذي اتكلمني .. ليكون مصدق السالفه .. حمدان ترا الصور ملعوب فيها
حمدان: وانتي ليش جذي متوتره
مهره وهي اتصيح:حمدان هذي الصور محد شافها أبداً كيف جي مسوين فيها منو هذيل
حمدان صفعها كف : وتسأليني منو هذيل شو انتي ما تستحين على ويهج
مهره: حمدان والله هذي مب انا لاعبين فالصور والله
حمدان بصراخ: كيييييف يعني مب انتييي ... مب انتيييي كنت كل يووووم ترديييين البييييت متأخرررر .. وبعدين الي اعرفههه ان صوررررررج دايماً عندج كيف هذيل طلعوا هااااااا
مهره: حمدان انزين اسمعني ما يصير اتصارخ عليّ جذي بدون ما تسمعني خلني أفهمك السالفه
حمدان : تفهميني السالفه ولا تحاولين اطلعين كذبه محترمه
وانهل عليها بالضرب بدون رحمة ومهره اتصارخ وتحاول تبتعد عن حمدان لكن حمدان لا حياة لمن تنادي ... لين دخلت شوق وشافت حمدان ... راحت بعدت مهره عن حمدان
شوق: حمدان ينيت ليش جذي تضربها شو مستوي ؟؟؟
حمدان: من اليوم ورايح .. ما تطلعين من البيت لا دوام ولا حتى عند امج .. اذا ما تربيتي عدل وانتي ف بيت ابوج انا بربيج عدل
وطلع برا ورقع الباب وراه
.........................
عند مهره وشوق .. مهره كانت حاطه راسها ف حضن شوق واتصيح .. وشوق كانت تحاول تهديها
شوق: مهره شو مستوي ليش حمدان سوا فيج جذي
مهره: ظلمني .. والله العظيم اني مظلومه مالي دخل والله
شوق: قومي خليني اوديج الغرفه
مهره: ما اقدر .. ما ابا أتم معاه
شوق: مهره قومي معاي .. ارتاحي ف غرفتج وبعدين يصير خير
قامت مهره بمساعدة شوق الي ودتها غرفتها هي وحمدان بس مهره رفضت وراحت الغرفه الثانيه... راحت شوق يابتلها ماي وشربته لمهره .. ومهره من التعب غفت على طول
..............................
ف بيت ام سلطان ... كانت قاعده ف غرفتها بروحها .. شوي مر ف بالها صورة مهره .. اتصلت عليها وما ردت .. ردت اتصلت مرتين وبعد ما ردت .. اخر شيء قالت اكيد انه عندها شغل عشان جذي ما ردت .. قطع افكارها صوت دق الباب
ام سلطان: ادخل
نوف: عموه انا رايحة بغيتي شيء
ام سلطان: وين رايحه ف ها الليل
نوف: بروح بيت اهلي .. شوق بروحها ف البيت قلت بسير اقعد معاها لين يوصلون البقيه
ام سلطان: خلاص برايج .. انتبهوا فالطريق
نوف: ان شاء الله
.............................
عند حمدان ( انا الحين قاعد عند البحر .. أحسه المكان الوحيد الي ارتاح فيه .. مقهور ومعصب وايد .. احس بعدني ما بردت حرتي فيها ... وفنفس الوقت احس اني ظالمنها ما ادري ليش .. احترت والله العظيم .. عشان جذي اتصلت ف خليفه .. ابا حل لمشكلتي هذي ... خلني اتصل ف شوق يمكن صار ف مهره شيء .. ولا اقول لا لا ما بتصل خلها تتأدب عيل انا ينقص عليّ .. شكلها بعدها ما عرفت منو حمدان ... بس البنت مظلومه يعني مستحيل تطلع بروحها واتسوي هذي الحركات وغير جذي انها كانت اتحبني من وهي صغيره ... وحتى يعني لو اتحبني .. في وايد بنات يحبون ويخونون اكيد هي نفس الشيء ...)
قطع حبل أفكاره ايد خليفه الي انحطت على كتفه لف حمدان عليه ورد يشوف البحر
خليفه وهو يقعد عنده: شفيك ؟؟!
حمدان: اليوم يوم كنا رادين من بيت خالتي لقيت ظرف على باب قسمنا .. شليته وشفت صور مهره بوضعيات استغفر الله .. وبين شباب وغيره
خليفه: وطبعاً بدون ما تتفاهم معاها قمت وضربتها صح
حمدان: يعني شو تباني اسوي اقعد اطالع الصور واضحك ولا ابروزهم
خليفه: حمدان شفيك .. شغل مخك شوي .. أولاً انت مصدق الصور اكيد لاعبين فيهم او شيء .. ثانياً انت تشتغل ف التحريات على الفاضي .. افتح عيونك عدل عشان اتشوف الحقيقة
حمدان: مب جذي السالفه يا خليفه ... ابا اعرف منو مسوي جذي مقهور والله العظيم .. قلبي يقولي انها مظلومه وعقلي يقول لا الي سويته صح
خليفه: انا اول مره اشوف إنسان قلبه اصحى من عقله
حمدان: خليفه انت ياي هني تطنز ولا تحل مشكلتي
خليفه: انا ما اشوف ان عندك مشكلة عشان تنحل .. روح البيت واعتذر من مهره .. وأنسى موضوع الصور وخلاص
حمدان: مستحيل اسامحها بعد الي شفته
خليفه: شوف عاد حمدان .. مهره اختي قبل لا اتصير بنت عمي .. وانا إنسان ما ارضى عليها .. حالها من حال باقي خواتي .. ترضى باجر حد يمد ايده على وحده من خواتك وفوق هذا كله يطلع ظالمنها .. طبعاً لا .. يويلك لو سمعت انك ضاربنها بتندم صدقني .. وأرد اقولك تراها اختي وانت اخوي وانا ما ارضى الغلط على واحد فيكم
...........................
ف بيت ابوحمدان تحديداً قسم مهره وحمدان كانت نوف عند شوق الي كانت تقولها شو صار من اول ما دخلت
نوف: مسكينه مهره .. كل ما فرحت يصير شيء
شوق: والله ما شفتي حالها كيف .. حمدان ضاربنها ضرب كأنه ضارب واحد من المتهمين زين ما ماتت
نوف: انزين شو صاير من بينهم ليش كل ها
شوق: والله ما ادري .. اتصلي ف حمدان او اي حد فيني رقاد البيت فاضي ما اقدر اخليها بروحها هني
نوف: بخلي سلطان يشلها البيت
شوق: لا لا حمدان قاللها ما تطلع من البيت حتى عندكم ما تروح
نوف: لا عاد حمدان ها مصخها تراه بخبر ابوي خل يشوف له حل معاه
شوق: اتصلي فيه قوليله اي البيت لاني انا بروحي وانج انتي مضطرة تردين البيت
نوف: اوك
اتصلت نوف ف حمدان وقالتله الي قالته شوق وقالت ان مهره تعبانه وما تقدر تتحرك << لازم بهارات 😂😂
...........................
عند مهره ( بطلت عيوني ولقيت الدنيا مظلمه .. واحس بصداع فظيع .. قمت ودخلت الحمام وانتو بكرامه وبعدها طلعت من الغرفه .. ابا اتأكد اذا شوق راحت ولا بعدها .. بس انصدمت لما لقيت شوق ونوف موجودين فالصاله
مهره: السلام عليكم
نوف: وعليكم السلام .. شحالج الحين احسن
عرفت ان شوق خبرتها السالفه .. هزيت راسي بهيه و طالعت شوق .. وما شاء الله عليها فهمت عليّ على طول
شوق: بعده برا البيت
مهره: بروح المطبخ بيب لي عصير .. حد يبا شيء معين
شوق: انا ابا نفسج
نوف: وانا ماي بس
رحت المطبخ وجهزت القلاصات وسويت لي انا وشوق ونوف عصير فراولة ويبتلنا كلنا ماي .. ومن حسن حظي ان كان في كيك ف الثلاجة قطعته ووزعته ف صحون ورتبت الصحون وطلعت اوديلهم الاكل
مهره: بروح شوي وبي ما بطول عليكم
نوف: خذي راحتج
شوق: مهوور .. انتي الي مسويه الكيك والعصير ولا جاهز
مهره: الكيك جاهز بس العصير انا مسوتنه
رحت الغرفه وبطلت كبتي وطلعت منه صندوق حلويات .. ومن حظي الحلو كان متروس حلويات .. بصراحه يا فوقته .. لان راسي يعورني وفوق ها كله مقهوره ومعصبه ومضايقه من ظلم حمدان لي .. قعدت شوي فالغرفة وبعدين طلعت .. دخلت الصاله وانصدمت بأن حمدان موجود معاهم .. وال.. يالس يشرب ويأكل من آكلي .. سويتله طاف وقَعَدت على الزاويه وكرسي بروحي عشان محد يقعد عندي وبديت اكل من الحلويات
والكل يالس يطالع
نوف: مهوور لا تكثرين من الحلويات مب زين حقج
مهره وهي اتشوف حمدان بنظرات: احسن يوم انه مب زين حقي يمكن اموت وارتاح من العيشة هذي
حمدان: بلا ها الكلام الي ماله داعي
مهره: ترا انت المفروض اخر واحد تتكلم بعد الي سويته سمعت
حمدان: احترمي نفسج احسن لج .. ولا شكلج تبيني اكمل عليج الضرب صح
نوف: حمدااان !! .. شفيكم انتو الاثنين .. ليش جذي صار فجأة ؟؟
حمدان: شيء خاص بيني وبينها
مهره: لا مب خاص .. انا بقولج شو مستوي .. اخوج ما ادري منو قاص عليه ومعطنه ظرف فيه صوري وملعوب فيها وطبعاً صدق وقام ضربني وفوق هذا كله هددني وبعد مانعني من زيارتكم وحتى الدوام
نوف: حمدان ممكن اشوف الصور
طلع حمدان الصور وعاطاها .. قعدت نوف اتشوف الصور هي وشوق وفجأة صرخت شوق
شوق: مهووور هذي الصورة مب انا وياج صورناها
مهره : لا تقوليلي انا قولي حق اخوج
نوف: لحظة لحظة ... تذكرين يوم الملجه .. لما كنت مداومه .. مريم كانت ف غرفتج كانت تشوف صورج
مهره باستغراب: وانتي كيف عرفتي كل هذا
نوف: كانت مهدده ميروه .. لان هي الي شافتها ..حتى قايلتلها اذا تكلمتي بقتل اهلج
مهره: متأكده من ها الكلام
نوف: 100%
مهره: عيل والله ما اخليها
رحت اتصلت ف ساره وطلبت انها تعطيني طلال .. كلمت طلال وقتله كل السالفه .. قالي انه هو بيتصرف معاها .. تبون الصراحه كنت ابا أكلم ابو مريم بس اعرف ان ما يروم عليها .. ماشاءالله لسانها أطول عني )
........................
نقدم الأحداث .. يوم الثاني الصبح كانت مهره ف المطبخ قاعده اتسوي عصير .. وطبعاً سوتلها دبا كبيره .. صبتلها في قلاص وقَعَدت تشرب .. دخل عليها حمدان وشافها بس هي ما انتبهت له .. يبا يكلمها بس ما يعرف شو يقول بعد الي سواه امس
حمدان: ااا .. انتي مب بسج من سكر
مهره: لا
حمدان: مب زين جذي .. تراج من امس تاكلين سكر بتتعبين بعدين
مهره: احسن
حمدان: متى بتروحين دوامج
مهره: الحين
حمدان: انزين شوي شوي فالطريق لا تسرعين ولا تسرحين
قامت مهره ويت تبا تطلع برا
مهره: ليش.. خايف اموت .. احسن خلني اموت وارتاح منكم .. صدق صدق برتاح اذا مت
حمدان مسك أيدها : اششششش ... لا تيبين طاري الموت على لسانج .. ما احب اسمع ها الكلمه ومنج انتي خاصةً
مهره: ترا ما له داعي تمثل انك الحنون عادي خلك طبيعي .. خلك على حقيقتك .. نفس امس تماماً
حمدان: ...
.
.
.
.
.
.
.
.
.