اوطان الدمار🖤

ماضي اليم

متابعيني الاحبه 

✋✋احييكم 

رجاءا اي تعليق طائفي ما اقبله اقروا وانتوا متمسكين باعصابكم رجاءا انتقاد لتصرفات الافراد مسموح حجي عالابطال براحتكم بس عركات ما اريد هاي الحقيقة بدون رتوش حتى لو تنخفي بخارج منازلنا او خارج انفسنا تبقى هالشغلات محفورة بالنفس وخصوصا اللي تأذى منها بفقد اعزاء ...وابطالنا ماضل الهم عزيز سلم منها ....

شغلة ثانية قبل لا نقرا لا تحسبوني على فئة منهم اني ما اتبع احد ربي نزل قرأن اقراه وصلاة اصليها وتعاليم واضحه ما عليها اختلاف بين المذاهب  نمشي عليها ماكو داعي للتعصب فرأيك يعكس دواخلك وهذا رأي😊😊وغلسوا عالسحكات ان وجدت😆😆

اوطان الدمار 

البداية

.........

عائلتين عانوا من القتل والدمار والخراب تحت مسميات شتتوقعون يكون كلامهم عن الاخر ❤❤❤

هذا البارت عن عائلة جواد الحسن والبارت القادم ندخل بيت قيس النجار ومعاناة هالعائلة ما تقل اسى عن المقابل

💞💞💞💞💞💞💞

عام 2014 مع دخول داعش للعراق وتهجير الناس من ديارها تبتدي حكاية ما انتهت ببوم ولا راح تنتهي حكاية حب وحرب ..طائفية بنكهة اخرى وكره بمنظور مختلف سامعين عبارة ..اعشقك كرها ...هاي تنطبق على ابطالنا

 نظراتي تراقب جواد الملتهب يمكن هذا انسب وصف اله حاليا واني اشوفه يلوب بالصاله واني كاعد اراقبه واعرف زين شنو اللي بيه وشنو يفكر ..رغم عمره صار فوك الاربعين اليوم رجع مراهق امي وجدتي منزعجات من تصرفاته الحجي استخف كلش والكاع ما صارت تلمه والبيت كام يخنكه وزوجته مو داريه عنه اصلا ملتهية بابنها المريض وتعلم الكلمات والمصطلحات العراقية حتى ترد بلسانها المسموم علينا وتفهم شنو نحجي بعقلها احنا نكرهها لا من غير جنسية 

جواد يروح للباب يلزمها يريد يفتحها ويطلع ويرجع يكعد مقابيلي وينافخ ويفرك بوجهه ويدنك بتعب ويرجع يرفع روحه ويفرك صدره وكانه يريد يطلع قلبه من مكانه ولو يطلعه يكون افضل ولا هذا حاله معقول الحب هيج يسوي مو هاي صارلهم عشرين سنه مفترقين يعني بس سمعها بالحي صار هيج بي زين ليش سمح الهم يرجعون وهو يكدر ببساطه يمنع رجوعهم بورقة صغيرةلو لغاية في نفس يعقوب رجعهم اني اعرفه مثل ما اعرف روحي مو مال حب ابد ..اللي يموت انسان يتوسله حتى يعيش بلا رحمه... منين اله قلب ويحب؟؟ واني مثله واسوء

رجعت بذاكرتي ليوم اسود حول حياتي لسواد وملأ القلب حقد وغل كنت صغير عمري ما يتجاوز السبع سنوات بعام ٩١ وايام الانتفاضة والغوغاء ومدري شنو بعد مسميات اطلقوا على هذيج الاحداث المهم واللي صار كان عندي ثلاث عمام وابوي رابعهم